SONA SIN #10 | News in Toki Pona

toki a! ni li sona sin! tenpo ni la, mi - jan Alonola - li lon. mi jo e ijo mute tawa sina!

open la, mi toki e sona sin pona. pini la, mi toki e sona sin pi pona ala.

nasin telo Wijosa li nasin telo suli lon ma Elopa. jan mute li toki e ni: nasin Wijosa li powe ala tan ni: tomo ala li lon nasin, li lon poka nasin. kulupu lawa pi ma Sipe li wile awen e nasin telo Wijosa. ni la, ona li awen e nasin telo Wijosa en ma poka!

kala en pipi mute li lon nasin telo Wijosa, li awen a. jan lawa tawa pi ma Wijosa li toki e ni: “ken la, ma Sipe li ken ala ante e ma ale, taso ona li ken pali e ijo pona ni tawa kasi, tawa soweli ale.”

kulupu ma Elopa la, lawa sin li lon: lawa pona tawa jan pi ken lili. lawa ni li pona tawa jan pi kute lili, tawa jan pi lukin lili, tawa jan pi ken tawa lili.

lawa ni la, ilo sona en lipu linluwi o ante: tenpo kama la, ona li pona tawa jan pi lukin ala. kin la, sitelen tawa o ante. ni li pona tawa jan pi kute ala anu lukin ala. suli la, lawa ni li lawa e kulupu esun kin!

ma Tosi la, jan pi pona sijelo li pona e jan pi ike sijelo. tenpo pini la, ona li jo e ike HIV anu ike Lensi, e ike Lukimija.

jan pi pona sijelo li weka e kipisi sijelo pi ike Lukimija. ni la, ona li pana e kipisi sijelo sin tan jan ante. jan ante ni li pana e kipisi sijelo open ona. kipisi sijelo open li wawa mute a, li ken kama e ijo sijelo ale. suli la, jan pana li ante, li ken moli e ike Lensi!

tenpo ni la, jan pi ike Lensi, pi ike Lukimija li jo e kipisi sijelo wawa tan jan pana. ni la, sijelo ona li ken utala e ike tu. tenpo ni la, jan ni li jo e ika ala!

tenpo ni la, mi toki e sona sin pi pona taso ala.

tenpo pini lili la, jan lawa pi suli ale lon ma tomo Ten Ake li toki e ni: jan Pusin li jan ike, li jan pi lawa ala. ni la, jan Pusin li tawa ma mute la, jan o poki e jan Pusin.

taso tenpo pini lili la, jan Pusin li tawa ma Kilin tan ni: jan Pusin la, jan o pilin e ni: jan Pusin li wawa a.

kin la, jan lawa pi suli ale li toki e ni: jan Malija Lowa-Pelowa li jan kin pi lawa ala. jan Malija li jan lawa pi jan lili lon ma Losi. ona li weka e jan lili Ukawina mute tan ma Ukawina.

ma Ukawina la, jan li pilin pona mute tan lawa tan jan lawa pi suli ale lon ma tomo Ten Ake.

tenpo pini lili la, kulupu mani ni: “Silicon Valley bank” li moli tan ni: ona li jo ala e mani a.

ni li suli tan ni: tenpo pini la, kulupu mani pi mute lili li moli! kin la, kulupu mani ni li suli mute.

lipu Kalijen la, ijo mute li ken moli e kulupu mani ni:

• lawa mute pi jan Tuwanpu li weka.
• lawa pi kulupu mani ni li ike
• esun ma li nasa, li ike

taso jan pi mani lili o pilin ike ala.

ni li sona sin! mi tawa, o tawa pona!