ijo sin pi lipu Wikipesija

lipu tenpo nanpa pan la, mi jan Alonola li toki e sona pi lipu Wikipesija. tenpo ni la, lipu Wikipesija li sin ala. tenpo sike pini tu (2021) la, ona li kama lon. sina ken lukin e ona kepeken nimi linluwi¹ ni: https://wikipesija.org.

open la, lipu Wikipesija li kama lon tan ni: lipu Wikija anu lipu Panton lon tenpo ni (Wikia, Fandom) li ike tawa jan pi toki pona. kin la, lipu Wikipesija li lon tan kulupu ISO. tenpo pini la, kulupu ISO li toki e ni: toki pona li toki lon ala. taso tenpo ni la ona li toki lon. toki pona li kama jo e nimi lili “tok”. lipu lawa pi nimi lili la, jan li toki e sona pi lipu Wikipesija.²

jan mute li pali tawa lipu Wikipesija. suli la, jan Tepo li open e lipu Wikipesija. kin la, jan ni li pali mute (ante >500) tawa ona: jan Musi, en jan Tepo, en jan Jolan, en jan Ne, en jan Kita, en jan Ke Tami, en jan Tansin li pali.

lipu Wikipesija li kama suli li jo e lipu pi mute 1907. lipu mute li toki e ilo, e jan, e kulupu, e ma, e musi, e nasin, e sona, e toki, e tenpo pini. suli la, lipu pi lipu tenpo li lon lipu Wikipesija! ken la, sina ken lukin e ona anu suli e ona!

ken la, sina sona e lipu Linku. lipu Linku li pona mute tawa kon nimi. lipu Wikipesija la, lipu nimi li lon kin! lipu nimi ni li toki e kon nimi, e sona ante pi nimi ni. taso lipu nimi li lili. lipu suli li pona tawa mi. nasa la, lipu pi toki pona li lili!

mi jan Juwan. mi mu. lipu Wikipesija li pona tawa ni tan ni: mi jo e mani lili li ken ala kama jo e lipu pu, e lipu ku, e lipu mute. lipu Wikipesija li lipu pi kama sona tawa mi. mi wile kama sona e ni: jan li nimi seme e ijo ni? lipu ale ala li pona. taso, ni li ike ala. mi pona e lipu ni.

lipu mute lon lipu Wikipesija li lili. sina ken pona e ona. sina wile pali la, nasin mute li lon:

• sina ken pali e lipu sin.
• sina ken pana e sona sin sina tawa lipu.
• sina ken pona e nasin toki lon lipu.

sina wile toki tawa jan pi pali lipu la o tawa ma pali pi toki pona lon ilo Siko: https://discord.gg/PrVVDEDanU.

sona namako la, lipu Wikipesija li lipu Wiki kepeken toki pona. taso, ni li lon kin: lipu “sona pona” li lipu Wiki pi toki pona kepeken toki Inli. sina ken ala anu ken lili toki kepeken toki pona la, sina ken tawa ona! ona la, nasin toki, en nasin nanpa, en nasin sitelen, en sona nasa li lon! o tawa nasin linluwi ni: https://sona.pona.la/.