lipu Kojo en linluwi majuna
{{{sitelen “0031_linluwi.png” “ilo linluwi” “kije Weku”}}}
tenpo pini lili la, lipu Kojo (Cohost) li moli.
mi en jan mute li pilin anpa. mi mute li tawa seme? lipu Kojo li pona tan ni: lipu Kojo li ante. tenpo ni la linluwi1 li sama mute. lipu mute pi linluwi kulupu li pona ala a! mi wile ala toki e lipu Tuwita. lipu suli pi mute lili li wawa tawa linluwi, li alasa mute e mani. lipu Kojo li jo ala e sitelen esun jaki. lipu Kojo li jo ala e lipu lawa pi ilo lawa. lipu Kojo li pona, li jo e ilo pali.
lon lipu Kojo la, jan li ken pali e lipu kepeken ilo Esijeme (HTML). tan ona la, jan mute li musi mute. jan li pali e sitelen, e sitelen tawa, e musi tawa, e nasin pi kama sona: ale lon lipu linluwi kulupu! lon lipu Kojo la mi kama sona e ilo Esijeme. tan ona la, jan mute pi lipu Kojo li tawa seme? mi mute li tawa lipu linluwi pi mi mute!
sina kepeken ala e lipu Kojo la sina kin li ken pali e lipu linluwi. sina pilin ike tawa linluwi la, mi pilin pona tawa ni: sina pali e lipu linluwi sama linluwi majuna2 (anu linluwi Web 1.0)! sina pilin monsuta tan ilo Esijeme la, ilo Esijeme li ike ala! mi sona e ni: jan mute li pali ala e toki ilo li ken kepeken e ilo Esijeme.
tenpo ni la, nasin mute pi kama sona li ken pana e sona tawa sina. sina wile e lipu pi ilo Esijeme la, lipu Nijosisi (Neocities) li pona mute! ona li jo e nasin pona pi kama sona. kin la, ona li jo e kon mute sama linluwi majuna. tenpo ni la linluwi majuna li kama suli tan ni: jan mute li pilin ike tawa linluwi sin.
pilin tawa moli pi lipu Kojo li anpa. taso, mi pilin e ni: jan mute li pali e lipu pona la, jan mute li pilin pona mute tawa linluwi! lipu mi li pona mute tawa mi, tan ni: mi ken pali e ijo pona mute tawa mi. mi mute li wile la, mi mute li ken pali e linluwi pona, sama linluwi majuna.
{{{sitelen “0031_eggbug.png” “pipi sike” “kije Weku”}}}
pipi sike o tenpo ale a!