lipumaja

LIPUMAJA#1

nasin awen sijelo
suno nanpa MTW pi mun nanpa LLW

tomo sona la mi kama sona e ijo pi jan Anapan. ni li musi ala tawa mi, taso ona li pana e ni tawa lawa mi: mi kin o sitelen e lipu tenpo sike sama jan Anapan. taso mi sitelen e “mi pilin wan taso li jo ala e pali musi” lon suno ale la lipu ni li kama sama sike ike, tan ni la ken la ni li pona: mi sitelen lon tenpo pi kulupu pi suno LTW, anu lon tenpo pi sike mun

kulupu sona mi li wile musi e ~musi pona wawa~ ni: sina esun e ijo pona len lon kulupu. mi o alasa e nasin weka pi musi ni lon tenpo ni a. jan Pipilonkon li weka tan musi tan ni: musi ni li ike tawa nasin sewi ona
sona ona li lili a li nasa a, taso mi wile e ni: sona mi li lili kin li nasa kin. ni li nasa ala nasa?

ni taso li ale… tenpo ni la tenpo sike pi open mi li lon sike mun pini tu. jan Koko li pali sama ni: ona li sona ala. pona la ken suli la ona li sona ala lon lon. taso mi o kepeken ala e nasin “o luka e monsi uta sina o pana e telo moku jaki” lon tenpo lon.

mun nanpa LLT li lon poka a…
nanpa wan la tenpo pi jan Jesu li tenpo pi kulupu pi mama sama, la mi kama moli a
kin la suno nanpa LLLW li lon tenpo lape lili. tan ni la jan Koko li lukin kepeken e sona ni tawa wile ike ona.

mi sona ala e ni: mi wile sitelen e seme
taso, ni li suli ala

LIPUMAJA#2

toki tawa sijelo
suno nanpa MLL pi mun nanpa LLW

tenpo suno ni la mi awen kama sona e ijo mute pi jan Anapan. mi kama sona e ni:
jan Anapan li jan BETA, ona li pona ala tawa lukin li lon insa pi tomo ona lon tenpo mute mute mute
mi kama sona e ni la mi toki insa e ni: “a, lon pi jan ni li sama lon mi a!”

taso

“a ona li toki suwi olin tawa jan mije lon tenpo len”

jan Anapan li jo e lon olin suli lon poka pi lon olin mi
taso jan li alasa e jan pi ma Elopa-Asija sama jan pi nasin Joten lon tenpo pi jan Anapan la lon olin mi li ken kama suli sama jan Anapan a a

kin la mi lukin ala pali tawa nasin weka pi musi esun tan ni: kulupu li wile ala e mi lon musi ni. lon la mi o pilin pona, taso mi pilin pona ala a

mi wile weka e pilin ni tan lawa mi la mi awen e lawa mi lon unpa len sama jan Anapan, taso ni li ike taso e pilin mi.

a, mi open sona a e ni: mun nanpa LLT li lon a. mi wile lape lon ale pi tenpo lete ni a..

LIPUMAJA#3

mama kama sijelo
suno nanpa LT pi mun nanpa LLT

suno nanpa luka li tenpo ni: sina open pi ijo pona len lon tomo mama. kin la taso la jan Pipilonkon en mi li lon ala musi esun pi kulupu sona. jan Pipilonkon li AWEN A PILIN A e ni: jan sewi Sinteka li lon a, kin la ijo len li “ike tawa sewi” tawa ona. mi lukin toki e lon lon pi jan Sinteka la ona li toki e ni: mi ike tawa sewi, kin la mi lon kulupu ike pi sona lon len sama jan ni: ona li “tawa e jan tawa mun suli”

jan Koko li lukin sona e tan pi weka musi mi, la mi toki e ni: jan ala li toki e wile mi ona pi lon musi. taso ona li ni tawa jan ala, ona ale li tawa musi taso. jan Koko li wile pana e tu pi ijo ona pi musi esun tawa mi, taso ona li ni la mi en ona li jo e palisa wan taso la mi toki e “ala” taso.

