pona len

nimi “An Angel in Disguise” la jan T S Arthur li sitelen e ni lon tenpo sike nanpa LLLTWAMMLLW. jan Asilu li ante toki e ona tawa toki pona lon tenpo sike nanpa MAML.

meli li wile ala pali. ona li moku e telo nasa mute. pali ike ante kin li lon. pini la ike pi ni ale li kama e moli tawa ona. ona li nasa pakala tan telo nasa, li alasa pana e sijelo tawa insa tomo, li anpa pakala lon lupa tomo. jan lili ona li lukin pi pilin monsuta la sijelo pi mama meli ni li moli li kama lete li lape. jan lili ale ona li lon poka li pilin pakala mute.

jan ale la pilin mute li sama. pilin ni li sama telo lon poki la moli li lupa e poki li tawa e ona tawa jan ale. meli ni li ike tawa jan mute pi ma ona. jan mute li pakala e pilin ona kepeken musi pi nasin ike. ona li lon insa pi kulupu jan la jan mute li toki utala tawa ona. jan lili ma kin li ni a. taso tenpo ni la jan ale li sona e moli ona la pilin pi jan ale li kama ante li kama pona li kama wan.

jan mute pi tomo poka li tawa tomo pi meli moli. ona li wile kama lon tomo ni lon tenpo lili la ona li tawa wawa. tomo ni li pona ala li kama pakala. tomo li awen taso e ona tan seli pi tenpo seli tan lete pi tenpo lete. namako ala li lon. sijelo moli o lon pi nasin pona lon lupa ma la len pona pi sijelo moli li lon luka pi jan kama. meli ni li mama pi jan lili tu wan. jan kama ante li kama e moku tawa ona pi wile moku wawa.

mije Jon pi tenpo sike luka luka tu li jan lili nanpa wan li jo e sijelo wawa li ken pali lon poka pi jan kasi ale. meli Kate li jan lili nanpa tu pi tenpo sike luka luka li jo e insa lawa pona li wile musi lon tenpo mute. jan li awen pi nasin pona e ona la ona li ken kama wawa lon ijo mute. taso meli Maki li jan lili nanpa pini li jo e sijelo pakala. ona li tawa anpa tan sewi la kiwen suli pi monsi sijelo li pakala la tenpo sike tu li pini. ni la tenpo ale la ona li ken ala sewi e sijelo tan supa lape. mama li jo e ona lon luka la ona li ken weka e supa lape. ona la ni taso li tenpo pi supa ala.

wile suli pi tenpo ni li ni: jan ma o seme tawa jan lili ni? mama moli li lon anpa ma lon tenpo poka kama la ona li weka tan luka pi jan ma. taso ona o awen e jan lili ale. jan kasi Jone li toki e ijo pi jan lili tawa meli ona li toki e ni: “mi wile awen e jan lili Jon. ona li jo ala e mama la mi pana e pona tawa ona.” meli ante Elisi li wile e meli tawa pali tomo la ona li awen alasa. ona li pilin e ni: jan lili Kate li lili lon tenpo ni la ona li ken ala pali lon tenpo sike kama mute. taso ni li pona: mi jo e ona la ona li kama jo e pona tan mi.

“mi sona e ni : mi ken kama jo e meli ante pona tawa pali tomo. taso jan ante li wile ala e jan lili Kate la mi o awen e ona. ken mute la ike li kama tan ona. ona li kama ala sona e nasin pona tan mama ona. taso mi o ni.” meli Elisi li toki.

taso jan ale li toki ala e ni: mi wile e jan lili Maki. jan mute li pana e oko tawa sijelo pakala ona tawa sinpin ona pi suno lili. ona ale li pilin e ni: jan lili ni li wile e pona tan jan ante. taso jan seme li ken ni. mama mute li kama e len pi jan lili ona. ona li weka e len jaki pakala tan sijelo pi jan lili Maki li len e ona kepeken len pona. pilin ike li lon oko pi jan lili Maki lon sinpin ona. oko ni en sinpin ni li ante mute e pilin pi jan lukin li pana e pilin wawa tawa ona. taso jan ale li wile ala jo e ona. jan lili li lon supa lape lon tenpo ale la jan seme li wile e ona a?

