kalama musi pi jan Eli San

mi lukin e lipu pi ma tomo lon tenpo mute. taso mi ken ala alasa e nasin Tuse. mi lukin e lipu sin taso ala. mi lukin e lipu majuna kin tan ni: nimi nasin li ken kama ante. mi alasa sona e tenpo pini weka pi ma ni. nasin li ken nasin Tuse la mi tawa ona. mi tawa nasin mute. taso ni li awen lon: mi ken ala alasa e tomo e nasin e ma. tenpo mun pini pi kama sona mi lon tomo sona suli la mi kute e kalama musi pi jan Eli San lon ni.

sona mi li kama pakala. mi sona e ni. mi lon nasin Tuse la sijelo mi en lawa mi li kama ike. mi jo e jan pona pi mute lili taso. ona li kama ala tawa nasin ni lon poka mi. taso ni li nasa li pakala e lawa mi: mi ken ala alasa e ona tan seme? mi tawa ona tan tomo pi kama sona la mi wile e tenpo lili taso. nasin li jo e ijo nasa mute. sina lon ona la sina ken ala weka sona e ona. jan ale pi sona mi li sona ala e nasin Tuse.

nasin Tuse li lon poka pi telo nasin pimeja li lon poka pi tomo jo pi kiwen loje. nasin pi kiwen pimeja li lon sewi pi telo nasin. tenpo ale la pimeja li lon poka pi telo nasin pimeja. kon jaki pi tomo pali suli li len e suno ale. telo nasin li pana e kon jaki suli. mi pilin ala e kon ni lon ma ante. ken la mi alasa e ma pi nasin Tuse lon tenpo kama tan kon ni. mi open pilin e ona la mi o sona e ona. nasin lili pi kiwen mute li lon poka nasin pi kiwen pimeja. nasin la tomo tawa linja kin li ken tawa. ona li lon poka nena. anpa nena la nena li sewi lili taso. taso ona li kama sewi suli lon nasin Tuse.

ma ante la mi lukin ala e nasin sama nasin Tuse. ona li lili li lon nena suli. tomo tawa li ken ala lon ona. ona li jo e nasin leko lon kipisi mute ona li pini lon sinpin kiwen. nasin jan ona li jo e kiwen mute: leko kiwen anu kiwen lili anu ma taso. tomo li suli li majuna. ona li palisa ala. tenpo lili la tomo tu lon sinpin li kama poka lon sewi. ni la suno lili kama anpa tawa nasin.

jan nasin li nasa tawa mi. open la mi pilin e ni: ona li nasa tan ni: ona li toki ala. taso mi kama pilin e ni: ona li nasa tan ni taso: ona li majuna. mi sona ala e ni: mi kama lon nasin ni tan seme? taso mi lon nasin ni la mi mi ala. tenpo pini la mi lon tomo jaki mute li ken ala awen tan ni: mi jo ala e mani. ni la mi tawa tomo ike pi jan Ponto lon nasin Tuse. ona li tomo nanpa tu wan tan pini sewi nasin. nasin Tuse la ona li tomo suli nanpa wan.

tomo lili mi li lon sinpin anpa nanpa luka li tomo taso pi jan lon sinpin anpa ni. tomo pi jan Ponto li jo e jan lili. tenpo pimeja nanpa wan la mi kute e kalama musi nasa. tenpo suno kama la mi alasa sona tan jan Ponto. ona li toki e ni: jan pi kalama musi ni li jan nasa majuna tan ma Tosi. ona li nasa li toki ala li sitelen e nimi Eli San li kalama musi lon tomo musi lon tenpo pimeja. ona li wile lon tomo sewi tan ni: ona li wile kalama musi lon tenpo pimeja. jan li ken lukin lon sewi sinpin tan lupa pi tomo sewi ni taso.