kin la lon tenpo pi open pi ijo len la jan ale o pali sama ni: jan Sinteka li lon, tan pilin nasa pi jan Pipilonkon
mama mi li lukin sona e wile mi pi ijo len, taso wile lon ale mi li nasa mute a la mi toki e “mi wile moku lon tenpo lete la mi wile e pan namako lili mute taso”. sona mi la sijelo mi li lili ike a tawa suli tenpo mi la mi moku mute la ni li ike ala tawa sijelo mi. pilin pi jan Pipilonkon la mi kama jo e pan taso tan pali ike mi, kin la kulupu lawa li utala sewi sin e pali ike tan ni: ona li wile awen e lon lon

mi pilin pona tan ni: tenpo ni li weka, taso mi awen sona ala e nasin weka pona pi suno nanpa LLW…

pilin mi la pilin pona ni li toki e kama pi ike suli

LIPUMAJA#4

mun tawa sijelo
suno nanpa LTT pi mun nanpa LLTT

MI SONA A E ONA A MI SONA A E ONA A PAKALA A PAKALA A

tenpo ale la mi awen pilin e kama ona, tenpo poka la jan Koko li tawa tomo mi (li luka ala e sinpin open) (pona la tenpo ni la mi musi Sin taso) li toki e ni:

“tenpo sike musi mi li lon tenpo suno luka tu la mi sona ala e ni: mi wile e jan seme lon tenpo musi mi. tan ni la, mi pana e lipu pi wile kama tawa jan ale pi kulupu sona mi, ona li tawa tomo suli ni. mi sona e ni: jan ale ni li wile kama, taso mi sona ala e ni: sina wile ala wile kama? kin sina lon tomo ni, taso jan ale li kama. jan ale li kama la sina kama kin la ni li pona wawa tawa mi.”

mi sona pona a e wile ona, ona li ni tan ni taso: ona li lukin kepeken e wile ona pi kama mi tawa ijo ike a pi wile ona

mi pali e ken tu wan ni lon lawa mi:

1. mi kama la
   pona: jan Koko li jo ala e pilin ike pi wile pakala

ike: tenpo ale ni la mi lon monsi tomo li pilin ike a li pilin anpa a li pilin nasa li taso li sona ala e wile toki mi, tan ni la jan ale li pilin ike tan lon mi

2. mi kama ala la
   pona: mi kama ala

ike: jan Koko li jo mute wawa a e pilin ike pi wile pakala, kin la mi awen lon tomo mi (mi o lon seme a) li kute e ni: jan ale li pilin pona musi a lon ala poka pi meli ike ni.

3. mi ken ala kama la
   pona: mi kama ala, jan Koko li pilin ike ala

ike: seme?

mi o alasa e nasin weka pi tenpo ni lon suno luka tu a. tenpo pini la mi kepeken e nasin “o luka e monsi uta sina o pana e telo moku jaki”. taso tan tenpo sike suli mi la mi ken ala kepeken e ona, la mi o alasa e nasin ante

taso

mi kepeken e nasin nasa wawa la jan ala li pilin e ni: mi wile e pakala ike ni…

LIPUMAJA #5

kule weka sijelo
suno nanpa LLL pi mun nanpa LLTT

mi pini sitelen e lipu ni la mi tawa pakala anpa lon nasin sewi

mi la mi ni la ale li pilin ala e ni: mi wile pakala e sijelo mi. mi wile e nasin ni tan ni: mi ni la mi pakala a tawa lukin, taso mi pilin pakala lili a

kin la mi wile e tan pona pi lon ala pi pakala ni, la mi wan ala e linja pi len noka mi li tawa “pakala” lon nasin

taso mi pana ala e lawa ale tawa wawa pi tawa anpa a! mi anpa la mi lukin lili e ken pi pakala sijelo suli kepeken luka mi (mi wile ala pakala e lawa mi a). taso mi wile awen jo e pakala pi weka lili selo e pakala pi selo laso tan ni: mi pakala ala tawa lukin la ale li pilin e ni: mi pakala ala li ken a tawa tenpo pi jan Koko lon lon li pali taso sama ala ni. mi kalama wawa lon supa ale pi nasin sewi la ona li pilin ike ike a tawa kute, taso ona li pilin ike ike ala lon lon. mi lon supa anpa la mi o alasa pali sama ni: sijelo mi li pakala, taso mi o toki ala e pilin pakala lawa. mi ni la mama o lukin tawa mi tawa tomo pi pakala sijelo. “pilin pakala” nanpa wan o lon luka mi o lon noka mi. ni la tawa li ike tawa mi la mi o lon supa lape mi lon suno tu lape ni a

