poki pi telo Amonsijato

pakala ale tan jan Potunato li tawa mi la, mi awen pona, taso ona li pakala toki e nimi mi la, mi o pakala sama e ona. sina sona mute e kon mi la, sina sona e ni: mi toki ala e wile pakala mi. pali li pini ale la mi kama pona sin. ni li lon, taso nasin pali mi li pona mute la pali li ken ala pakala ike. mi pakala e ona la, ike ante o tawa ala mi. ike sama li kama pakala e mi la pali li pini pona ala. jan ike li sona ala e mi pakala la pali li pini pona ala sama.

lon toki lon pali la wile mi li pona taso tawa jan Potunato. mi awen pona e uta mi, sama mi pi tenpo ante, taso jan la, uta pona mi li tan ala wile pi moli ona.

jan Potunato ni a, la ona li jan suli li ken monsuta tawa jan mute, taso ike wan ona ni li lon: ona li pilin pona tan sona mute ona pi telo nasa kili. jan Italija lili li jo e ken musi wawa. tenpo mute la pilin wawa ona tawa musi li tan tenpo pona li tan ken jo, li sama jan mani Inli anu Esakaki, taso wawa ona li lon ala. sitelen musi en musi pi kiwen kule la, jan Potunato, li sama jan pi ma ona, li toki pakala e musi. taso ona li sona mute e telo nasa suli. ni li sama sona mi. mi kin li sona mute e telo nasa suli pi ma Italija, li esun mute e ona lon ken mi.

suno li tawa la, lon tenpo musi pi kalama wawa mute la, mi lukin e ona. ona li kama lon pilin seli mute tan ni: ona li moku e telo nasa mute. ona li len sama jan musi. len li selo e sijelo la linja kule li lon len. len lawa li sama nena li jo e kiwen kalama lili. mi pilin pona tan kama ona la mi wile ala pini e luka wawa lon luka ona.

mi toki tawa ona e ni: “jan pona Potunato o, kama sina li pona a. sina pona lukin mute a! a, mi kama jo e poki palisa. jan ante la ona li telo Amonsijato, taso mi la ni li ken lon ala.”

“seme?” ona li awen toki e ni: “telo Amonsijato? li lon poki palisa a! ni li ken ala a! ken ala lon insa pi tenpo musi!”

mi toki e ni: “mi la ni li ken lon ala. pakala mi la mi esun kepeken mani wile ale li toki ala e esun tawa sina tan ni: sina lon ala. mi wile ala weka e esun pona.”

“telo Amonsijato a!”

“ni li ken lon ala.”

“telo Amonsijato a!”

“mi wile sona.”

“telo Amonsijato a!”

mi awen toki e ni: “taso jan ante li wile e sina la mi wile toki tawa jan Lusesi. ona li ken toki insa tawa sona pona la ona li toki e pona…”

“jan Lusesi li ken ala ante e telo Amonsijato tan telo Seli!”

“taso jan ante la sona ona li pona sama sona sina.”

“a, mi tu o tawa.”

“tawa seme?”

“tawa lupa poki sina.”

” jan pona o ni ala, mi wile ala ante e pali wile sina. jan ante li wile e sina. jan Lusesi…”

“jan ante li wile ala e mi. o kama.”

“jan pona o ni ala. jan ante li wile ala e sina, taso mi la sijelo sina li ike mute. kon lupa li telo mute ike. kiwen kon ike li lon selo lupa kin.”

“taso mi o tawa. ike sijelo li suli ala. telo Amonsijato a! sina o pali e wile mi. jan Lusesi la, telo Amonsijato en telo Seli li ante ala tawa ona.”

pini toki la, jan Potunato li luka e luka mi, li len kepeken len sinpin pimeja kepeken len selo lon poka mi. ona li lawa e nasin mi tawa tomo mi.

jan anpa mi li lon ala tomo, li weka li musi tan tenpo musi. toki mi tawa ona la, mi kama ala lon tenpo pimeja la ona o weka ala tan tomo. mi sona e ni la toki mi li pona: mi lukin ala la jan ale li weka tan tomo.

mi kama jo e palisa suno tu tan poki ona, li pana e ni wan tawa jan Potunato. mi tawa e ona tawa tomo kipisi mute li kama lon lupa pi poki anpa. mi tawa lon nasin suli sike pi tawa anpa la, mi toki e ni tawa jan Potunato: wile mi la ona o pakala ala lon tawa. mi tawa mute la mi lon pini nasin, li awen lon sewi pi ma telo lon tomo anpa moli pi kulupu Monteso mi.

tawa noka ona li kama nasa. tawa la kiwen kalama pi len ona li mu.

ona li toki e ni: “poki palisa a!”

mi toki e ni: “ona li lon weka. taso, o lukin e kiwen sama len walo pipi. ona li sama suno tan selo tomo.”

sinpin ona li sinpin tawa mi la ona li lukin e mi kepeken lukin sike tu pi selo telo. telo li tan moku mute pi telo nasa.

ona li toki suli e ni: “kiwen ko, anu seme?”

mi toki e ni: “lon, kiwen ko li ken kama e kon ike a. sina mu kon tan ike sijelo lon tenpo mute seme?”