mi kute e jan San lon tenpo pimeja ale. mi ken ala lape tan ona. taso mi pilin nasa tan nasa pi kalama musi ona. mi sona ala e sona pi kalama musi. taso mi sona e ni: kalama musi ona li sama ala kalama musi ante. mi kama pilin e ni: sona ona pi kalama musi li suli li sama ala sona pi jan ante. mi kute lon tenpo mute la mi kama wile kama sona e ona. tenpo esun kama la mi toki insa e ni: mi o toki tawa ona. 

tenpo pimeja wan la ona li kama tan pali ona la mi pini e tawa ona li toki e ni tawa ona: mi wile kama sona e ona. kin la ona li kalama musi la mi wile wile lon poka ona. ona li lili li jo e len jaki pakala e lukin laso e sinpin nasa sama soweli e lawa pi linja ala. lukin la ona li kama pilin monsuta li kama pilin ike tan toki mi. taso pilin pona mi li pona e pilin ona. ona li toki e ni tawa mi kepeken luka: “o kama!”. mi tawa lon pimeja lon nasin leko pi kalama ike tawa tomo sewi. tomo ona li wan taso tan tomo tu lon sinpin anpa ni. ona li lon poka pi sinpin suli lon pini nasin. tomo ni li suli. taso ona li suli mute lukin tan ni: ijo pi mute lili taso li lon ona. supa lape kiwen en supa lili en supa lipu en supa palisa tawa lipu pi kalama musi en supa monsi tu wan taso li lon. lipu mute pi kalama musi li lon anpa. sinpin li jo ala e selo. jan li ken lukin e palisa ale pi insa sinpin. ken la tenpo ala la selo li lon ona. ko lili jaki walo en linja pipi mute li lon. ni la pilin ni li lon: jan ala li lon ni. ni la mi pilin e ni: ijo lon li pona ala tawa jan Eli San. ona li jo e pilin pona tan lawa ona.

ona li toki e ni kepeken luka: “o awen lon supa!”. ona li pini e lupa li open e ilo suno seli. ona li kama jo e ilo kalama linja ona tan poki ona. pipi mute li pali e lupa lili mute lon poki ni. jan San li awen lon supa monsi ike. ona li kepeken ala e supa lipu pi kalama musi. ona li sona e nasin kalama. ona li pana ala e anu li kalama lon tenpo mute. kalama ona li sin tawa mi. mi kute ala e ona lon tenpo pini. ken suli la ona li mama pi kalama musi ni. sona mi pi kalama musi li lili. ni la mi ken ala toki e ona. ona li sama kalama ante li jo e kipisi pi tenpo sike. tenpo ante la mi kute e kalama nasa ona tan tomo mi. taso tenpo ni la kalama nasa ni li lon ala. 

mi sona e kalama monsuta ni. tenpo mute la mi alasa kalama e ona kepeken uta. jan San li pini la mi toki e ni: o pana e ona lili. mi open toki la sinpin ona pi pilin ala li weka. sinpin ona li sama sinpin ona pi tenpo ni: mi toki tawa ona lon tenpo nanpa wan. ona li pilin monsuta li pilin ike. open la mi wile ante e ona li kalama e kalama nasa ona lili pi tenpo pimeja pini. mi pilin ala tan nasa ona pi tenpo mute. taso mi kalama  lon tenpo mute ala tan ni: ona li kute e kalama mi la sinpin ona li kama nasa li kama pilin ike. luka jaki lete ona li alasa luka e uta mi li alasa pini e kalama mi. ni la ona li pali e nasa sin. ona li lukin monsuta tawa lupa sama ni: ona li monsuta tan ijo ike lon lupa. taso lupa li lon sewi mute. jan li ken ala tawa insa tomo kepeken lupa ni. lupa ni la sewi pi tomo ante ale li anpa mute. jan pi lupa sinpin tomo li toki e ni tawa mi: jan li ken lukin lon poka ante sinpin tan lupa ni taso.