taso tenpo pi jan Koko li lon poka a, laaaa mi ken ala lape pona lon tomo pi tenpo musi wawa a la mi alasa lon tomo pi mama mama mi li ken kama pilin pona a. mi lon tomo pi mama mama la mi ken lape lon ale pi tenpo pi jan Koko li ken kepeken e ilo musi mi li ken moku e pan Lunpija mute mute a li LON ALA A TENPO PI JAN KOKO A :D:D:D

kin la mi awen “pilin ike a” la mi ken awen lape lon tomo lon tenpo pali a, mi lape ala lon tenpo pimeja pini luka tan wile pi pakala ni a, tan ni la mi o lape lon tenpo suli a a

tenpo ni li tenpo alasa a… a a mi pilin wawa pi suli ike a! taso mi pali a e nasin weka ni lon tenpo suli a, kin la ale li pona lon poka kama pi tenpo pi jan Koko

aa suno poka la mi sitelen e ale pi alasa mi- mi ken la mi ni a a

LIPUMAJA #6

toki weka sijelo
suno nanpa LLLW pi mun nanpa LLTT

tenpo poka la mi kama sona e ni: wile pi ijo nasa wawa a li pona tawa ken. pali lon pi ijo nasa wawa li ike tawa ken.

lon ale pi tenpo pali pi nasin weka ni la mi toki a e ijo pona kama pi nasin ni tawa mi. taso mi lon selo pi supa sewi li lukin anpa la ijo ike ale li kama sin tawa lawa mi. mi awen lon tenpo lili luka. pini pi tenpo ni la toki ni li kama lon lawa mi: (lon la mi o pilin e ni lon tenpo open a):

“mi anpa tan supa li pakala e sijelo mi la, jan Koko li pilin seme?”

la mi tawa tomo lape mi a

tenpo suno ni la mi awen lon tomo mi, tenpo suli la ona li tawa tomo mi li lukin sona e ni: mi wile ala wile tawa tenpo musi ona. mi jo ala e wile weka wawa la mi lukin ala alasa e nasin weka ante a.

tenpo pini la mi sitelen e ni:

1. mi kama la
   pona: jan Koko li jo ala e pilin ike pi wile pakala

ike: tenpo ale ni la mi lon monsi tomo li pilin ike a li pilin anpa a li piln nasa li taso li sona ala e wile toki mi, tan ni la jan ale li pilin ike tan lon mi

2. mi kama ala la
   pona: mi kama ala

ike: jan Koko li jo mute wawa a e pilin ike pi wile pakala, kin la mi awen lon tomo mi (mi o lon seme a) li kute e ni: jan ale li pilin pona musi a lon ala poka pi meli ike ni.

3. mi ken ala kama la ni:
   pona: mi kama ala. jan Koko li pilin ike ala

ike: seme?

insa la mi wile e ni: mi pilin lili ala li ken tawa

ona li pilin suwi pona a lon ala poka pi meli ike ni

LIPUMAJA #7

musi weka sijelo
suno nanpa MW pi mun nanpa LLT

tenpo lape suli ale la tenpo lape suli pi tenpo lete li ike nanpa wan. sina ken lape a, taso sina o lon tenpo kulupu mute ike lon poka pi kulupu pi mama sama li kute e kalama ike pi tenpo pi jan Jesu. tenpo kulupu pi open sike li ike sewi a kin. jan li moku mute e telo pi nasa lawa li mu mute a tan suli pi nanpa sike. tan ni ale la sina ken ala lape pona lon tu pi tenpo lape suli.