“tomo li lon tawa jan pi mani ala. tomo ni li pona tawa jan lili Maki. ni li kama ala: jan li jo e ona e ike ona.” toki ni li tan jan ni: mute la ona li ken ala sona pona e pilin pakala pi jan ante.

“jan li wile e pona pi jan ante lon ijo ale la tomo ni li pona ala tawa ona.” jan ante li toki.

“tomo ni li ken ike tawa jan lili mi anu jan lili sina. taso jan lili ni la tomo ni li ante pona. lon tomo ni la ona li ken lon pi jaki ala li kama jo e moku pona li kama jo e pona tan jan pi pona sijelo. mi ale li sona e lon ona pi tenpo pini la ni ale li pona mute tawa ona.” jan pi toki nanpa wan li toki pi kalama lili e ni.

toki ni li tan sona. taso ona li pana ala e pona pi mute pona tawa pilin pi jan mute. tenpo suno kama pi tenpo suno moli la kulupu li wile insa e sijelo moli lon lupa ma. jan pi mute lili li awen lon tomo lili pi meli moli. ona ale li tan tomo poka. jan li pana e sijelo moli lon poki pi ilo tawa li tawa e ona tawa ma ni : jan li jo ala e kulupu mama anu jan li jo ala e mani la ma ni li tawa sijelo moli ona. taso meli ni li pona ala tawa pilin pi jan mute la jan ale li tawa ala lon monsi pi sijelo moli ona.

poki pi sijelo moli li weka tan tomo la jan kasi Jone li pana e jan lili Jon tawa ilo tawa ona li tawa tomo. ona li toki insa e ni : pona a, mi ni.

“o toki e ni tawa jan lili pi mama sina : sina tawa.” meli Elisi li toki pi tenpo lili e ni.

sijelo pi ona tu li kama wan. oko ona li pana e telo. ona tu li ken ala weka li wile toki mute. taso meli Elisi li weka e ona wan tan ona ante. tenpo lili la jan ale li weka. jan pi mute lili li pana e oko tawa jan lili Maki. jan ante mute li wile wawa e ni: ona o lukin ala tawa jan lili Maki. pini la jan ale li weka a.

jan lili Maki taso li lon insa tomo. taso jan Jo Tonson pi pali sike li lon poka lupa lon weka tomo. ona li wile ala tawa tan jan lili ni. ona li lukin tawa poka la meli wan li lon. mije ona li pali e ilo tan kiwen wawa kepeken seli. ona li alasa tawa lon monsi pi kulupu meli la jan Jo Tonson li toki e ni tawa ona:

“jan lili ni taso li lon tomo. ni li ike mute a.”

“ni la o pana e ona tawa tomo pi jan pi mani ala. ona o lon tomo ni.”

meli pi jan pi pali kiwen li toki e ni li tawa wawa li weka tan jan Jo Tosan.

ona li tawa ala e noka li pilin e ni : ona o seme o seme ala. ona li awen sama ni lon tenpo lili la ona li pana sin e noka tawa insa pi tomo lili. pali pi pilin pakala mute la jan lili Maki li ken sewi e sijelo sewi tan supa lape. ni la sijelo anpa taso li lon supa. ona li pana e oko tawa lupa. kepeken lupa ni la jan ale li weka tan insa tomo tan poka ona. pilin monsuta li len lon sinpin walo ona. telo li kama tan oko tu la mu lili li kama tan uta la nena li ken ala moku pona e kon la jan lili Maki li toki wawa e ni:

“jan Tonson o.. o taso ala e mi lon tomo ni.”

lukin la jan Tonson pi pali sike li ante. lon la ona li jo e pona insa. tenpo la pona mute li kama tan insa ona. jan lili li pona mute tawa ona. jan lili li kama tawa tomo pali ona la jan Tonsan li pilin pona. tomo ni la ona li pali e ilo tawa li pana e ona tawa jan lili pi ma ona. jan lili li musi kepeken ilo ni. ilo li pakala la jan Tonsan li pona e ona. ona li ni ale la ona li wile ala e mani tan poki mani pi jan lili.