lukin pi jan majuna la mi awen sona e toki pi jan Ponto li wile lukin e sewi tomo mute e suno pi ma tomo lon poka ante pi nena suli. jan pi nasin Tuse la jan majuna ni taso li ken lukin e ni. mi tawa lupa. mi wile tawa poka e len lupa. taso jan nasa pi kalama musi li pilin wile utala suli li pilin monsuta. tenpo ni la lawa ona li tawa pi toki ni: “o tawa weka!”. kin la ona li alasa tawa e mi kepeken luka tu ona. ni la mi kama pilin jaki tan ona li toki e ni tawa ona: “o luka ala e mi! mi tawa weka lon tenpo ni!”. ona li lili e wawa luka. ona li lukin e pilin ike mi la pilin ona li kama wawa lili. luka ona li kama wawa lon tenpo sin. tenpo ni la wawa pi luka ona li pana ala e pilin ike. ona li tawa e mi tawa supa monsi. ona li kama pilin ike li tawa supa sitelen. ijo mute li lon supa ni. ona li sitelen e nimi mute kepeken palisa sitelen. mi lukin e toki Kanse ona la mi sona e ni: jan sitelen li tan ma ante.

pini la ona li pana e lipu tawa mi. lipu li toki e wile tawa weka sona pi pakala ona. jan San li toki e ni: ona li majuna li jan wan taso. ona li jo e pilin monsuta mute e pilin nasa tan kalama musi ona e pilin nasa tan ijo ante. ona li pilin pona tan ni: mi kute e kalama musi ona. ona li wile e ni: mi o kama lon tenpo sin. nasa ona li nasa lili tasa tawa mi. taso ona li ken ala pali e kalama nasa ona lon poka pi jan ante. ona li ken ala kute e ona tan jan ante. ona li wile ala e ni: jan ante li luka e ijo lon tomo ona. mi toki ala la ona li sona ala e ni: mi ken kute e kalama musi ona lon tomo mi. ona li toki e wile ni: mi o toki tawa jan Ponto o lon tomo pi sinpin anpa ante. ni la mi o kute ala e ona lon tenpo pimeja. ona li sitelen e ni kin: tomo sin ni li wile e mani mute la ona li pana e mani. ni la mi awen pana e mani sama.

mi lukin e toki Kanse ike ona la mi pilin pi wile pona tawa ona. sijelo ona en lawa ona li pana e pilin ike tawa ona. mi sama. kama sona mi li pana e sona pi pana pona tawa mi. kalama ala li lon tomo. taso kalama lili li kama tan lupa. mi pilin e ni: len lupa li tawa lili tan kon tawa. taso mi lukin e ona sama jan Eli San lon tenpo pini. mi pini lukin la mi luka e luka pi jan San li tawa weka sama jan pona.

tenpo suno kama la jan Ponto li pana e tomo sin pi mani mute tawa mi lon sinpin anpa nanpa tu wan. ona li lon insa tomo pi jan mani insa tomo pi jan pali len. jan ala li lon sinpin anpa nanpa tu tu.

tenpo lili li tawa weka la mi kama sona e ni: jan San li wile ala toki tawa mi. ona li toki lon tomo ona la mi pilin ante. ona li wile ala toki tawa mi. mi tawa ona la ona li pilin ike lukin li kalama musi. taso ona li pilin pona ala tan ona. tenpo ale la ni li lon tenpo pimeja. ona li lape li open ala e lupa lon tenpo suno. pilin pona mi li kama suli ala. taso mi awen olin e tomo sewi ona e kalama musi nasa ona. mi wile lukin tan lupa tawa sinpin tawa tomo tawa nena. tenpo wan la mi tawa tomo ona lon tenpo suno. taso jan San li lon ala. mi ken ala open e lupa.