jan Pipilonkon li ijo ike kin a. tomo suli pi esun mute la ona li lukin e jan Santa li toki suli e “ona li jan ike len pi nasin mani ike!!” e “jan sewi Nikola li suli!!”. ona li lukin pakala e lawa ona kepeken ilo moli pi pana kiwen. taso ilo ona li ilo moli ala li ijo musi taso, la ona li pakala e ala li moli e ala. taso jan lili li lon noka pi jan Santa li pana wawa e telo tan lukin ona.

jan Koko li awen lon weka tan poka mi lon suno mute poka a

namako la mi alasa e lipu ni pona: sina pana e sona sina la lipu li poki e kon sina. sona kama li toki mute e ijo ike la mi sona e ni: ona li toki lon a. mi awen e ona lon lipu ni la mi ken pana sin e sona lon tenpo weka a li ken lukin e ante sona a.

lipu: https://cdn.discordapp.com/attachments/754933236798586882/1344393755653964017/lipukon.png

LIPUMAJA #8

kule sin luka
suno nanpa MLT pi mun nanpa LLT

a a a, jan Maja o, sina jan pi musi ala a
seme la tenpo suwi pi jan Jesu li ike tawa sina? kulupu sina pi mama sama li ike kin tawa sina anu seme-

mu mu

a, kulupu pi mama sama li kama lon tomo a

“TOki A Ale O!!! Aa WaWA a SiNA ALe lI SuLI WaWA aA!!!!”

“OwO JaN kOKo O!! SinA MelI SUli loN AaA! siNA pIliN sEMe aA tAN nI A: sINa mUsI UtAlA SikE LOn Ma aNTE KepeKEn NiMI NeTElaN aA!! AA siNA siteLEN e SIteLEn PoNA PoNa WAwA nI anU sEme A!! SinA KeN KaLAMa WaWa AaaA loN kULuPU A!!! SinA WaWA WAwa aa!! Mi PilIn PoNA tAN Ni: mI maMa sINA”

“WawA AA JaN MeME O!! mI KuTe e nI: sInA KaMA jO aA e NanPA lUKa LukA a LoN lIPu sONA SinA pi tokI NeTElAN!!!! e NI kiN: SinA pInI PoNA WawA a E UTAla KulUpu A nI pI mUSI sIKE: sInA wIlE panA E SiKe TaWA PokI aA!!! E nI kIN: kUlUPU PalI pi mAni aLA lI alAsA paLi sAma SiNa Aa TaN Ni: SiNA pAlI pONA LOn kUlUpU SaMA!! o KalAMA kEpEkEN iLo lUkA Suli pI nAsIN kOn mUTe!! mi WiLE kUtE AA UwU”

…

“a, toki jan Maja o”

taso lon la seme la tenpo suwi pi jan Jesu li ike tawa sina a a a a a

LIPUMAJA #9

jan Maja o, sina sona ala sona e ni: tenpo pini la sina toki e ni: tenpo kulupu li weka la tenpo lape lete li kama pona a

a a sina musi a jan Maja o. sina tawa ala tomo sona la tomo sona li tawa sina!

TAN tenpo lape la tomo sona li pini a. tan ni la tomo kalama li pini kin, la kulupu kalama ike pi jan Koko li kulupu lon tomo suli mi. tenpo ale la mi wile kalama musi kin, taso mi ken ala tan ni: sinpin tomo li lili a. kin la jan Pipilonkon li mu musi a tan alasa kalama mi, jan Koko li alasa pona e pakala ale mi kin.

jan ale pi kulupu kalama li lon kulupu sona mi, taso mi awen sona e nimi pi jan Koko taso. kalama ona li lon poki “kulupu ma pi kalama wawa pi ma Elopa”. nasa mute a, taso ona li tan ni: lawa kulupu li wile pali e ijo sin pi sona ala. taso ona li ni li jo ala e pona pi kalama ona a lon lawa ona. sona mi la jan Koko li sona e ni: kalama ona li ike a, taso ona li awen kalama tan ni: ona li kulupu pi jan suwi ona. jan li alasa jo mute e sitelen musi mute, taso jan Koko li alasa jo e jan suwi sama ni. sina jo e jan suwi mute mute la suli pi ona wan li seme? mi awen weka tan poka ona la mi ken toki e ni: ale pi mi ala li jan suwi pi jan Koko, NI A li wawa a a a a

