Details
Edit on Github
Description: mi toki pona e lipu "The Last Question" pi jan Issac Asimov. ona li toki lon tenpo kama jan, lon pini ale.
Tags: ao3
Sources: archiveofourown.org
Archives: archive.ph
Notes: mi nasin Markdown e lipu open pi nasin HTML · mi sitelen Lasina e lipu li weka e sitelen ni → ona li nasin e lukin pi sitelen pona
sona nanpa pini
!!! note ilo sina li jo e nasin nanpa la lipu ni li pana e sitelen pona.
**sina wile lukin e sitelen Lasina taso e namako ona (. , ?) la o luka e nena "Hide Creator's Style" pi sewi lipu.**wile pi sona nanpa pini li open, lon musi lili, lon tenpo sike nanpa mute ale mute mute mute wan.
tenpo li suli mute tawa jan.
wile li kama tan musi pi esun mani tan jan pi telo nasa, lon nasin ni:
jan Alekante Ete en jan Potan Lupi li awen pona e ilo Mosipa.
ilo li kama suli pi mute ike tawa jan la ona li sona lili taso e insa ona e nasin pi lawa ona.
jan li ken ala ante pona e ilo Mosipa lon tenpo pona la ona li kama pona sin kepeken ona sama.
ni la jan Ete en jan Lupi li pali lili taso e ona.
ni taso li ken jan.
ona li pana e sona tawa ona, li ante e toki jan tawa toki ona li ante e toki ona tawa toki jan.
ona, en jan sama, li pona lon lawa kulupu sama ilo Mosipa.
ilo Mosipa en jan li pali e ilo tawa mun e nasin pi tawa mun lon tenpo suli la jan li kama lon mun pi ma ona lon mun suno tu.
taso, wawa ma li mute lili.
tawa mun li wile moku e wawa pi mute ike.
jan li pali e ilo pona la kiwen ona li ken wawa mute,
taso mute li ken ala awen.
taso ilo Mosipa li kama sona tawa wile pi sona suli.
wile li kama lon lon tenpo sike nanpa mute ale mute mute mute wan.
jan ale li kepeken wawa suno.
seli kiwen li pini.
ilo mun lili li open.
wawa ale li tan seli suno.
ale li awen pona lon tenpo suno luka tu.
jan Ete en jan Lupi li weka tan tomo pi jan mute, tawa insa ma pi jan ala.
lili sinpin pi ilo suli Mosipa li lon ona.
ilo Mosipa en mije tu li lape.
ona li wile ala pini e lape ilo lon tenpo open.
ona li jo e poki telo.
ona li wile lape taso lon poka ona.
jan Ete li toki e “ona li pona mute a,“
sinpin lawa suli ona li jo e nena majuna.
ona li tawa lili e telo ona e kiwen telo kepeken palisa kiwen.
”wawa ni li wile ala e moku kiwen.
ma ale li kama telo kepeken wawa la wawa li awen lon.
jan li ken kepeken wawa lon tenpo ale.”
lawa pi jan Lupi li tawa poka.
ni la ona li wile utala e toki ike.
ona li toki e “tenpo ale ala.”
“a, a, sama tenpo ale.
lon tenpo pi pini suno,
jan Po o.”
“ni li tenpo ale ala.”
“a, tenpo sike wan ale ale ale ale ale.
sina pilin ala pilin pona?”
jan Lupi li luka e linja pakala ona li moku lili e telo.
”tenpo sike wan ale ale ale ale ale li tenpo ale ala.”
“a, ona li awen lon tenpo jan, anu seme?”
“wawa kiwen li sama.”
“lon,
taso ilo mun ale li ken tawa mun weka lon tenpo mute kepeken ilo pi wawa suno taso.
ona li ken ala ni kepeken kiwen.
toki mi li nasa tawa sina la o toki tawa ilo Mosipa.”
“mi wile ala toki tawa ilo Mosipa.
mi sona e ni.”
kalama pi jan Ete li kama wawa.
”ni la o toki ike ala e pali pi ilo Mosipa.
ona li pona.”
“mi toki ike ala.
toki mi la suno li awen ala lon tenpo ale.
jan li ken awen lon tenpo wan ale ale ale ale ale,
taso ona li pini la jan o seme?“
jan Lupi li lukin utala e ona.
”o toki ala e tawa jan pi suno ante.”
kalama li pini lon tenpo lili.
jan Ete li moku lili taso.
lukin pi jan Lupi li kama pini.
ona li lape.
lukin pi jan Lupi li open.
”sina wile toki e ni.”
“mi wile ala.”
“sina wile.
nasin lawa sina li nasa.
sina sama jan pi sitelen ni.
telo sewi li kama la ona li tawa kasi palisa.
ona li pilin monsuta ala.
kasi ni li pakala tan telo la ona li tawa kasi ante.”
“mi sona,
o kalama wawa ala.
suno li pini la suno ante li pini kin.”
jan Lupi li kalama lili.
”sina toki lon.
ale li open lon tenpo open, lon tenpo wan.
kin ale li pini lon tenpo pi pini suno.
suno mute li kama pini lon tenpo lili.
a, suno suli li awen ala lon tenpo suno wan ale ale ale ale.
suno jan li awen lon tenpo suno wan ale ale ale ale ale,
suno lili li ken awen lon tenpo suno mute ale ale ale ale ale.
taso tenpo ni li pini la ale li pimeja.
ken pi pali wawa li wile pini.”
jan Ete li wile ala anpa.
”mi sona ale e nasin ken.”
“sona ala.”
“mi sona sama sina.”
“ni la sina sona e pini kama.”
“lon.
seme li toki e ante?”
