kala sewi Takon

mi sitelen e ni la lawa mi li kama anpa. tenpo pimeja ni la mi moli. mi jo ala e mani li moku e ilo nasa ale mi. ona li weka la mi ken ala awen lon tenpo ike ni. mi wile tawa anpa e mi tan lupa ni tawa nasin jaki anpa. wile mi pi ilo nasa li tan ala wawa ala pi lawa mi. sina lukin e lipu ni la sina ken pilin. taso sina ken ala sona e tan ni: mi o sona ala anu moli.

mi lon tomo tawa telo suli lon telo open suli pi telo suli Pasipi la tomo tawa mi li kama anpa tan tomo tawa telo utala pi ma Tosi. tenpo ni la utala suli nanpa wan li lon tenpo open ona taso. ni la kulupu ante pi tomo tawa telo li kama ala wawa. ni la ona li pakala ala e tomo tawa mi li pona tawa kulupu pali tawa mi sama jan poki. ona li pona suli la mi ken tawa weka lon tomo tawa telo lili li jo e telo e moku tawa tenpo mute.

mi weka tan ona li ken ale la mi sona lili taso e ma poka mi. mi sona ala e sona ma la mi ken pilin taso e ni tan mun tan suno: mi lon anpa pi linja sike lon sike ma. taso mi sona ala e ma mi. mi ken ala lukin e ma telo anu selo ma. sewi li pona tawa mi. tenpo suno pi sona mi ala la mi tawa lon anpa pi suno suli. mi awen tawa tomo tawa telo anu ma telo. taso tomo tawa telo en ma li kama ala. mi kama pilin ike tan wan mi lon telo laso pi pini ala.

ante li kama lon lape mi. mi ken ala sona e ijo lili ale ona. lape mi li ike li jo e sitelen. taso ona li awen. mi kama tan lape la mi lon insa pi ma telo open jaki pimeja. lukin la ona li pini ala. noka mi li insa jaki. tomo tawa telo lili mi li awen lon ma poka mi.

ken la sina pilin e ni: mi o pilin pona anu pilin musi tan ante suli pi ma poka. taso mi pilin monsuta. kon en ma jaki li jo e ijo ike nasa. ona li monsuta e ale mi. ma poka li jaki tan sijelo kala moli tan ijo ante pi toki ala lon ma telo jaki pi pini ala. ken la mi o wile ala toki e monsuta pi kalama ala lon ma open ni. lukin en kute la jaki pimeja pi pini ala li lon taso. taso awen en wan ma li anpa e mi kepeken pilin monsuta suli.

suno li pana seli tawa anpa tan sewi. kon walo li lon ala la ona li pimeja lukin sama ni: ona li jasima e ma lon anpa mi. mi tawa tomo tawa telo mi la mi kama sona e ni: tenpo ni li ken tan ijo wan taso. nena seli li pana suli la ma anpa pi telo suli li ken kama sewi. ona li pana lukin e ni: ma pi lukin ala lon tenpo mute suli lon anpa telo. ma ni li suli mute la mi ken ala kute e kalama telo. waso telo li lon ala li moku ala e sijelo moli kala.

tenpo mute la mi awen anu pilin lon tomo tawa telo. ona li lon poka ona. suno li tawa sike lon sewi la pimeja ona li awen e mi tan wawa ona. tenpo suno li tawa la ma li jo e telo lili li kama jaki lili taso. ni la ona li pona tawa tawa lon tenpo lili. tenpo pimeja ni la mi lape lili taso. tenpo pimeja kama la mi jo e poki moku tawa ni: mi wile tawa alasa e telo suli e awen ken.

