toki sama pi toki pona - nanpa tu tu

toki pona li jo e toki sama mute. mi pana e sona ni lon tenpo pini. tan seme la, toki sama pi mute mute li lon? ona li lon tan ni: jan li olin e toki pona. olin ni la, jan li pana e kon pi toki pona tawa nasin ante, tawa toki ante. toki sama pi toki pona li ken sama toki pona, li ken ante. toki ali ni li kama tan pilin pi jan pali ona. o kama sona e toki sama pi toki pona.

tenpo pini la, mi pana e sona pi toki ni: toki Tokipinglish en toki Ta Ti. tenpo ni la, mi pana e sona pi toki Ta Lo Ne e sona pi toki Puna e sona pi toki Pulu.

toki Ta Lo Ne li tan jan Pijan Keko (Brian Greco) li kama lon tenpo sike 2010. toki Ta Lo Ne li jo e nimi 31 taso. toki Ta Lo Ne la, toki open pi nimi ali li tan mu taso. nimi ali pi toki Ta Lo Ne li kepeken kalama pi tenpo wan taso. nimi 30 pi toki Ta Lo Ne li jo e kon. nimi wan li jo ala e kon. nimi ante ni li nimi “x.” nimi “x” li kipisi¹ e linja nimi tawa ni: jan li kepeken nimi “x” sama nimi “tawa” sama nimi “lon” lon toki pona. toki Ta Lo Ne li kepeken kalama luka luka tu. kon pi nimi “ta lo ne” li sama “toki pi pana lon” lon toki pona.

jan Pijan Keko li kepeken nasin sewi To lon toki Ta Lo Ne. ona li wile e nasin nimi pi pona taso. kin la, jan Pijan Keko li toki e ni: “mi pali e toki Ta Lo Ne kepeken tenpo lili. mi pini ala e ona. mi o awen pali e ona lon tenpo kama.” jan Pijan Keko li kepeken kon pi toki pona li kepeken kon pi toki Pon Wen tawa toki Ta Lo Ne. (toki Pon Wen li toki sama kin pi toki pona). jan pi toki pona pi mute lili li sona e toki Ta Lo Ne lon tenpo pini. ona li jan Kipo li jan Tawi.

lawa nimi li weka lon toki Ta Lo Ne. toki Inli la, nasin ni li sama “ta lo ne has no real grammar.” (jan Pijan Keko li toki e ni). nasin ni li nasa lili tawa mi. selo nimi pi toki Ta Lo Ne li taso li kipisi. nimi pi toki Ta Lo Ne li kama wan ala. ni li nasin pi toki pona kin. jan li kulupu e nimi mute la, kon pi kulupu nimi li ante. kon pi nimi wan li awen li ante ala. taso, nimi ali pi toki Ta Lo Ne li kepeken kon pi mute mute. lawa nimi li weka, tenpo mute la, jan li ken ala sona e kon pi linja nimi. nimi “sina” li nimi “te” lon toki Ta Lo Ne, taso nimi “mi” en nimi “ona” li weka lon toki Ta Lo Ne. kin la, nimi “te” pi toki Ta Lo Ne li kepeken kon pi nimi “ante” kin.

nimi “ko” lon toki Ta Lo Ne li sama nimi ni pi toki pona: nimi “kepeken” en nimi “ilo” en nimi “kulupu” en nimi “ali.” nimi “nu” lon toki Ta Lo Ne li sama nimi ni pi toki pona: nimi “wawa” en nimi “ken” en nimi “sona.” nimi “ki” lon toki Ta Lo Ne li sama nimi ni pi toki pona: nimi “pini” en nimi “pakala” en nimi “moli.” mi pilin e ni: toki Ta Lo Ne la, mute nimi li lili, taso kepeken nimi li pakala. kepeken pona la, jan o pona e toki Ta Lo Ne.

mi pali e linja nimi kepeken toki Ta Lo Ne. kon ona li “jan li ken ala moli e kon.”

ni nu ki lu.

toki Puna en toki Pulu li kama tan open sama. toki tu ni li tan jan Alepe li kama lon tenpo sike 2010. (jan Alepe li pali e toki Bon Wen kin). lon la, toki tu ni li toki wan. toki Puna li toki pi tenpo majuna². toki Pulu li toki pi tenpo sin. toki Puna en toki Pulu li jo e nimi 18 taso. toki Puna en toki Pulu li kepeken kalama luka tu tu. kon pi nimi “puna” en kon pi nimi “pulu” li sama “toki pona” lon toki pona. toki tu ni la, toki open pi nimi ali li tan mu taso. nimi ali pi toki Puna en nimi ali pi toki Pulu li kepeken kalama pi tenpo wan taso.

nimi ali pi toki ni li kepeken kalama pi tenpo wan taso. taso, nimi li ken kama wan. nimi li kama wan la, nimi sin en kon sin li kama lon. ona li nasin ni: nimi “nu” pi toki Puna li sama nimi “ante” lon toki pona. nimi “lu” pi toki Puna li sama nimi “ma” li sama nimi “ni” lon toki pona. taso, nimi “nulu” pi toki Puna li sama nimi “tenpo” lon toki pona. mute pi toki Puna li sama toki Pulu, taso ijo li ante kin. nimi pi mute lili lon toki Puna li kepeken kon ante lon toki Pulu. nimi “pu” en nimi “ki” li awen sama, taso nimi ante ali li tawa kon ante.

kin la, toki Pulu li weka lili e nasin pi toki pona. toki Puna li awen e nasin pi toki pona lon ona. tenpo mute la, nimi pi toki Puna en nimi pi toki Pulu li ken kama suli. toki Pulu la, nimi “nitukamali” li sama nimi “laso” lon toki pona! ni la, jan li ken kama sona e toki tu ni kepeken tenpo mute taso, kepeken wawa mute taso. jan Alepe li wile ni: toki Puna en toki Pulu li toki pi ma ali li toki ma. taso, ni li lon ala. mi pilin e ni: wile ona li ken ala lon kin.

mi pali e linja nimi kepeken toki Pulu. kon ona li “mi jo e tenpo mun luka.”

mi ku tanipinipipi nilituliti.

tenpo kama la, mi pana e sona pi toki sama ni: “Kyrete” en “Toki Lojbanto” en “Sapolim.”