Details
Edit on Github
Description: kalama ni la, jan Luke en jan Ke Tami li toki e musi. musi pi nasin seme? lon ilo, lon tomo, lon kulupu, lon nasin mute. o kute pona!
License: CC-BY-SA 4.0
Sources: www.youtube.com
Notes: Transcribed by kala Asi.
musi
jan Luke:
toki a, jan ale o. tenpo ni la mi tu li toki e musi.
ni li jan Ke Tami. o toki.
jan Ke Tami:
toki a!
jan Luke:
lon. mi jan Luke, li mije Luke. sina sona e nimi ante anu seme.
taso tenpo ni la mi tu li toki e musi. musi seme li pona mute tawa mi tu?
jan Ke Tami:
a lon. musi seme a? taso open la nasin musi seme la mi toki? ilo anu seme?
jan Luke:
ni li ken ilo. ni li ken supa tawa. mi sona ala.
jan Ke Tami:
pona. ni la mi wile ala wile toki e musi pona pi mi tu?
jan Luke:
sina ken ni. mi sona e musi mute. pilin mi la musi mute li pona mute.
jan Ke Tami:
pona a. ni la, pilin mi la, musi ilo li lon sona pi mi tu.
ni la mi ken toki e musi ilo. taso mi sona ala e…
lon la mi sona e musi mute. taso mi kepeken ala musi mute. mi kepeken…
jan Luke:
poka la… sina ken toki.
jan Ke Tami:
mi kepeken musi lili. musi pi tenpo lili.
sina sona ala sona e musi pi nimi ni: tawa lili? toki Inli la…
jan Luke:
tawa lili mi? mi sona ala. o toki e nimi ona?
jan Ke Tami:
nimi ona pi toki Inli li “A Short Hike”.
jan Luke:
jan li toki e nimi ni. taso mi sona ala e musi ni.
jan Ke Tami:
musi la sina waso lili. sina lon ma. ma li lili.
poka ma ale la, telo li lon. ni la soweli pi mute ala li lon ma.
sina wile tawa sewi. sina wile tawa nena. nena li lon sewi mute a.
taso ni la sina wile alasa e ken tawa.
ken tawa li sama lipu len waso. sina sona ala sona?
jan Luke:
mi sona.
jan Ke Tami:
pona. ni li musi pi suwi mute. sina ken toki tawa soweli suwi.
soweli suwi li pana e toki tawa sina. sina wile alasa e ijo musi,
e ijo nasa. ni la sina ken kama tawa.
jan Luke:
lon. musi lon li pona mute. ken la mi kama jo e musi ni.
ona li wile e mani seme? mi sona ala. ken la mi lukin e ni lon tenpo kama.
jan Luke (li pona e sona):
mi pali kalama lon kalama ni la mi wile toki e ni:
ona li wile e mani luka tu wan lon ma Mewika.
jan Luke:
taso musi ante. mi o toki e musi. tenpo poka la jan pona mi li wile e ni:
mi musi e musi sike lon poka ona. ni la mi kama ni:
mi kama musi lon poka ona, li musi e musi sike.
musi mute li kepeken sike anu seme. mi o toki e sona suli pi musi ni.
jan Ke Tami:
sike seme?
jan Luke:
sike ni li loje. ona li sama luka mi. ona li suli sama luka mi anu seme.
ona o lon lupa. sina o pana e ona tawa lupa. lupa li lon sewi.
jan Ke Tami:
a.
jan Luke:
tenpo mute la jan li lukin e musi ni, li toki e kulupu, li lukin e kulupu.
sina sona ala sona? tenpo mute la sina suli la sina pona mute lon musi ni.
mi suli a. ni la mi pona mute lon… mi pona ike. mi ike a.
taso ni li tan ni: mi sin. mi sin a lon musi ni.
jan Ke Tami:
a. sona. pilin la mi pona ala lon ona.
jan Luke:
mi ike a lon ona. taso mi kama pona. tenpo kama la mi ken pona mute.
jan Ke Tami:
pona a.
jan Luke:
ni la sina musi e musi seme ante?
