o kama kala a

{{{sitelen “0031_jan_li_kala.png” “jan li tawa sama kala” “jan Alonola”}}}

tenpo esun ale la mi en jan mute a li tawa lon telo suli lete sama kala. ni li musi a tawa mi li pona e sijelo mi. mi wile e ni: jan mute sin li ken musi ni. taso, mi ni tan seme?

ni li pona e sijelo sina. tawa telo li pona a tawa sijelo sina. ona li wawa e sijelo sina li lili e ken pakala pi sijelo sina. lete li suli e ken pona ni.

sina ken kama sona e jan pona ante. jan mute li tawa lon telo suli lete. tenpo mute la ona li lon kulupu. sina kin li ken lon kulupu li ken kama sona e jan pona sin!

ni li weka e pilin ike. sijelo sina li pilin ike la lete li ken weka e pilin ni. kin la, ona li ken weka e pilin ike lawa.

taso, tawa telo la, sina o awen pona kepeken nasin seme?

o lete mute ala: lete li ken pona e sina, taso lete mute li ike a tawa sijelo sina. o kepeken len pona. o awen ala lon telo lon tenpo mute.

o tawa lon kulupu: sina taso li tawa lon telo la sina ken pakala. sina lon kulupu la jan ante li ken pona e sina. kin la, kulupu li ken kama e musi.

o kepeken len kule: len sina li pimeja la jan ante li ken ala lukin e sina. o kepeken len lawa kule a.

o jo e moku: sina pini tawa la o moku e ijo suwi. ni li wawa e sijelo sina.

ken la sina wile ala e ni – ken la sina wile awen seli. ni li pona kin a. taso, sina wile kama lete sama mi la – o kama kala a!