sina wile pali e ante toki la, o kepeken nasin ni

ante toki li pona mute. lipu mute en pali nimi mute li lon. taso, lipu pi mute ala en pali pi mute ala li kepeken toki pona. lipu sin pi toki pona en pali sin pi toki pona li awen suwi! mi lukin e ni. mi kin li pali e ona. pali sin en ante toki o awen o pona tawa jan pi toki pona. nasin ni li pona tan ni: nanpa wan la, pali pi ante toki li ken wawa e nasin sina pi toki pona. nanpa tu la, ante toki li ken musi tawa jan ali pi toki pona! nanpa tu wan la, jan pi toki pona ala li lukin e ante toki la, ona li wile kama sona e toki pona lon tenpo ni.

pona la, jan mute o pali e ante toki! mi pali e ni. sina ken pali e ni kin. taso, ante toki ike mute li lon li jaki e kulupu lipu pi toki pona. tenpo la, jan ali li kepeken nasin pi ike lili, taso mi toki e ni: ante toki pi ike suli li nasa e sona li jaki e kulupu lipu. ni la, o weka e nasin ike pi ante toki. o kepeken nasin pona taso pi ante toki ni. nasin pona ni li seme? nasin mute li lon a. mi toki taso e nasin mi. ken la, jan ante li kepeken nasin ante ona. mi pilin e ni: nasin ni pi ante toki li ilo li pona tawa sona. sina pilin sama la, sina wile pali e ante toki lon toki pona la, o kepeken ona!

nanpa wan la, o alasa ala e nimi wan taso pi toki pona tawa nimi wan taso pi toki mama sina. o ni tan seme? kon nimi pi toki ante tu li ante lon tenpo mute. sina wile kepeken nimi wan taso lon ante toki la, sina ken pali e ante toki nasa. o kepeken nasin pona pi sona pona. nimi pi toki mama sina li kepeken kon mute. o kepeken kon wan pi nimi ni. nimi pi toki pona en nimi pi toki mama sina o sama ali ala.

nanpa tu la, o alasa ala pana e kon ali lon ante toki. ante toki la, kulupu nimi suli li ike lili. ante toki la, kulupu nimi lili li pona. pona la, sina o pana e kon pona lili lon ante toki. ni la, kulupu nimi pi suli ike li pona ala. mi pilin e ni: ante toki pona li wile kipisi¹ e kon nimi. kipisi ni o pana e kon suli. o sona kin e ni: sina ken kepeken nimi mute lon ante toki. taso, tenpo mute la, sina wile ala kepeken nimi mute.

nanpa tu wan la, o kepeken nimi sin ala, o kepeken nimi pu taso anu nimi ku suli taso. ken la, sina pilin e ni: “ni li ike! nimi sin li pona mute tawa mi! tan seme la mi o kepeken ona ala?” o sona e ni: nimi sin mute en nimi mute pi pu ala li pona tawa jan Kapesi Pake kin! taso, jan mute li sona ala e nimi ni. ante toki sina o kama suli la, sina wile kepeken nimi namako ala. sina awen wile kepeken nimi namako lon ante toki sina la, o kepeken nimi namako pi mute lili. mute ona li awen lili la, jan mute li sona e ona.

nanpa tu tu la, ante toki o musi tawa sina. sina pilin musi tawa toki pi toki mama sina la, ante toki sina li ken kama pona mute. kin la, ona li musi la, ona li pona suli tawa sina kin! ante toki o ijo pi wawa mute ala. o pali e ante toki kepeken wawa mute ala. o pali e ante toki kepeken musi, kepeken pilin pona. ante toki o pona tawa sina kin.