mu ona la: “a! a! a! … a! a! a! … a! a! a! … a! a! a! … a! a! a!”

jan li ken ala toki lon tenpo mute.

pini la toki ona li ni: “ni li suli ala.”

mi toki lon wile wawa e ni: “o kama. mi o weka tan ni. sijelo sina li suli. sina jan mani, li jan suli li jan pona li jan olin tawa jan mute. lon sina li pona, sama mi pi tenpo pini. jan mute li kama pilin ike tan moli sina. wile mi li suli ala mute. sina kama ike mute la mi kama tan ike. mi wile ala ni. kin la, jan Lusesi li lon…”

“o pini!” ona li awen toki e ni: “mu ike li suli ala. ona li moli ala e mi. mi moli tan ala ike ni.”

toki mi la: “lon. lon. mi wile ala monsuta e sina tan ijo pi suli ala. taso sina wile awen pona la o moku e telo nasa Meto lili. ni la kon telo li ike ala e sina.

ni la mi open e poki telo wan. ona li tan poki mute lon sewi pi ko soko.

“o moku.” mi toki e ni la mi pana e telo.

ona li lon e telo lon selo uta li lukin e ni.

ona li awen lili la ona li tawa pona e lawa tan sona. ni la kiwen kalama li mu.

toki ona la: “mi moku, tan jan moli lon poka mi.”

toki mi la: “mi kin, tan lon suli sina.”

ona li luka sin e luka mi la, mi tawa sin.

ona li toki e ni: “tomo anpa ni, li suli mute a.”

toki mi la: “kulupu Monteso a, li suli li jan mute.”

“mi weka sona e sitelen kulupu sina.”

“noka jan suli jelo, li lon ma laso. akesi linja li uta e monsi noka la noka li pakala li anpa e akesi.”

“toki pi kulupu sina li seme?”

“Neniu senpune provokas min.”

(jan li pakala e mi la ike o tawa ona)

“pona a!” ona li pini toki.

telo nasa li suno e lukin ona la kiwen kalama li mu. pilin mi kin li kama seli tan telo nasa. tawa la sinpin pi kiwen moli li lon poka la, poki sike telo mute li lon sinpin moli kin. mi tawa insa mute lon tomo linja. mi awen lili la mi luka wawa e luka ona lon tenpo ni, lon luka suli sewi.

mi toki e ni: “kiwen ike a! o lukin. ona li kama mute, li awen lon selo sewi tomo sama ko kasi. mi lon anpa pi telo linja la telo li kama tan insa kiwen. o kama. mi weka lon ken mi. ike sina…”

toki ona la: “ike li suli ala la mi awen tawa. taso open pi tawa sin la, o moku sin e telo nasa Meto.”

mi luka ala e ona li pana e telo nasa TeKa lon poki. ona li moku e ni ale lon tenpo pi esun kon wan la, lukin ona li suno sama seli. ona li kalama wawa tan musi li weka e poki tawa sewi kepeken tawa nasa la, mi sona ala e kon tawa.

mi lukin e ona tan sona ala. ona li tawa sin, li tawa pi jaki ike.

toki ona la: “sina sona ala anu seme?”

toki mi la: “mi ni ala.”

“ni la sina lon ala kulupu.”

“tan seme?”

“sina lon ala kulupu pi pali tomo”

“mi jan pi pali tomo. ni li lon.”

“sina? jan pi pali tomo? ni li ken ala lon a!”

“jan pi pali tomo.”

“sitelen ni a,” ona li toki e ni: “sitelen sijelo mi.”

“ona li ni.” mi toki e ni la mi luka e ilo pi tawa ko tan insa pi len selo.

“sina toki musi a.” ona li toki e ni la ona li tawa monsi lili. toki awen la: ” taso mi o tawa telo Amonsijato.”

“o ni.” mi toki e ni la mi len sin e ilo lon len selo li pana e luka mi la, ona li lon e sijelo suli lon luka suli mi. mi tawa sin tawa telo Amonsijato. mi tawa lon anpa pi selo lupa mute, li tawa anpa, li tawa sinpin, li tawa anpa sin, li kama lon tomo pi anpa mute. tomo la kon li jaki mute la suno mi li suno lili taso li suno seli ala.

lon weka la, tomo lili ante li lon. selo ona ale li kiwen moli mute la kiwen ni li lon tomo poki sewi kin, sama tomo pi kulupu moli pi ma tomo Pali. sinpin ona tu wan li leko pona sama tomo Pali. lon sinpin ante la jan li weka e kiwen tan sinpin la ona li lon ma sama jaki, li kama nena pi suli lili. kiwen li weka la lupa lili li lon. tawa insa la suli ona li sama suli noka tu tu. suli poka li sama suli noka tu wan. tawa sewi la suli li sama suli noka luka wan anu tu. lon pi lupa ni li tan ala wile jan, li tan sinpin kiwen lon monsi li tan palisa suli tu ni taso: palisa suli li awen e sewi tomo.

jan Potunato li sewi e palisa suno la, ona li wile lukin e insa lupa, taso ona li ken ala. suno li lili taso la pini monsi lupa li len.