jan Ke Tami:
musi ante li ni: mi tawa kulupu musi. kulupu musi la ona li jo e musi supa mute. sina sona e musi supa la ona li jo e musi supa ni. taso ona li jo e musi supa sin kin. musi wan li ni: sina kama jo e lipu. lipu la sina ken lukin e waso anu kasi. waso li wile lon kasi. sina pana e kasi la sina wile esun e lipu. pini la (sina) jo e kasi pi mute pona, e soweli pona, e waso pi pona mute. ni la sina ken nanpa e lipu sina. ni la sina ken kama sona e ni: sina nanpa ala nanpa wan lon musi?
jan Luke:
n. musi ni li nasa a lon lawa mi. sina toki e ona la lawa mi li pali mute.
jan Ke Tami:
a a. lon. nasin pi musi sin li sama ala nasin musi pi sin ala.
jan Luke:
lon. lon. tenpo poka la mi musi e musi supa utala. mi ken toki e ni: ona li lon utala. sina o utala. sina o moli e lawa. sina o moli e jan lawa. ona li mije.
jan Ke Tami:
sona a. poka wan la kiwen li walo. poka ante la kiwen li pimeja anu seme.
jan Luke:
lon lon.
jan Ke Tami:
sona sona.
jan Luke:
taso mi kama sona e ni: ni li wile e tenpo suli a, li wile e lawa suli a. ni la mi musi ala e ona lon tenpo ni.
jan Ke Tami:
sama.
jan Luke:
lon. taso mi sona e jan ante. ona li musi a e musi ni. ona li pona mute lon musi ni. taso ona li toki e ni: “o musi lon poka mi!” taso mi wile ala tan ni: ona li pona mute, li wawa a tawa mi. ni la mi sona e ni: mi kama anpa lon tenpo ale.
jan Ke Tami:
lon. sama.
jan Luke:
taso sina sona ala sona e musi? leko mute li lon ona. leko la nanpa li lon. ken la nanpa li lon ala. taso ken la, ike la, ilo pakala li lon ona. sina sona ala sona e musi ni? leko mute a li lon.
jan Ke Tami:
mi sona ala e ona!
jan Luke:
n. taso ona li lon ilo pi tenpo pini. tenpo ni la ilo mute li kepeken ala musi ni. taso tenpo weka a la, ilo li kepeken musi ni lon tenpo s- mute. sina sona ala sona?
jan Ke Tami:
“smute” anu seme?
jan Luke:
lon.
jan Ke Tami:
taso a a.
jan Luke:
taso musi ni la sina luka e ilo pakala la sina anpa. ni la sina o kama sin. leko li ken suli. mi sona ala e nanpa. taso musi ni li pona mute tawa mi.
jan Ke Tami:
pona a.
jan Luke:
ona li wile e pali lawa. ala. tenpo mute la sina ken lukin e ni: ijo mute li sama lon tenpo mute. ni la sina ken pali kepeken sona ni, li ken pali kepeken tenpo lili a.
jan Ke Tami:
taso mi sona pona ala e ona.
jan Luke:
toki Inli la… mi ken toki e ni: ona li alasa pi ilo pakala.
jan Ke Tami:
alasa pi ijo pakala.
jan Luke:
ilo pakala.
jan Ke Tami:
alasa pi ilo pakala. mi sona ala e ona.
jan Luke:
sina o alasa e ilo pakala, li wile ala luka e ona. ni li musi pi pona mute.
jan Ke Tami:
a!
jan Luke:
taso sina toki… o toki.
jan Ke Tami:
o awen toki. o awen toki.
jan Luke:
tenpo pini la mi wile toki e ni: sina toki ala toki e musi ante?
jan Ke Tami:
a. lon tenpo pini la mi toki a e musi ante. taso mi ken toki e musi sin. sina wile la mi ken.
jan Luke:
o toki.
jan Ke Tami:
lon. lon. nanpa tenpo mi li kama suli. mi tenpo li awen kama la lon mi li tenpo suli, li suli tenpo. ni la mi kama sike sin e suno. ma ni li sike sin e suno la…
jan Luke:
lon.