“a.. ala a, jan lili pona mi o..” ona li toki pona e ni tawa jan lili Maki.

ona li tawa poka supa li anpa e sijelo tawa jan lili Maki li toki e ni: mi weka ala e sina lon tomo ni. kama la ona li len e jan lili Maki kepeken len pona pi supa lape kepeken nasin pi mama meli. len ni li tan jan pi tomo poka. pini la ona li sewi e ona kepeken luka wawa tu li jo e ona li weka tan tomo lili ni li tawa tomo ona. ma pan li lon sama supa suli laso lon insa pi tomo ni tu la ona li tawa lon ma ni.

meli pi jan Tonsan la ona li jo ala e jan lili. pilin ona li pona mute ala li sama ala jan sewi. ona li wile ala lili e pona ona tawa pona pi jan ante. ni la jan Tonsan li sona e ni: ken mute la meli ona li pilin utala tawa ona lon tenpo pi kama ona. meli li lukin e kama pi jan Tonsan tan lupa lili la ona li pilin ike li tawa poka pi jan Tonsan sama waso pi pilin utala. taso tenpo ni la jan Tonsan li open e lupa pi nasin kama tomo li lon ma pi sinpin tomo li poka ala tawa lupa tomo a. ona li jo e ijo pi pona mute lon luka ona. ona li pilin sama ni kin. ona li poka mute e jan lili ni pi sijelo pakala tawa sijelo ona la ona li pilin e ni: pilin pona pi jan lili ni li kama tan insa pi jan lili sama linja suno tawa insa ona. olin li linja wawa e ona tu li open sama ni: kasi lili li kama tan insa ma li kama suli.

“sina jo e seme?” meli pi jan Tonson li toki wawa tawa ona.

toki ni la jan Tonson li pilin e ni : jan lili li tawa tan pilin monsuta li poka e sijelo tawa sijelo pi jan Tonson. ona li toki ala tawa meli ona. taso ona li pana e toki ni tawa meli kepeken ante sinpin: mi toki e ale lon tenpo poka. o toki wawa ala. ona li tawa supa sewi tomo li pana e jan lili Maki tawa tomo lape lili. kama la ona li weka tan tomo ni li pini pona e lupa. ona li lon weka tan tomo pi jan lili la ona li poka tawa meli li lukin tawa sinpin ona pi pilin utala.

“ike a. sina kama e jan lili ni pi sijelo pakala tawa tomo a.”

ijo sin ni li nasa la, ona li pilin e wile utala tawa pali pi mije ona la, pilin ni ale li lon kalama ona. sinpin ona li loje sama seli.

“tenpo la pilin meli li sama kiwen li ante ala tan pilin pakala pi jan ante.” jan Jo Tonson li toki.

ona li wile ala utala tawa meli ona la, mute la, ona li weka tan meli ona pi pilin utala. toki li kama utala la ona li toki ala e ijo tawa meli. ni la toki ni pi jan Tonson li pana e pilin nasa tawa meli ona. ona li lukin tawa sinpin pi jan Tonson la ona li sona e ni: tenpo toki la sinpin ona en oko ona li ante mute. ante ni li awen lon ona lon tenpo ni kin.

“taso pilin mije li sama mute tawa kiwen wawa a.” meli li toki.

kepeken tenpo lili la jan Tonson li sona e ni: nasin wawa ona li kama pona e pilin pi meli ona. ni la ona li toki pi tenpo lili e ni tan pilin wawa:

“ken la toki sina li lon. taso tomo pi meli moli la meli ale li weka sona e oko ona tan sinpin pi jan lili ni. sijelo pi mama moli li lon ilo tawa li kama weka tan tomo la, jan lili ni taso li lon tomo lili majuna la, meli ale li weka lon tenpo lili a. tenpo pi open suno la tenpo mute li pini ala a.”

