Details
Edit on Github
Description: len pi jan Linan li pakala.
Tags: fan fiction
Sources: archiveofourown.org
Archives: web.archive.org
Notes: mi nasin Markdown e lipu open pi nasin HTML lipu open la sitelen `\n` mute li poka li lon e weka suli · nasin Markdown la ni li ken ala
len
jan Linan li lukin e len seli ona.
“a. ike.” ona li pilin ike.
len ona li pakala. len ni li suli tenpo. tenpo li tawa la, ijo ale li pakala. tenpo mute la, ni li ike ala.
taso, len seli ni li nanpa wan tawa jan Linan. ona li olin e len ni.
jan Linan li luka e len. lupa suli li lon. lupa suli o lon ala. ona li tawa awen lon ilo awen suli.
tenpo li tawa. ilo lupa li open. jan Jon li lon.
jan Jon li toki, “jan Linan o! toki a! sina pilin seme?”
jan Linan li lukin e ona, “toki.”
“..seme a? sina toki e nimi ‘toki’ taso.” oko ona li pini li open, “sina pilin pona anu seme?”
jan Linan li toki, “a. pona, pona. mi pilin pona.”
“sina toki ala toki e toki lon? sinpin sina li toki ante.”
“mi toki l–”
“a! luka sina li jo e ijo…” jan Jon li lukin. “ijo ni li len seli sina.” ona li lukin pona. “a, lupa li lon.”
“lon.”
tenpo ni la, jan Jon li jo e len ni. “sina pilin ike tan ni anu seme?”
“mi toki ala e ni.”
“mi sona. taso, sijelo sina li toki e ni.”
jan Linan li kon, “awen la, mi pilin pona. mi o esun e len sin–”
“ala a. mi ken pona e len ni.” jan Jon li tawa lili. ona li lukin e jan Linan. “o kama.”
“jan Linan o pana e ilo pi poki luka tawa mi.”
jan Linan li lukin e poki suli. ona li lukin e ijo lili pi kule mani walo. “sina toki e ijo ni anu seme?”
“toki. pona a.” jan Jon li len e ilo ni. ni la, jan Jon li jo e linja len e ilo pi len linja.
jan Linan li toki musi, “o pakala ala e sina.”
jan Jon li mu musi lili, “mi sona e ni a!” kepeken nasin tenpo la, ona kepeken ilo ni tawa len seli pi jan Linan.
tenpo li tawa. tenpo li tawa. tenpo li tawa..
“sina ken ala ken pali kepeken tenpo lili?”
jan Jon li lukin e ona. “ken ala.” uta ona li tawa sewi, “a, mama mi li pana sona e wawa pi pona len tawa mi. taso, ona li ken pona kepeken tenpo lili. mi ken ala. o pana e tenpo tawa mi”
“mi pana, mi pana.” jan Linan li toki. “…pilin mi la, mama sina li mama pona.”
uta pi jan Jon li sewi. “lon a.”
tenpo li tawa.
“…mi pini a!” jan Jon li toki. ona li pana e len. “o len.”
jan Linan li len e ona. “a. ni li pona. pona a.”
“ala. mi o toki e ni.”
oko pi jan Linan li open suli, “tan seme a?”
jan Jon li kon, “sina pilin pona. ni la, mi pilin pona. ni li pona ale.”
jan Linan li mu musi suli, “jan Jon o, sina jan pi olin suli a….”
jan Jon en jan Linan li luka olin.