jan Ke Tami:
nanpa mi li kama suli.
jan Luke:
mi sona.
jan Ke Tami:
kulupu mi la ni li suli. ni la ona li wile kama kulupu. ona li wile musi. ona li wile pana e moku mute. ona li wile moku mute. taso musi seme li pona? ni li kama ijo alasa suli lon tenpo ale. taso tenpo kama la, ijo musi wan li lon wile. mi ale li wile tawa tomo. tomo la jan li pini e lupa. mi ken ala open e lupa! mi awen lon insa tomo. mi wile weka tan tomo. taso mi ken ala. mi wile open e ona. mi o alasa e ilo open. taso ilo open li lon seme? a ken la ona li lon…
jan Luke:
ona li lon weka! sina o kepeken lawa sina anu seme.
jan Ke Tami:
mi o kepeken lawa a! ni la mi o pana e nimi pona tawa poki! taso nimi poki li lon seme? ni la mi alasa e lipu. lipu li kepeken nasin nasa. ni la mi o kepeken, mi la mi o alasa e nasin nasa. mi alasa mute.
jan Luke:
lon.
jan Ke Tami:
ni la… mi kepeken ona lon lupa, li ken open e ona. ni la ale li pona. ni li wile e tenpo lili. mi kepeken ala tenpo lili la mi ike lon musi.
jan Luke:
lon. tenpo weka la mi ni lon poka pi kulupu ma mi. tenpo lili weka la mi ale li kama anpa li pini ala. taso ona li toki e nasin. ni la mi sona e nasin. mi weka sona e nasin lon tenpo ni. taso ona li nasa mute. tenpo ona la mi kepeken lawa ala. mi kepeken lawa ala lon tenpo mute. ona li wile e ni: “o lukin e ijo ni!” taso mi lukin ala e ijo la mi toki e ijo mute tawa ona. mi toki e nanpa mute, li kepeken nanpa mute. ni la nanpa wan o pona anu seme.
jan Ke Tami:
lon. ni li ken. nasin mute li ken. taso nasin wan taso li lon, o lon.
jan Luke:
lon.
jan Ke Tami:
taso suli la ijo wan li musi tawa mi. alasa ni la sina wile ala weka taso. ijo ante kin li lon. toki li lon. nasin toki li lon. sina kama sona e tenpo pi tomo ni. sina kama sona e jan pi tenpo pini. sina kama sona e…
jan Luke:
lon.
jan Ke Tami:
…e ijo pi tomo ni. sina kama sona mute. ni li ken musi tawa mi. ni li musi taso ala. ni li toki kin.
jan Luke:
sona mi la tomo alasa mi li lon tenpo pi ilo waso. ona li pana e ilo waso tawa sewi, li wile tawa mun.
jan Ke Tami:
a. pona a. taso ni la sina kama lon tomo la sina kama ala kama wile tawa mun?
jan Luke:
ala.
jan Ke Tami:
a seme li kama? ilo li pakala anu seme?
jan Luke:
lon. ona li pakala. ni la kulupu mi o pona e ilo, o kama sona e sona nasa. tan seme la ilo ni li wile e sona ni?
jan Ke Tami:
tan ni: sina taso li lon. jan ale li lon ala li kama pakala! taso sina lon. ni la sina ken pona e ilo.
jan Luke:
ni la lipu nasa li lon poki, li lon poki pi sona ala. ni la mi o alasa e ona.
jan Ke Tami:
lon.
jan Luke:
ni li nasin ona. taso musi ante. tenpo poka la ala. taso open pi tenpo sike ni la mi kama musi e musi pi esun moli. esun moli li… mi o e nimi ona lon toki Inli: “Lethal Company”.
jan Ke Tami:
a. mi kute e nimi. taso mi sona ala e ona.
