open Lapo All · Collections · Tags · Authors · Random · Add
Details

Edit on Github

Sources: lipamanka.gay

Archives: web.archive.org

telo. kasi. ko pi weka telo.

lipamanka
Feb 12, 2025

kasi li jo e telo mute a! o lukin: mi wile weka e telo, la telo li ken awen. lipu ni li pana e sona ni: kili la seme li telo?

kili la telo pi mute seme li lon? lon la, kili ale a li jo e telo mute.

sina ken weka e telo lon nasin mute, taso mi wile toki e nasin tu: seli, ko pi weka telo. sina wile kama sona e seli la ni li wile ala e toki mute. telo li kama seli la ona li kama kon li weka tan moku. sona pona!

ko li wile e sona kin. suli la, ko ni li seme? o lukin:

ko walo li lon poki ni: ona li jo e lipu lili mute. sina ken pana e ona lili taso tan lupa ni kepeken luka sina. kin, sitelen li pana e sona ni: ko ni li kiwen mute lili. kiwen li jo e leko mute. leko ni li kule tu.

ko ni li kiwen mute lili. sina ken toki e ijo mute lon kiwen ni, taso ni li suli: kiwen li lon poka telo, la ona li kama wile moku e telo li kama jo e telo ni. ko ni li lon kasi, la telo pi insa kasi li kama weka tan kasi li kama lon ko. kin: ko ni li kama lon insa kasi.

telo mute a li lon, la telo li moku e ko. sina kama ken ala lukin e ko ni. ni li sama (lili) telo ni pi suli nanpa wan: ona li jo e kala mute li lon poka ma.

o lukin e sitelen: poki, la lipu li lon. lipu ni li ken e tawa pi telo taso. sike lili li lon telo la ona li kama kiwen ala li kama lon telo. sina kama ken ala lukin e ona. telo li moku e ona. taso ona li weka ala: ona li kama ijo lili mute. ijo lili ni li ken ala tawa poka ante lipu.

poki li lon li jo e lipu. sike mute en telo li lon poka tu lipu. nanpa wan, la ona lili li lon poka nanpa wan. ona mute li lon poka nanpa tu. taso nanpa tu la poka nanpa tu li kama jo e telo mute a! sitelen li toki: lipu ni li ken e tawa pi telo taso.

ko ni li suli a tawa moku tan ni: ona li lon ala, la kule moku li wawa lili. ko ni li wawa e moku. taso o sona e ni: uta sina li ken pilin e ko ni lon nasin tu:

  • ko lili li lon li pona e moku. jan li ken pilin ni tan ni: jan li moku ala e ko ni, la jan li moli! lon la soweli ale li wile e ko ni. kala kin. waso, akesi, pipi, ale sama. la jan li wile a e ni lon moku! ko ni li jo e ijo lili tu: e ijo Na+, e ijo Cl-. ijo Na+ li SULI MUTE li kama e ni: telo pi suli pona li lon insa sina. telo pi insa sina li jo e wawa pi mute pona. ijo sama ni. Cl- li… suli mute ala.
  • ko suli li lon la o moku ala e ni. jan li moku e ko ni mute, la insa jan li ken kama pakala. jan li jo e insa mute, taso mi toki e insa ni: ona li lukin e telo loje, li kama sona e ni: mi o weka e seme tan ni? seme o lon ala? ona li ni e ko ni lon tenpo ni: ko ni pi mute ike li lon. ona li ni sike li ni lon tenpo mute a la ona li ken kama pakala.

sina o pana e ko ni pi mute pona. o sona: sina awen ken pana e ko ni lon tenpo kama. sina KEN ALA A WEKA E KO NI. mi o toki sin: sina pana e mute ike, la sina KEN ALA PONA E NI. nn lon la sina ken pana e telo mute tawa moku e kili mute sin. ni li ken pona e moku tan ni: sina suli e ijo pi ko ni ala. taso ni li pona suli ala tan ni: ni li pona ala e moku sina, la sina jo e moku MUTE ike. seme li moku e ni? sina ala. jan ante ala.

la o pana e ko ni lili lon open. o moku lili o pilin e ko ni. kin o lon anu seme? kin o lon la o pana kin!

tenpo seme la jan o pana e ko ni tawa moku? jan mute li toki lon ni. tenpo mute la ni li suli ala. moku li ken ante lili, taso ona li awen pona lon tenpo ni: sina pana e ko lon tenpo ike. o sona e ale ko. ko li weka e telo tan moku. ko li kama e telo ni lon selo moku. ni li ken weka e ken pi pimeja pona. taso telo li weka (tan seli), la ale li kama pona!

sina pali e kili, la o pana pona e ko ni. tenpo nanpa kama la mi toki e ni: ijo lili li pali lon sijelo. mi seli e ona, la ona li kama pakala! o awen!