mi toki e ni: “o tawa insa. telo Amonsijato li lon ni. jan Lusesi la…”

“ona li sona e ala.” jan li pini e toki mi li toki e ni la ona li tawa sinpin nasa. ni la mi tawa lon monsi poka ona. tenpo lili la ona li kama sona e pini lupa. tawa ona li pini tan kiwen la, ona li awen tan pilin nasa tan sona ala. tenpo poka kama la mi awen e ona lon sinpin kiwen kepeken ni: kiwen wawa awen tu li lon sinpin li lon poka ante la, suli pi weka ona tan kiwen ante li sama suli noka tu. linja kiwen lili li kama tan kiwen awen wan. ilo awen pi ilo open li lon kiwen awen ante. mi sike e linja lon sijelo ona la mi awen e ona kepeken tenpo lili. ona li sona ala e kama ni la ona li ken ala pini e pali mi. mi weka e ilo open li weka tan lupa lili.

mi toki e ni: “o luka e sinpin la, sina ken sona e kiwen ko lon ni. ona li telo mute a. mi o toki sin e ni: sina o weka. wile ala a anu seme? ni la mi o weka ala e sina tan ma ni. taso mi wile toki sitelen e ijo ale ma kepeken ken ale mi.”

“telo Amonsijato a!” jan li awen pilin nasa la ona li toki e ni.

“a.” mi toki e ni tu: “telo Amonsijato.”

mi toki la mi pali mute lon kiwen moli. kiwen ni li weka la kiwen leko en ko pi pali sinpin li kama len ala. kepeken ni kepeken ilo pali mi la, mi sinpin e open lupa lon wawa mi.

linja sinpin nanpa wan li pini ala la nasa mute pi jan Potunato li weka. mi kama sona e ni tan ni: mu lili pi tenpo suli li kama tan lupa. mu li tan ala jan pi lawa nasa. mu pini la kalama ike ala li lon tenpo suli. mi pana e linja sinpin nanpa tu lon sewi pi linja ante, e linja nanpa tu wan, e linja ante. pali pi linja ni li pini la mi kute e kalama wawa tan linja kiwen. kalama li lon tenpo mute. mi wile kute e ona tawa pilin pona la mi pini e pali mi li awen lon sewi pi kiwen moli. kalama li pini la mi pali sin. mi wile ala awen mute la mi pali e linja sinpin nanpa luka, e linja ante, e linja ante ante. ni la supa sinpin li kama lon sijelo sewi mi. mi pini sin e pali. mi lon e suno lon sewi sinpin la mi ken suno lili taso e selo jan insa.

kalama suli mute li kama wawa tan uta pi jan awen sama soweli lili la ona li tawa monsi wawa e mi. tenpo lili la mi awen tan pilin… mi tawa lete tan pilin monsuta. mi luka e palisa utala mi, li tawa e ona lon selo pi lupa lili sinpin tan wile utala, taso mi sona sin e ijo lon la pilin ike li weka. mi luka e selo pi tomo ni la mi pilin pona tan pali mi. mi kama sin tawa sinpin pali. mi toki tawa kalama jan. mi kalama sama e kalama ona. mi mute e kalama. suli kalama en wawa la kalama mi li suli tawa ona. mi ni la kalama ona li pini.

mun li lon sewi ale la, pali mi li kama pini. linja sinpin nanpa luka tu wan, en linja ante wan, en linja ante tu li kama lon. mi pali mute e linja nanpa pini la leko wan taso li lon ala sinpin. tawa ona li wile e wawa mute mi. mi kama lon e ona, taso mu musi sama soweli suli li kama tan lupa la linja lawa mi li sama palisa tan ni. pini mu la toki pi kalama ike li kama. mi la toki li sama ala mute toki pi jan suli Potunato. toki li ni:

“a! a! a!… e! e! e!… ni li pali musi a, li musi mute. mi en sina o musi mute tan ni lon tomo sina… a a a… lon moku pi telo mi… a a a”

mi toki e ni: “telo Amonsijato a!”

“a a a… a a a… lon a, telo Amonsijato. taso tenpo mute li tawa. jan li wile e mi tu lon tomo anu seme… meli Potunato en jan ante a. mi tu o tawa”

mi toki e ni: “lon. mi o tawa.”

“tan nimi pi jan sewi a, jan Monteso o!”

“lon!” mi toki e ni tu: “tan nimi sewi a!”

mi toki la mi kute ala e toki ante. mi wile ala awen tan ni la mi toki wawa e ni:

“jan Potunato o!”

toki ante li kama ala. mi toki sin e ni:

“jan Potunato a…”

toki ante li awen kama ala. mi pana e suno tawa lupa sinpin. ona li tawa lupa la kiwen kalama taso li mu. mi pilin ike tan kon telo tomo la mi pini e pali lon tenpo lili. mi pana e kiwen leko tawa lupa ona, li awen e ona kepeken ko. lon sinpin sin la mi lon sin e kiwen moli mute. lon tenpo sike MMLL la jan ala li tawa e ni. Ripozu en paco!

(o moli pona!)