jan Luke:
ona li pona mute. mi o toki e ona kepeken toki pona ni. ni li nasa lili tawa mi. sina lon pali ni la sina o pali lon pali. taso pali sina li nasa lili. esun li nasa. pali sina la sina o lukin e ijo. sina o kama jo e ijo, o pana e ijo tawa esun. ni la sina kama jo e mani. taso pali sina li lon tenpo. mi ken toki e ni: tenpo kon wan taso.
jan Ke Tami:
a. sina wile moku e kon anu seme.
jan Luke:
ala ala. taso sina kama jo e ijo. tenpo mute la ona li ijo jaki. ona li ijo pi tenpo weka, li pakala lili. taso sina kama jo e ona, o pana e ona tawa esun. taso sina pana ala e mani wile. ona li wile e ni: sina kama jo e mani ni. taso sina pana ala e mani wile la, mi toki e ni: a sina weka. mi o weka e sina. taso sina lon ilo sewi. ni li ilo waso. ona li lon sewi a, li lon, li tawa mun. taso sina pakala la ona li toki e ni: a. o weka. mi o tawa e sina. ni la sina tawa mun. sina tawa kon. sina tawa kon ala. ona li ala kon.
jan Ke Tami:
a. lon poka mun anu seme.
jan Luke:
lon. ni la sina moli. kulupu sina o kama sin. tenpo mute la jan li musi e musi ni lon kulupu tan ni: sina o musi lon taso la musi li musi ala. taso sina musi lon poka pi jan mute la ona li musi a.
jan Ke Tami:
taso ni la esun li ike.
jan Luke:
esun li ike. mi ken toki e ni: esun li ike.
jan Ke Tami:
taso sina ken ala ken utala e esun lon musi?
jan Luke:
sina ken ala. esun li nasa. ona li pali e… ona li kala anu seme. mi ken toki e ni: ona li kala. ona li pali e kala nasa, li wile pakala e ijo tan ni: ona li moku e ijo ale. ona li lupa pimeja. ni la esun li wile e ni: sina pana e ijo tawa ona. ni la ona li moku ala e jan ale anu seme.
jan Ke Tami:
a nasa. ike mute a!
jan Luke:
lon. ni la ona li nasa lili. tenpo mute la ona li toki e ni: esun. taso mi sona ala e esun, li toki e ni: “esun. esun. esun. esun.” taso ona li toki ala e ni: esun li seme?
jan Ke Tami:
ni la sona ala e ni: ona o pana e ijo seme tawa esun?
jan Luke:
lon. ala ala. sina sona e ni: mi o pana e ijo jaki tawa esun. ijo jaki li pona mute tawa esun. taso sina o kama jo e ni. taso ni li wile e pali mute tan ni: soweli li lon mun. sina wile kama alasa e ijo la sina o tawa lon insa tomo. tenpo mute la mani mute a li lon insa tomo. ni la sina o kama jo e ona. ijo mute li lon. taso tenpo mute la soweli ike li lon. ona li lon ma. ona li lon mun. ona li ken ala lukin, li ken kute taso. taso ona li kute e sina la sina kama moli tan ni: ona li moli e sina.
jan Ke Tami:
taso ni li musi kulupu anu seme?
jan Luke:
ni li musi kulupu.
jan Ke Tami:
kulupu li ken…
jan Luke:
o toki.
jan Ke Tami:
kulupu li ken suli seme?
jan Luke:
ona li ken suli tu tu. taso sina kepeken namako la ona li ken suli pi wile sina.
jan Ke Tami:
a. sona. taso sina kulupu suli la sina wile kepeken musi seme?
jan Luke:
kepeken musi seme? sina toki e seme?
jan Ke Tami:
kulupu li sama luka luka la sina kama sona e ni: a mi ken ala awen kepeken musi ni. musi ni la jan tu tu taso li ken lon. ni la sina wile kama kepeken musi sin. taso musi seme li pona tawa ni? musi seme li ken jo e jan mute?
jan Luke:
a. mi toki e ni. jan li kepeken namako. namako ni la jan pi wile jan li ken lon. ona li ken lon. nanpa li ken suli. taso ni li lon ala musi pi ante ala. ona li lon musi namako.
