Details
Edit on Github
Description: tenpo sike #2023 la tenpo seli la ma Netelan la ma tomo Mase la jan mute pi toki pona li tawa ni li kama kulupu suli. kalama sin ni la, jan Ke Tami li toki tawa jan kulupu li kute e ni: kulupu li seme tawa jan? jan Ke Tami en jan Masine en jan Nikilase en jan Palu en jan Lanke en jan Kasape en jan Mikali en jan Aleko en jan Sonatan en jan Simiman en jan Simo en jan Masije en jan Luna en jan Molisi li toki. mute wawa! o kute pona!
License: CC-BY-SA 4.0
Sources: www.youtube.com docs.google.com
ma Mase
jan Ke Tami:
toki
jan Masine:
toki
jan Nikilase:
toki
jan Palu:
toki
jan Lanke:
toki
jan Kasape:
mi kama toki
jan Mikali:
toki
jan Aleko:
toki
jan Sonatan:
toki
jan Simiman:
toki a
jan Simo:
toki
jan Masije:
toki
jan Luna:
toki
jan Molisi:
toki a
[kalama open]
jan Ke Tami:
mu. mi jan Ke Tami.
a, tenpo li awen tawa. lon tenpo ante la mi pana e toki pi tenpo kulupu tawa kute sina. sina wile ala wile kute e tenpo kulupu sin? wile la o awen kute!
kulupu pi ma Elopa li tawa ma Mase. ma Mase li lon ma suli Netalan, li lon poka pi ma suli ante Tosi, li lon poka pi ma suli Pesike. ma ni tu wan li kama wan la mi kulupu li kama lukin e ma pi wan ni. ma Mase kin la mi kama lukin e ijo mute, mi lon anpa ma lon lupa suli pimeja, mi kama sona e tenpo lon poka pi tomo mute, taso suli la mi kulupu. mi musi mute, mi toki mute, mi kama sona e jan poka, mi kute e kalama, a pona mute li lon.
taso ni ale kin li lon tenpo weka. ni ale o kama sin. mi o kulupu sin lon ma wan. tenpo poka la mi tawa ma Pelin. ma Pelin li ma lawa lon ma suli Tosi. mi pilin pi pona wawa tawa tenpo kulupu sin.
taso awen la, o kute e kalama pi tenpo kulupu pini
jan Ke Tami:
nimi sina li seme?
jan Masine:
nimi mi li jan Masine
jan Nikilase:
mi jan Nikilase
jan Palu:
mi jan Palu
jan Lanke:
mi jan Lanke
jan Kasape:
mi jan Kasape
jan Mikali:
mi jan Mikali
jan Aleko:
mi jan Aleko
jan Sonatan:
mi jan Sonatan
jan Simiman:
mi jan Simiman
jan Simo:
mi jan Simo
jan Masije:
mi jan Masije
jan Luna:
mi jan Luna
jan Molisi:
a nimi mi li Molisi, anu, mi jan Molisi
jan Ke Tami:
sina tan tomo sina tawa ma ni la, tawa li suli ala suli? tawa li wile ala wile e tenpo mute?
jan Masine:
a, tawa li wile e tenpo mute, taso mi mute li lon ma Netalan, tenpo ni la, taso tomo tawa linja li wile e tenpo mute. ni li nasa tawa mi
jan Nikilase:
mi pilin e ni: ona li wile e tenpo mute. ni li tan ni: tomo mi li tawa, taso mi insa ala tomo, ni la mi wile awen
jan Palu:
ni li suli, li wile e tenpo mute
jan Lanke:
tomo mi li lon ma ni, lon ma Netalan. tawa ma ni li lili taso. ilo tenpo li toki e nanpa tu wan tan tenpo tawa mi
jan Kasape:
ona li suli, taso mi oko e lipu la tenpo suli li kama lili tawa pilin mi, kin, mi toki tawa jan lon tomo, ni kin li lili e tenpo
jan Mikali:
wile ala, mi tawa kepeken tomo tawa waso, li wile e tenpo lili
jan Aleko:
ni li wile e tenpo mute a. mi kama tan ma Kanse. mi kama kepeken ilo tawa kulupu. taso ale li pona
jan Sonatan:
tawa li suli meso. pilin mi la, ona li wile e tenpo suli tu wan. ni la ale li pona tawa mi.