“jan lili Jon en jan lili Kate li lon seme?” meli pi jan Tonson li toki.

“jan kasi Jonse li pana e ona tawa ilo tawa li weka. jan lili Kate li tawa tomo pi meli Elisi lon poka ona. taso jan ale li wile ala e jan lili ni pi sijelo pakala. ona ale li toki e ni: o pana e ona tawa tomo pi jan pi mani ala.”

“tan seme la sina ken ala e ona? tan seme la sina kama e ona tawa tomo ni?” meli li toki.

“ona li ken ala tawa kepeken noka. jan ante o jo e ona. luka mi li wawa pona tawa pali ni.” jan Tonson li toki.

“taso sina awen ala tawa. ni li tan seme? tan seme la sina pini e tawa lon ni?” meli li toki.

“mi nasa ala. open la jan awen o ken e mi. ni li nasin. ni li kama ala ante.”

“tenpo seme la sina kama lon poka pi jan awen?” pilin wawa ni li lon toki ni: ike ni o weka lon tenpo lili.

“lon suno kama.”

“tan seme la sina wile ni lon suno kama? o tawa o toki tawa ona lon tenpo ni. o pini e ale lon tenpo pimeja ni a.”

“jan Sen o…”

jan pi pali sike li toki e ni la nasin kalama ona li ken anpa e meli ona.

“tenpo la mi lukin e lipu sewi. mi lukin e toki mute lon jan lili. jan sewi Jesu li nasin e jan ona pi kama sona lon tenpo ni: jan lili li wile lon poka pi jan sewi la jan pi kama sona li ken ala e kama ona. jan sewi Jesu li seme? ona li jo e jan lili lon luka ona li pana e pona sewi tawa ona. ona li toki e ni kin: jan li pana e poki lili pi telo lete tawa jan lili la tan pali lili ni taso la sewi li pana e pona tawa ona.

ni la, ni li pali lili tan mi: mi awen e jan lili ni pi mama moli lon tenpo pimeja wana taso. mi tu li pilin e pona tawa ona lon tenpo pimeja wan taso. mi tu li pana e pilin pona tawa ona lon tenpo pimeja wan taso.”

mije wawa ni li ken ala awen e tawa pi kalama ona. ona li tawa e lawa tawa poka ante la ona li ken len e telo pi oko tu tan jan ante. meli pi jan Tonsan li toki ala e ijo. taso pilin pona li kama open lon insa ona.

“jan Sen o… o pona tawa jan lili. o toki pona tawa ona.” jan Tonsan li toki.
“o pilin e mama meli ona. o pilin e tenpo kama pi jan lili ni. ona li taso li pilin pakala li pilin ike.” pona insa ona li pana e nasin pona lon kalama ona. mute la nasin ona li ni ala.

meli pi jan Tonson li toki ala. taso tenpo lili la ona li tawa tomo lape lili ni: mije ona li pana e jan lili Maki tawa tomo ni. ona li open e lupa li tawa pi kalama lili tawa insa tomo. jan Tonson li tawa ala lon monsi ona.

ona li sona e ni: pilin pi meli ona li ante. ona li pilin e ni: meli en jan lili taso li lon tomo la ni li pona. ni la ona li tawa tomo pali. tomo ni li lon poka tomo. ona li awen pali. pini la poka pi tenpo pimeja li pini e pali ona.

jan Tonson li kama tawa tomo la ni li kama tawa oko ona lon tenpo nanpa wan: lupa pi tomo lape lili li pana e suno tan insa. ni li open pona. ona li tawa lon nasin pi poka lupa. ona li lon poka lupa li wile lukin tawa insa tomo la ona li pini e tawa. pimeja li ken len pona e ona tan lukin pi jan ante.

jan lili Maki li lon supa lape. ko li lon anpa lawa la lawa ona li lon sewi lili. ni la ilo suno li pana pona e suno tawa sinpin ona. meli pi jan Tonson li lon poka ona li toki tawa ona. taso monsi ona li tawa lupa la jan Tonson li ken ala lukin e sinpin ona. ni la ona li wile sona e toki pi ona tu la ona o lukin tawa sinpin pi jan lili Maki.