tenpo suno open nanpa tu wan la mi alasa e ma pona tawa noka. kon jaki kala li nasa e mi. taso mi jo e pali suli ante li open alasa e pini ken. tenpo suno ale la mi tawa nena. ona li suli tawa ma ante ale lon ni. tenpo pimeja ni la mi lape lon anpa sewi. taso lukin la ona li kama suli ala tan lukin mi nanpa wan tawa ona. tenpo pimeja nanpa tu tu la mi kama lon noka nena. ona li suli tawa lukin pi tenpo pini tan weka. ona li lon ma anpa la ona li suli mute. 

mi sona ala e tan ni: sitelen lape mi li ike wawa tan seme lon tenpo pimeja ni? taso mun li kama sewi la mi kama tan lape lon telo selo lete mi li wile ala awen lape. sitelen lape li monsuta tawa mi. mi ken ala lape lon ona. suno mun la mi sona e pakala pi nasin mi tan tenpo suno pini. wawa suno li lon ala la mi ken tawa mute. tenpo pini la tawa nena li suli lukin tawa mi. taso tenpo ni la mi pilin e ken mi pi tawa sewi.

tenpo pini la mi monsuta tan wan pi ma open. taso mi lukin anpa tawa lupa suli pimeja lon poka ante nena la mi pilin monsuta suli. mun li anpa la suno ona li suno ala e lupa. mi pilin e ni: mi lon selo ale li lukin tawa nasin ala pimeja pi tenpo ale. monsuta li pana e sona pi ma Eten e sona pi ike Satan.

mun li kama sewi la mi kama sona e ni: sinpin lupa li sama ala palisa. kiwen en lupa lili sinpin li pona e tawa anpa. kin la kipisi pini sinpin li sama ala nena. tenpo lili la wile pi sona ala li kama la mi open tawa anpa kepeken pali suli. mi awen lon kiwen lon kipisi pini sinpin li lukin e anpa pimeja pi jan sewi Si.

tenpo sin la lukin mi li tawa ijo suli wan lon sinpin lon sinpin mi. ona li suno walo lon suno sin pi mun sewi. mi pilin e ni: ona li kiwen taso. taso mi sona e ni: ona li tan ala nasin ale. lukin suli la pilin nasa li kama lon mi. mi ken ala toki e ona. ona li tan ni: tenpo mute suli la suli en anpa ona li lape lon anpa telo. taso mi pilin e ni: ijo nasa ni li kiwen. jan anu soweli pilin li pali e ona. ken la ona li olin sewi kin e ona. 

mi pilin nasa li monsuta. taso mi jo e pilin pi alasa sona kin sama jan sona la mi lukin suli e ma poka. mun li lon poka insa pi sewi pimeja li suno nasa e nasin leko lon lupa. ona li pana lukin e telo nasin lon anpa lupa. ona li tawa nasin pi lukin ala. ona li tawa sewi la noka mi li lon poka ona.

telo nasin li luka e noka pi kiwen suli lon sinpin ante lupa. tenpo ni la mi ken lukin e sitelen e kiwen musi ona. sitelen li sitelen sitelen pi sona mi ala. tenpo pini la mi lukin ala e ijo sama lon lipu ale. ona li jo e sitelen pona pi kala mute sama kala sama kala linja wawa sama kala pi luka mute sama pipi kala sama kala pi noka lawa sama kala soweli sama kala ante. sitelen mute li kala pi sona ala. taso mi lukin e sijelo moli ona lon ma jaki open.

taso kiwen musi li jo e lukin mi pi alasa sona. ona li suli lukin lon poka ante pi telo nasin. pali ona li suli tawa pali pi jan Tole kin. pilin mi la kiwen li wile jan lukin. jan ante. sitelen la ona li kala. ona li lon lupa anpa telo anu toki sewi tawa kiwen suli sewi. tomo sewi ni kin li lon anpa telo. mi o toki ala e selo e sinpin ona tan ni: mi sona taso e ona la mi pilin monsuta li kama wawa ala. ona li nasa tawa lawa pi jan Po tawa lawa pi jan Puwa kin. selo ona li sama jan. taso linja luka en noka ona li jo e selo lon insa ona. ona li jo e uta suli e lukin suli sama kiwen lukin pi kule ala e ijo ante ike tawa sona. nasa la sitelen la ona li suli mute tawa sitelen monsi. kala li moli e kala soweli la ona li suli sama ona.