taso mi ken kute e kalama pi jan majuna nasa lon tenpo pimeja. mi tawa len tawa sinpin anpa nanpa luka. mi kama pilin wawa li tawa sewi tawa tomo lili lon sinpin pi tomo ona. ni la mi kama pilin monsuta li kama pilin kama sona e ijo pi sona ala. kalama li monsuta ala. taso ona li jo e tawa kalama pi mun ma ala. ona li jo e ijo nasa ante kin. mi pilin e ni: kalama ni li ken ala tan jan wan taso. lon la jan Eli San li jan sona wawa. tenpo esun li tawa weka la kalama musi li kama wawa. tenpo sama la jan majuna pi kalama musi li kama pilin ike li kama nasa. ona li ken ala e mi lon tomo ona li tawa weka tan mi lon tomo. 

tenpo pimeja wan la mi kute lon lupa ona li kute e ni: kalama pi ilo kalama li kama jaki li kama mute. ni la mi sona ala e ni: lawa mi li kama pakala anu seme? taso mi kama sona ona tan ni: kalama li kama tan tomo. kalama ike. ona li ken tan jan pi ken toki ala taso li kama taso lon tenpo suli pi monsuta mute. mi luka e lupa lon tenpo mute. taso ala li lon. mi awen lon tomo pimeja li tawa lili tan lete tan monsuta. mi kute e ni: jan pi kalama musi li kama lon luka tu kepeken supa. mi pilin e ni: lawa ona li kama lon tenpo sin tan weka. mi awen luka e lupa li toki e nimi mi. mi kute e ni: jan San li tawa len lupa li pini e ona e lupa li tawa lupa. ona li open e ona tawa mi. ni la ona li pilin pona tan mi. sinpin ona li pona lukin sama ni: pilin monsuta ona li kama weka tan mi. ona li luka len mi sama jan lili.

ona tawa lili tan monsuta li tawa e mi lon supa. sama la ona li awen lon supa ante. ilo kalama ona li lon sinpin anpa lon poka ona. ona li awen li tawa nasa e lawa ona lon tenpo lili. taso mi pilin e ni: ona li kute li pilin monsuta. ona li pini la ona li tawa supa sitelen. ona li sitelen e lipu lili li pana e ona tawa mi. ona li tawa supa sitelen lon tenpo sin li open sitelen wawa. lipu li toki e ni: mi wile alasa sona la mi o awen tan ni: tenpo ni la ona li sitelen e toki ale ona pi ijo monsuta sewi. mi awen. ona li sitelen.

mi awen lon tenpo lili. tenpo sama la lipu tan pali wawa sitelen ona li kama mute. mi lukin e ni: jan San li kama pilin monsuta. ona li lukin e lupa li kute monsuta. ni la mi kin li kute e kalama. taso ona li kalama monsuta ala li kalama anpa. ona li pana e pilin ni: jan ante pi kalama musi li lon tomo ante anu lon sinpin pi pini nasin. taso jan San li kama pilin monsuta suli mute. ona li pana e ilo sitelen ona. ona li tawa tan supa tawa ilo kalama ona li open kalama musi wawa sama tenpo ni: mi kute lon lupa. mi kute ala e kalama pi wawa sama ni tan ona.

mi ken ala toki e kalama pi jan Eli San lon tenpo pimeja suli ni. tenpo ale la mi kute ala e kalama pi monsuta sama ni tan ni: mi ken lukin e sinpin ona. ni la mi sona e ni: tenpo ni la pilin ona li monsuta taso. ona li alasa kalama tawa ni: ona li wile tawa weka e ijo. mi ken ala sona e ijo ni. taso mi pilin e ni: ona li sewi. kalama musi li kama wawa li jo e pilin nasa mute. taso ona li awen jo e ijo pi sona suli ona. mi sona e kalama musi ni. ona li tawa musi Mosijo wawa. tomo musi la jan mute li olin e ona. ni li tenpo nanpa wan ni: jan San li musi e kalama musi pi jan ante.

kalama li kama wawa mute li tawa sewi. jan San li pana e telo selo tan pali suli. ona li tawa sama soweli. tenpo ale la ona li lukin monsuta tawa lupa pi lupa len. kalama li pali e sitelen ni lon lawa mi: jan sama soweli mani li musi li tawa musi lon kon nasa pimeja pi linja wawa seli mute. mi pilin e ni: mi kute e kalama suli tan nasin pi pini suno. ona li tan ala ilo kalama li jo e wile. mi pilin sama ni: kalama li wile e pilin ike pi jan San.