ona li lukin e ni: jan lili Maki li pana wawa e oko tawa sinpin pi meli ona. tenpo la uta ona li pana e toki lili. pilin ike li lon sinpin ona. pilin pi kama olin li lon kin. taso sitelen pi pilin utala en sitelen pi pilin pakala li lon ala. jan Tonson li insa wawa e kon li weka e ona li pilin sama ni: ijo suli li weka tan insa ona.

jan Tonson li kama lon insa tomo la ona li tawa ala tomo lape lili lon tenpo open. ona li tawa pi kalama suli lon tomo pi pali moku la meli ona li weka pi tenpo lili tan poka pi jan lili Maki. jan Tonson li pilin e ni: ona o toki ala e ijo pi jan lili. ijo pi jan lili la pilin ala o kama lon tan ona.

jan Tonson li weka e ko ma e ko pali tan luka tan sinpin kepeken telo la ona li weka tan tomo pi pali moku li tawa tomo lape lili. oko suli suno tu li lukin e ona tan supa lape walo pona. jan lili Maki li pilin olin li wile pana e pona li wile e pona lon tenpo kama. pilin ni ale li lon ale pi oko tu ona.

pilin pona wawa li kama suli mute lon insa pi sijelo sewi ona a. ni li wawa e tawa pi pilin ona a. jan Tonson li lon poka pi jan lili Maki. tenpo ni la tenpo nanpa wan la ona li lukin pona e sijelo lili lon suno pi ilo suno. ona li sona e ni: ni li sinpin pi pona lukin a. suwi pona pi jan lili li awen lon ale pi sinpin ona. pilin ike mute pi tenpo pini li ken ala pakala e suwi ona a.

“nimi sina li Maki, anu seme?” jan Tonsan li jo e luka lili suwi ona lon luka ona li toki e ni.
“lon a, jan suli o..” kalama ona li sama kalama musi suwi.
“sina pilin ala pilin pakala lon tenpo pini mute?”
“pilin a.” nasin pi kalama ona li toki e ni: ona li ken awen pona lon pilin ike mute pi tenpo pini mute. ken ona ni li suwi a.
“jan pi pona sijelo li kama ala kama lon poka sina?”
“tenpo pini la kama.”
“tenpo poka la kama ala, anu seme?”
“lon a, jan suli o..”
“sina pilin ala pilin pakala?”
“tenpo la pilin. taso tenpo ni la ala.”
“tenpo seme la sina pilin pakala?”
“open suno ni la poka mi li pilin. sina jo e mi la monsi mi li pilin.”
“sijelo li kama sewi la anu ona li tawa ma ante la sina pilin, anu seme?”
“pilin a.”
“poka sina li pilin ala pilin lon tenpo ni?”
“ala, jan suli o..”
“mute la ona li pilin pakala mute, anu seme?”
“pilin a, taso tenpo mi pi supa ni la mi pilin ala.”
“supa ko ni li pona tawa sina?”
“pona mute a, jan suli o.. ni li suwi mute a.”
nasin toki ona li toki e ni: ona li pilin pona mute lon tenpo ni li wile toki pona e ni tawa jan pi pana pona.

“moku li lon.”

meli pi jan Tonson li toki e ni li lukin tawa tomo. jan Tonson li pana e lukin tawa sinpin pi jan lili Maki tan sinpin pi meli ona. meli li ken sona e wile pi jan Tonson li toki e ni:

“ona li ken awen. open la mi tu li moku. kama la mi pana e moku tawa ona.”

ona li alasa pana e pilin ni tawa mije ona: ijo pi jan lili li suli ala tawa mi. taso mije ona li lukin e ona tan lupa lili lon tenpo pini. ni la ona li ken sona e lon ala pi pilin ni.

jan Tonson li lon supa moku la ona li pilin e ni: meli o open e toki pi ijo ni: ona li suli nanpa wan tawa ona tu. taso meli li toki ala e ijo ni lon tenpo mute. ni la jan Tonson li awen e uta ona tan toki pi ijo ni. ona li pilin e ni: meli li awen sama ni lon tenpo poka kin. taso pini la nasa la meli li toki.