jan Simiman:
ona li wile e tenpo ilo luka. mi la ni li suli, taso jan ante la ni li lili anu seme
jan Simo:
pilin mi la ona li suli lili
jan Masije:
mi tan ma Alan. tan la tawa mi li suli. mi kepeken tomo waso kepeken tomo tawa linja. taso ale li pona. tawa li pona
jan Luna:
ni li wile e tenpo mute a. tomo tawa linja mi li pakala lili li kama weka. tan ni la ni li wile e tenpo mute a
jan Molisi:
a mi o toki e meso. mi tan ma tomo Kasuje. mi ken toki e nimi. mi wile ala len e sona ni tan jan ante. taso mi tawa ni la ona li awen tenpo ilu tu tu anu luka. tenpo suno ni la mi tawa weka la ona li awen tenpo ilo luka wan. meso. meso tawa mi.
jan Ke Tami:
sina kama toki pona lon kulupu ni la sina toki pi mute seme
jan Masine:
mi toki pi mute mute. kulupu ni li musi li nasa. mi mute li toki pi mute
jan Nikilase:
tenpo suno nanpa wan la mi toki pona ale lon tenpo ale. mi toki pona mute
jan Palu:
lili. lili mute. mi toki ala tawa jan ante.
[jan poka: toki. toki!]
jan Lanke:
tenpo mute la mi toki kepeken e sitelen taso. taso tenpo ni, ni li tenpo nanpa wan mi pi toki kepeken uta kepeken kute taso. ni li ike wawa tawa mi a a. pilin mi la ni li sin mute
jan Kasape:
mi toki lon tenpo ale. mi wile toki lon tenpo ale. ni li pona e pilin mi
jan Mikali:
mi toki e mute ala e lili ala. taso tenpo ale la mi toki mute ala.
jan Aleko:
a mi toki lili, taso mi toki lili lon tenpo ale. mi jan pi toki lili
jan Sonatan:
mi toki mute mute. tenpo ante la mi toki uta ala e toki pona, taso tenpo ni li tenpo pi toki uta pi toki pona. ni li pona mute. pilin mi la mi toki mute a
jan Simo:
lon ma ni anu seme? pilin mi la mi toki mute
jan Masije:
mi pilin e ni: mi toki mute. tan tenpo ale la mi toki lili, mi toki ala. tenpo ni la mi toki mute. mute a, a a
jan Luna:
mi toki mute. tenpo ale ala, taso mi toki mute
jan Molisi:
pilin mi la mi toki mute a a a. mi toki mute a. tenpo ale la mi wile toki e ijo. taso, ken la ijo li suli ala. taso mi awen toki lon tenpo ale a a
jan Ke Tami:
o toki e ma tomo Mase ni. ma ni li seme tawa pilin sina?
jan Masine:
a ma ni li pona tawa mi tan ni: ma li ante pi ma mute lon ma Netalan. pilin mi li ni li ma ante. jan pi ma tomo ni li pona. ma li pona. ma li jo e nena. ni li nasa tawa mi a a
jan Nikilase:
ma li jo e telo mute tan sewi. ona li lukin pona. ona li- tomo tawa li lon, taso ma mute li lon sama ni, tomo tawa li ken ala lon ona, taso jan li ken tawa noka lon ona, li ken kepeken ilo tawa pi sike tu. ni li pona tawa mi
jan Palu:
mi sona ala e ni. mi lon ma tomo ni ala. taso, li pona, li pona tawa mi. taso mi sona lili a a
jan Lanke:
ma ni li seme tawa pilin mi?
jan Ke Tami:
ni a
jan Lanke:
mi lon ma ni lon tenpo, ni li tenpo wan tawa mi. mi lon ma ni lon tenpo lili taso. taso mi lon tomo uitala. mi lukin e ona, ona li pona tawa mi. lon tomo utala, mi ken lukin e mute tan ma ni. lukin li pona
jan Kasape:
pilin mi li wawa ala tawa ma ni. mi lon ala ona lon tenpo ante. tan ni la mi sona lili e ona. taso kulupu li toki pona lon ma ni. tan ni la kulupu li pona. taso mi ken ala toki mute e ma ni. mi sona lili taso.
jan Mikali:
ona li pona mute, loi pona lukin, li pali e kalama lili
jan Aleko:
ma Mase li pona lukin mute a, li sama lukin e ma tomo Antepe lon ma suli Pesike. jan pi ma Mase li pona, jan pi tomo lape Pote li pona kin. kon li nasa. telo mute li kama tan sewi. suno mute li lon kin la ni li pona.