len lupa li open tawa tan kon tawa. ona li kama lon. mi pilin e ni: ona li toki tawa kalama musi. ilo kalama pi jan San li kama nasa. ona li pana e kalama sin. tenpo ale la mi kute ala e kalama sama ni tan ilo kalama. len lupa li tawa suli. ona li kama weka tan sinpin li pakala e lupa. kon tawa lete li kama insa. ilo suno li kama anpa. lipu toki len pi jan San li tawa lon supa. mi lukin e jan San la kon ona li lon ala. lukin laso ona li kama suli li jo ala e kon. kalama ona li kama nasa. ona li sama ilo. jan ala li ken sona li ken sitelen e ona.

kon tawa suli li kama lon. ona li suli la kon tawa ante li lili. ona li lanpan e lipu li tawa e ona tawa lupa. taso mi tawa lupa pakala la ona li tawa weka. mi sona e wile mi tan tenpo pini. mi wile lukin tan lupa ni. tan lupa taso pi nasin Tuse lon sewi ni tawa sinpin tawa nena tawa ma tomo lon anpa. pimeja suli li lon. taso tenpo ale la suno pi ma tomo li lon. mi pilin e ni: mi ken lukin lon kon tawa suli lon telo sewi. taso mi lukin tan lupa sewi ni la mi lukin e ma tomo ala. suno ala li lon anpa. pimeja ale taso li lon. ma pi sona ala. tawa en kalama musi li lon. taso ala pi ma ni li sama mun ma. mi lukin monsuta la kon tawa li pini e ilo suno ale. mi lon pimeja nasa taso. ijo nasa en kalama ike mute li lon poka pi sinpin mi. kalama musi nasa li lon poka monsi mi.

mi tawa lon pimeja. mi ken ala pali e suno la mi tawa e supa. mi tawa pimeja pi kalama musi nasa. mi alasa awen e mi e jan Eli San tan wawa ale. mi pilin e ijo lon poka mi. mi kalama monsuta. taso ona li lili tan ilo kalama. ijo li luka e mi. ona li ilo kalama. mi sona e ni: mi lon poka jan pi kalama musi. mi luka e supa pi jan San li luka e ona tawa ni: mi wile open e lawa ona lon tenpo sin. 

ona li toki ala. ilo kalama li awen li kama anpa ala. mi luka e lawa ona li pini e tawa ona. mi toki suli e ni tawa kute ona: mi tu o tawa weka tan ijo nasa pi tenpo pimeja. taso ona li toki ala li awen kalama musi. tenpo sama la kon tawa li tawa nasa lon tomo sewi. mi luka e kute ona la mi pilin monsuta suli. mi sona ala e tan ona. mi pilin e sinpin ona la mi kama sona. sinpin lete pi kon ala. lukin ona li kama suli li lukin tawa ma pimeja. tenpo ni la mi alasa e lupa. mi tawa weka wawa tan ijo nasa pi lukin suli tan kalama nasa suli pi ilo kalama. mi tawa la ona li awen kama suli.

mi tawa wawa anpa lon nasin leko lon tomo pimeja. mi sona ala. mi tawa taso tawa nasin majuna pi tomo nasa. mi tawa nasin ante anpa li tawa telo nasin jaki. mi tawa lon sewi ona lon nasin kiwen pimeja. pini la mi lon insa pi ma tomo li lon nasin pona suli. mi sona e ni. tenpo ni la kon tawa ala li lon. taso suno ale pi ma tomo en mun li lon.

mi alasa kepeken pali mute. taso mi ken ala alasa e nasin Tuse. taso mi pilin ike ala tan ni tan ni: lipu toki nasa li kama weka. ona taso li ken pana e tan pi ijo ni: kalama musi pi jan Eli San.