mi sona e suli e nasa ona. taso tenpo ni la mi pilin e ni: ona li sewi taso pi lon ala tan kulupu jan esun kala. ken la jan majuna pi ma Pilutan anu jan majuna pi ma Nejanata la jan lili pini ona li moli lon tenpo mute. mi pilin e suli pi ijo ni. tenpo pini la mi ken ala wile lukin e ijo sama ni. jan sona tenpo li ken ala sona e tenpo majuna sama ni. mi awen li pilin e ni. tenpo sama la mun li pana e suno nasa tawa telo nasin lon poka mi.

sin la mi lukin e ona. kama sewi ona tan anpa pi telo pimeja li tawa lili taso e telo. ona li suli li sama jan suli Polipimu li jaki. ona li tawa wawa tawa kiwen sewi sama monsuta wawa pi sitelen ike lape. ona li luka e ona kepeken luka suli ona pi selo kala. tenpo sama la ona li anpa e lawa jaki ona li pali e kalama lili. lawa mi li kama nasa lon ni.

mi sona lili taso e tawa wawa sewi mi lon sinpin kiwen e tawa nasa mi tawa tomo tawa telo mi. mi sona e ni: mi kalama musi mute. mi ken ala la mi mu musi. mi jo e sona pi nasin ala tan telo sewi wawa. mi kama lon tomo tawa telo la mi kute e kalama pi wawa seli sewi e kalama nasin ale. nasin ale li pana e kalama ni lon tenpo nasa taso.

mi kama tan pimeja la mi lon tomo misikeke pi ma tomo San Pansiko. jan lawa pi tomo tawa telo tan ma Mewika li alasa e tomo tawa telo mi lon telo suli li tawa ni e mi. mi pilin nasa la mi toki mute. taso jan ala li kute e ona. jan ante li sona ala e ni: ma sin li kama sewi lon telo suli Pasipi. kin la mi wile ala awen toki e ijo nasa pi sona ona ala. tenpo wan la mi alasa e jan pi sona kulupu li alasa sona e musi pi kala sewi Takon tan jan Pilitan. taso mi pilin e ni: nasin kulupu li suli tawa ona. ni la mi pini alasa sona tan ona.

tenpo pimeja la mun li suli la mi awen lukin e ona. mi alasa moku e ilo nasa. taso ilo nasa li pana e pilin pona lon tenpo lili taso li lawa e ale mi. tenpo ni la mi sitelen e lipu pi sona mi tawa musi anu sona pi jan ante la mi pini e ale. tenpo mute la mi pilin e ni: ona li sitelen pi lawa mi taso. ona li pilin jaki lili tan ni: mi tawa weka tan jan utala pi ma Tosi la mi lon tomo tawa telo lon anpa suno lon tenpo mute. 

ni la mi alasa sona. mi pilin e ni la sitelen monsuta pi lawa mi li kama lon tenpo sin. mi pilin e telo suli la mi pilin monsuta tan ijo ni: ijo pi nimi ala li tawa lon anpa pi jaki telo. ona li toki sewi tawa kiwen sewi majuna ona anu sitelen e ona ike lon kiwen suli walo. mi ken ala pilin e ijo ante. sitelen lape mi la mi lukin e ni: ona li kama lon sewi telo li tawa anpa e kulupu jan pi utala mute. mi lukin e tenpo ni: ma li tawa anpa. anpa telo pimeja li kama sewi lon nasin ala pi ijo ale.

pini li lon poka. mi kute e kalama lon lupa. ona li sama ni: sijelo suli jaki li lon ona. ona o alasa ala e mi. sewi a! luka ni a! lupa a! lupa a!