ike nanpa tu li ni: jan pi linja pimeja li tawa tomo jaki. tenpo mute la mi weka tan tomo mi la mi alasa kute e ni: jan li lon ala lon nasin. taso mi ni ala lon tenpo ni. mi weka tan tomo mi la mi lukin e sinpin pi jan ni. a ken toki mi li weka a la mi awen lukin e ona, taso ona li toki ala kin. ona li lukin taso li tawa tomo pi jan Koko lon tenpo lili. jan ni li nasa ike a. tenpo ale la ona li toki lili sama mi, taso ona li suwi tawa jan li lon kulupu kalama a?? mi nasa ike namako anu seme? seme la mi ken ala jo e jan suwi?

ni li ike, taso ike nanpa wan a li ni: ona li awen lon tomo lon ale pi tenpo pimeja. mi ken ala lape tan pilin ike awen pi tenpo pini la mi kute pi wile ala e ale pi musi ona e ale pi toki ona a. ona li sama ni tawa pilin: mi kute e lipu suli suli a ni: jan pi musi ala li toki lon ijo pi suli ala a lon ijo pi musi ala. pakala a, jan li toki e olin pi jan suwi sama ni: ona li pona wawa namako a nanpa wan. taso ona li sama ala ni lon lon

nnn…

taso mi lon kulupu kalama la ni li pona tawa mi…

LIPUMAJA #10

lete awen luka
suno nanpa MLT pi mun nanpa W

nnnnnnn mi awen sitelen ala la lipu ni li pini a

mi o sona e ni: mi ken ala awen e sike ni lon tenpo ale: mi sitelen lon kulupu pi suno luka tu.
mi lukin sona e toki Nipon. suno tu wan la mi sona pona e sitelen Ilikana e sitelen Katakana li awen wile kama sona a. taso mi lukin sona e sitelen Kansi la wile mi li weka. taso tenpo ilo luka wan la mi o pana e sona lon lipu sona utala lon tomo sona, taso mi wile ala lukin sona e ijo lipu a sama toki Nipon.

tenpo lape li weka la ala musi sin li kama. taso ijo pi sin nanpa wan li ni: mama mi li toki e ni tawa mi “mama mama sina li wile e jan namako lon tomo esun ona, sina wile ala wile ona?” ona li toki e ni la pilin mi li tawa wawa a. ni li lon: mi o tawa tomo sona lon tenpo pali, taso mi wile ala tawa ma ante la mi tawa ala. ni taso li tan pi ijo ni: mi pakala ala e selo mi. mi sama kala ko nasa moli a, seme la mi pona tawa pali ni?

taso mama li toki e ni la ona li toki lon anu seme? toki lon la ona li sona ala e mi a. taso sina kama jo e meli lili namako tan ni: meli tan sina li ike, la meli ike ni li suli ala

taso olin mama mi li PAKALA ala a, ni taso li lon: sama ala jan Koko la mi wile ala e olin mute. ona li awen ken e tawa ala mi la mi jo ala e wile pi pakala selo. lon la jan pi pakala selo li nasa tawa mi, mi lukin pakala e selo mi lon tenpo wan a, taso ona li ike taso tawa pilin. ken la ike pi pilin mi li suli ala a a

TASO NI LI ANTE A! tan ni: suno luka luka luka wan la tenpo suno pi ike nanpa tu wan li lon a! wawa a! ona li lon tenpo pali kin a! mi open pakala e selo mi lon tenpo lon li awen pakala la sijelo mi li kama pakala suli tan weka pi telo loje mute, la mi ken lon ala tomo sona lon suno ike ni kepeken pakala ni a a a

LIPUMAJA #11

moli tawa luka
suno nanpa LLW pi mun nanpa T

SUNO OLIN PI JAN WALENTEN LI IKE AAAA

mun ale nanpa tu la tomo sona mi li open e ken ni: jan li esun e kasi olin la tomo li pana e kasi ni tawa jan wile lon suno olin