jan Ke Tami:
pona. mi kulupu suli la mi wile e seme? mi wile e musi pi soweli ike. sina ken sona e ona. mi sona ala. taso sina ken. ona la mi kulupu. taso jan tu li kama soweli lon tenpo pimeja, lon tenpo lape.
jan Luke:
a mi sona e ni. ona li toki e ni lon kalama sin pi tenpo suno pi toki pona.
jan Ke Tami:
a lon! ni li kama weka tan sona! taso ni li lon. jan ante li toki e ni.
jan Luke:
lon. jan Deni li toki e ni.
jan Ke Tami:
n. ni li pona tawa…
jan Luke:
lon. o toki.
jan Ke Tami:
n. ni li pona tawa kulupu suli.
jan Luke:
lon. ni li pona mute. ala. mi ken ala toki e ni. taso sona pilin mi la ona li pona. taso mi musi ala e ona.
jan Ke Tami:
a. ni la sina ken kama sona.
jan Luke:
mi ken kama sona lon tenpo kama. taso pilin mi la musi ni li sama musi “Among Us” anu seme?
jan Ke Tami:
lon la nasin sama li ken lon. taso ona li sama ale ala.
jan Luke:
n. taso sina o alasa e jan ike anu seme?
jan Ke Tami:
sina o ni.
jan Luke:
lon. ni la ona li sama lili. ona li sama lon ijo lili.
jan Ke Tami:
lon. kulupu musi sama li lon. ona li ken jo e nimi mute. taso ona ale li kepeken nasin sama a. jan ike li lon kulupu. ona li mute ala. ona li ken sama tu, anu tu wan. ni la kulupu li luka tu wan, li ken sama luka luka. ni la ale o alasa e jan ike. taso jan ike kin li alasa e jan pi ike ala. ni la seme li kama nanpa wan?
jan Luke:
lon. taso sina sona ala sona e musi ante? sina sona ala e musi ante la mi tu li ken pini toki. taso sina wile toki la sina ken toki.
jan Ke Tami:
mi sona e nasin musi mute. taso mi (wile) ala toki.
jan Luke:
ni li wile e tenpo mute anu seme.
jan Ke Tami:
lon. ale toki li wile e ale tenpo.
jan Luke:
lon.
jan Ke Tami:
lon la ijo wan li suli tawa mi. mi wile kama sona pali e musi sin.
jan Luke:
a. tenpo ni la mi pali e musi sin.
jan Ke Tami:
a! ni li pona. musi pi nasin seme?
jan Luke:
mi toki e nasin lon tenpo pini. taso ona li alasa pi ilo pakala. taso ona li ante. jan li lon. toki li lon. sina o lukin e toki. sina sona ala sona e nasin pi musi ni?
jan Ke Tami:
sona ala.
jan Luke:
ona li ante mute tawa musi pi alasa pi ilo pakala.
jan Ke Tami:
taso ona li lon ilo anu seme?
jan Luke:
ona li lon ilo. lon.
jan Ke Tami:
mi wile kama sona pali e musi pi ilo ala, e musi supa.
jan Luke:
a.
jan Ke Tami:
…e musi lipu, anu ijo sama.
jan Luke:
ni la o jo e lipu anu seme.
jan Ke Tami:
mi jo e lipu. ni li pakala ala!
jan Luke:
lon. pona.
jan Ke Tami:
taso mi sona ala e nasin!
jan Luke:
ken la sina pali e musi ike, li pona e ona kepeken tenpo anu seme, kepeken musi.
jan Ke Tami:
ken. mi wile.
jan Luke:
pona. taso sina ken ilo e ona. sina ken pali e ona lon ilo. ilo pona li ken “Godot Engine”. ilo ni li pona mute tawa mi. mi pali e musi kepeken ni.
jan Ke Tami:
a. taso ni li wile e sona. mi jo ala e sona.
jan Luke:
a. taso mi tu o pini anu seme?
jan Ke Tami:
a. ni li tenpo pona tawa pini. ni la mi ken pini.
jan Luke:
a. o awen pona, jan ale o.
jan Ke Tami:
o awen pona a!