jan Sonatan:
mi pilin pona tawa ma tomo Mase. tomo ona li pona lukin a. ma kasi ona li pona kin. ona li majuna a. ni la ma tomo li jo e tomo majuna li jo e ijo pi tenpo pini. ijo ni li suli mute tawa mi
jan Simiman:
a. pilin mi la ona li pona a. pona ni li tan tenpo ona. ona li lon tenpo suli la ale li pona tawa lukin
jan Simo:
ma Mase li pona mute tawa mi. tomo suwi li lon. jan ale li pona. pilin mi la pona nanpa wan li kulupu pi toki pona.
jan Masije:
tomo ni, tomo Mase li pona mute tawa mi. ale li pona lukin. tomo li pona lukin. jan li pona kin a a
jan Luna:
ni li pona, li pona mute. taso ijo tu li ike lili tawa mi. ni li, telo mute li kama anpa, telo mute mute, tan ni la mi kama telo lili. nanpa tu li, jaki soweli li lon ma ale a a a a. lon. taso ante la li pona mute tawa mi
jan Molisi:
ona li pona lukin a. pilin mi la ale pi ma Netalan li pona tawa jan pi tawa noka li pona a tawa jan pi ilo tawa noka. ni li pona a tawa mi. lon. nasin tawa tu ni li pona mute tawa mi. ante la kasi mute li lon, telo mute li lon, telo ma li pona lukin. ma tomo li suli ala, ona li meso. ni kin li pona tawa mi. nasin li pona
jan Ke Tami:
tenpo kulupu la seme li pana e musi tawa pilin sina.
jan Masine:
toki tawa jan ante kepeken toki pona en mi mute li tawa tomo pi sitelen tawa. ni li musi. mi mute li lukin e sitelen tawa pi meli Papi. ni li pona.
jan Nikilase:
e musi? jan ante li pana e musi mute, mi ale li toki nasa mute, ni li musi mute tawa mi. sina pali e musi. musi li jo e lipu li jo e toki e sitelen mute, musi ni li pona tawa mi. sitelen tawa, mi lukin e sitelen tawa la, ni li musi tawa mi kin. ni li musi ale
jan Palu:
jan mute li lon. jan mute li lon mi. insa mi la mi kama toki e ni: ken la jan luka luka li kama. taso mi sona e ni, taso mi lukin e jan, ken la ni li luka luka luka luka anu seme? ni li musi li pona
jan Lanke:
mi lon kulupu lon tenpo lili taso, taso jan li pona tawa mi. jan li wile toki tawa mi, jan li ike ala, ni li pona
jan Kasape:
a, toki li musi a tawa mi. tan ni la mi toki mute. taso mi pali lili mute la ni kin li pona. taso suli la toki li musi tawa mi
jan Mikali:
toki pona li pana e musi mute. jan ante kin li pana e musi mute
jan Aleko:
kulupu li musi. kulupu li musi mute. toki pona la tenpo mute la jan li toki kepeken ilo kepeken ilo toki kepeken ilo nanpa. mi pilin pona tan ni: mi ken toki kepeken toki pona kepeken uta mi
jan Sonatan:
tenpo pini la, tenpo sike pini la, mi lon ma tomo Win kin. ona la, mi kulupu lon poka pi jan mute pi toki pona kin. ni la tenpo ni la jan mute pi tenpo pini li lon kin, ni la mi ken toki kin e ona. ni li musi mute e mi. kin la mi ale li tawa mute lon ma tomo Mase li moku pona li tawa lupa lon anpa pi ma tomo Wa, ni ale li musi mute tawa mi.
jan Simiman:
tenpo pimeja pini la kulupu li toki lon kasi. ni li musi a tawa mi
jan Simo:
toki li pona. jan ale li toki, jan ale li kute, ale li toki pona, ni li nasa, ni li musi mute
jan Masije:
tenpo mute li pana e musi tawa mi, taso mi pilin e ni: musi supa li pana e musi mute tawa mi
jan Luna:
ale li pona tawa mi. jan mute li lon. mi ken toki tawa ona. mi musi mute. ale li pona
jan Molisi:
ijo mute li pana e musi tawa mi. taso pilin mi la nanpa wan li sona ni: mi lon kulupu, kulupu ni la jan mute li toki kepeken toki pona. mi ken toki e ijo kepeken toki pona la jan ante li kama sona. mi toki e ijo pi musi tawa jan pi toki pona la jan ante li kama toki e a a a. ni li wawa tawa mi a a a. tenpo ala la ni li kama lon ma tomo Kasuje anu seme
jan Ke Tami:
pona. ni li pini. ante la sina wile toki e ijo ante la sina ken. taso ni li ale lon lipu mi.
jan Simiman:
a. mi ken toki e ijo. jan ale pi ma Elopa o kama lon tenpo kulupu lon sike suno kama
jan Ke Tami:
pona. ni li pini toki