“a a a a a a jan Maja o, sina pilin ike tawa suno ni tan ni: jan ala li pana e kasi tawa sina”

sina sona pona ala ike o! sike ale la mi kama jo e kasi wan. ona li tan ala mije, jan Koko li pana e ona tawa mi tan ni: ona li pilin ike tan pilin mi la ona li alasa suwi e pilin mi. ona li pana e kasi pi alasa suwi tawa jan Pipilonkon kin. ala la ona li pilin ike tan sama ala a a a

taso kasi pi alasa suwi li tan ala pi pilin ike mi

lon la mi sona e tan lon pi suno """"musi"""" ni a, ona li tan ni: tomo esun li wile esun mute e poki mute pi kon suwi tawa mani mute mute mute a

ttttaso

tan seme laaaa

MI PILIN E NI LON SUNO OLIN ALE A: MI KAMA JO E KASI OLIN MUTE

mi lukin weka tan pilin ike pi wile pakala ni la mi toki e tan pi kasi wan taso tawa mi

tan ni la mi pilin e ijo ike mi lon tenpo mute lon tenpo poka pi suno olin a

ijo sama ni: mi musi ala li wile ala li jaki tawa lukin

ni li

pona ala

tawa mi

wile mi la ale li kama pona lon pini pi suno olin

LIPUMAJA #12

suno olin

lipu ni li pona

mi kama jo e kasi tu lon suno ni

ona tu li pakala lon poki jaki

ale li ike wawa lon tenpo ni

mi toki e tan lon tenpo kama

tenpo ni la mi o lukin ijo

nasin tawa luka
tenpo open pi tenpo Len

mi toki lili e ijo pi suno olin

mi kama jo e kasi olin tu la mi pilin wawa pi mute ike. taso, tenpo lili la mi open sona e ni: jan Koko li pana e kasi olin tawa jan ale pi kulupu sona. tan ni la mi kama jo e kasi tu pi alasa suwi. ni li ike lili e pilin mi… la mi pakala e ona tu a pakala

a nn ijo ni li pona lon sitelen lawa pi pilin ike mute a, li pona ala lon lukin pi jan ale lon tomo sona

jan Koko li pali e moku lon tenpo pimeja ni la mi lon tomo mi li weka e ken open pi sinpin open. taso ona li luka pakala mute ala e mi anu ijo sama. ona li tawa tomo mi li lukin pana e moku tawa mi li lukin toki e pilin ike ona tan pana pi kasi namako

ni li ike sewi e pilin mi la mi kama pilin e ni: jan Koko li wile ala pakala e mi la mi o pakala e mi. tan ni la mi moku ala lon tenpo pimeja ni li lape taso.

suno poka li awen tenpo pali la mi lon kulupu sona mi. tan pali mi pi suno olin la mi ike ike ike tawa jan ni. tan ni la mi moku ala lon open suno li moku ala lon insa suno kin. insa mi li pilin ike mute a tan moku ala lon suno ale la mi pini lili sona e ni: mi jan Maja. ni li lili lili e ike pilin mi.

mi moku sin lon pini suno tan ni: tenpo moku ni la mi lon poka mama. mi moku ala la ni li nasa mute a li kama e wile sona. taso ni li ike sin e pilin mi la mi moku lon tenpo moku pi pini suno taso lon kulupu tw pi suno lt. tan ni la suli pi sijelo mi li tawa suli MM, tenpo pini la ona li suli MMTT.. taso mi lon len suli lon tenpo ale la ala li ken lukin e lili suli mi.

taso, ALA A mi moku ALA tan ni ALA: lawa mi la mi suli ike. NI li NASA pi meli ni: ona li lon SITELEN ESUN li wile UNPA. pali mi li ni: mi tan ma Papan la tenpo musi pi ma musi li pini la mi o moku ala tan pali ike mi. mi open ni taso lon tenpo poka weka pi tenpo musi ni. kin la mi pana e telo jaki tan uta mi tan tenpo musi ni a, mi moku ala la mi ken ala pana e ijo ;d