“jan lili la sina seme lon tenpo kama?”

“tenpo pini la mi toki e ni: ona li lon tomo pi jan pi mani ala lon tenpo poka. mi pilin e ni: sina sona e ni.”

ona li toki sama ni: ona li pilin nasa tawa toki pi meli ona.

meli li lukin nasa tawa sinpin pi mije ona lon tenpo lili. kama la ona li anpa e lukin. ona li toki sin ala e ijo ni lon tenpo moku. moku li pini la meli li seli lili e kipisi pan li pona e ona kepeken telo walo kepeken ko jelo. kin la ona li pali e telo pi ko kasi. moku li lon supa lili la ona li kama e moku ni tawa jan lili Maki. ona li pilin e wile moku wawa la ona li moku pi pilin pona mute. meli pi jan Tonson li awen jo e supa lili lon luka ona.

“ni li pona ala pona?”

moku li pana e pilin pona mute tawa ona la meli pi jan Tonson li toki e ni. jan lili li anpa e poki tan uta ona li toki kepeken lukin pi pilin ni: ona li wile toki anu pana e pona mute tawa meli ni.

lukin ni li pana e lon sin tawa pilin ona pi olin mama. pilin ni li lape sama jan moli lon tenpo sike pini mute.

“pona sijelo ona li lili mute. ona li wile e pona pi jan ante. ni la mi awen e ona lon tenpo suno namako pi mute lili.” meli pi jan Tonsan li toki.

toki ni li tawa mije ona tan ni: tenpo pi moku open la ona li toki e ni: mi o tawa tomo o lukin e jan awen o toki e ijo pi jan lili Maki tawa ona.

“ona li lon poka la sina ken pilin ike lon pali.” jan Tonsan li toki.

“tenpo suno pi mute lili la ni li ijo suli ala tawa mi. mi pilin e pilin pi jan lili ni la mi pilin ike a.”

jan Tonsan li tawa ala tomo pi jan pi mani ala lon tenpo suno ni lon tenpo suno kama lon tenpo suno kama nanpa tu wan. lon li ni: jan lili Maki la jan Tonsan li tawa ala tomo ni lon tenpo ale. tenpo suno luka tu li pini ala. taso meli pi jan Tonsan li pilin e ni: mi ken lon tomo pi jan pi mani ala. taso mi ken ala pilin ni: jan lili Maki li lon tomo ni lon tenpo suno wan taso.

jan lili ni la sijelo ona li pakala. ona li wile e ijo la ona li wile e pona pi jan ante. taso ona li kama e pona pi mute suli e pilin pona pi mute suli tawa tomo pi jan ni: jan Jo Tonson pi pali sike. lon tenpo pini mute la pilin ike en olin ala en pilin taso li lon tomo ni. meli ona li wile pana e olin ona e pona ona tawa jan lili. taso ona li jo ala e ni la pilin pi meli ni li pakala. ona li pilin utala. nasin ona li kama ike. ona li ike e pilin ona.

tenpo ni la jan lili ni pi sijelo pakala li lukin pi pilin pona mute tawa ona la suwi pi lukin ni li pana e pilin tawa ona. pilin ni li sama telo suwi tawa kon ona. ni la ona li jo e jan lili ni lon luka lon insa pi pilin ona kin sama ni: ona li jo e ijo pi mani mute.

jan Jo Tonson la lon ona li kama pona mute. jan mute pi tomo poka li pilin pona. taso pilin pona pi jan Jo Tonson li mute nanpa wan. kon sewi li kama tawa tomo ona. taso lukin la ona li sama jan lili ni: sijelo ona li pakala. pona pi jan ante li lon ala la ona li ken ala awen. ona li lon pi pilin ike. taso ona li pana e suno pi pilin pona lon insa pi tomo ni. tenpo pini la ma mute pi insa tomo li pimeja pi pilin ike.

PINI.