“sina toki,
jaki o.
sina toki e ale wawa.
sina toki e tenpo ale.”
jan Ete li wile toki utala kin.
”ken la jan li ken pali sin e wawa.”
“ala.”
“tan seme?
lon tenpo wan.”
“ala.”
“o toki tawa Mosipa.”
“sina o toki tawa Mosipa.
mi wile lukin.
mi en sina li esun e mani luka tawa jan pi toki pona.”
jan Ete li nasa tan telo la ona li wile sona,
taso nasa li lili la ona li awen ken toki pona tawa ilo.
ona li ante e toki ni tawa ilo:
“suno li moli la jan li ken ala ken sin e ona kepeken ala weka wawa?”
anu toki pona li ni:
“ken pi pali wawa li ken awen lon nasin seme?”
suno pi ilo Mosipa en kalama ona li pini.
jan ilo li pilin monsuta lon tenpo suli.
ilo lipu sinpin li open li pana e nimi luka wan ni:
“sona ala li tawa toki pona.”
jan Lupi li kalama lili.
”esun ala.”
ona tu li weka li tawa wawa.
ona li kama sona ala e tenpo ni lon tenpo suno kama, tan ike pi telo nasa.
jan Jewi en jan Jelosi en jan Jelote nanpa wan en jan Jelote nanpa tu li tawa lon selo ale kepeken ala tenpo.
nasin tawa pi selo ale li ken e tawa suno.
ona li lukin e supa sitelen.
sitelen mun ona li kama ante,
mun suli wan li lon insa supa.
jan Jewi li toki pona e “ni li mun E nanpa mute tu wan.”
luka lili ona li kama wan lon monsi ona li kama walo.
tawa pi selo ale li sin tawa meli lili tu Jelote.
ona li pilin nasa tan ona.
ona li tawa sike musi lon poka pi mama ona, li kalama musi li kalama wawa mute e “mi kama lon mun E nanpa mute tu wan!”
jan Jelosi li toki wawa e “o pini e kalama,
lili o."
"sina sona ala sona pona,
jan Jewi o?”
jan Jewi li toki e “seme ante li ken?“
ona li lukin e nena kiwen pi sewi tomo.
ona li palisa li suli sama tomo.
jan Jewi li sona lili taso e palisa ni,
ona li ilo pi nimi Makopa;
jan li ken toki e wile sona tawa ona;
jan li toki ala la ona li awen tawa e tomo tawa ma wile; li awen moku e wawa tan ilo mun mute; li awen kama sona e nasin tawa pi selo ale.
jan Jewi en kulupu ona li ken awen taso lon tomo jan tan pona ilo.
jan wan li toki e kon pi nimi Makopa tawa jan Jewi,
pini Pa pi nimi ona li toki e nimi Pa,
taso ona li kama weka e sona ni.
jan Jelosi li lukin e supa sitelen.
lukin ona li jo e telo.
”mi ken ala pilin ante.
mi weka tan ma Tela la mi pilin ike.”
jan Jewi li toki wawa.
”tan seme a?
ala li lon ni.
ale li lon mun E nanpa mute tu wan.
sina wan taso ala.
jan wan ale ale ale li lon mun.
a, mute jan li kama suli lon mun E sama ma Tela la lili pi lili mi li alasa e ma sin kin.”
toki ona li pini lon tenpo lili.
”o sona:
ilo li kama sona e nasin pi tawa mun lon tenpo pi mute jan la ale li pona.”
jan Jelosi li awen pilin ike.
”mi sona,
mi sona,”
jan Jelote nanpa wan li toki poka.
”ilo Makopa mi li ilo Makopa pi pona nanpa wan.”
jan Jewi li luka e linja ona.
”mi pilin sama.”
jan Jewi li jo e ilo Makopa li lon ala tenpo pini la ona li pilin pona.
tenpo pi mama ona la ilo li suli taso.
mun ale li jo e ilo wan taso.
ona li ilo pi nimi Munpa.
ona li kama suli mute lon tenpo suli,
taso pona ale li kama lon tenpo wan.
insa ilo li kama lili mute la ona li kama ken lon tomo wan taso.
ilo majuna Mosipa li kama sona e nasin pali pi wawa suno,
ona la ilo Makopa li suli mute.
ilo Munpa pi ma Tela li kama sona e nasin tawa pi selo ale li ken e tawa suno,
ona la ilo Makopa li suli sama.
ni la, jan Jewi li pilin pona.
jan Jelosi li kalama kon.
”mun mute,
ma mute.
kulupu li tawa ma sin lon tenpo ale, sama mi.”
kiwen uta pi jan Jewi li len ala.
”tenpo ale ala.
ale li pini lon tenpo wan,
taso lon tenpo weka.
lon tenpo wan ale ale ale ale ale.
wawa suno kin li pini,
sina sona.
ken pi pali wawa li wile pini.”
jan Jelote nanpa tu li kalama sama soweli lili.
”ken pi pali wawa li seme,
mama o?
ona li wile pini tan seme?”
“suwi lili o,
jan li ken pali e wawa tan ale,
taso pali wawa li pini lili e ale.
ale li pini, sama wawa pi ilo musi lili sina.”
“mi pana e poki wawa sin tawa ilo mi,
sina ken ala ken ona tawa ale?”
“suno li poki wawa.
ona li weka la, poki wawa li lon ala.”
jan Jelote nanpa wan li kalama ike sama soweli alasa pi tenpo pimeja.
”o ken ala e ni,
mama o.
o ken ala e pini suno.”
jan Jelosi li kalama lili tawa jan Jewi.
”sina ike.”
jan Jewi li kalama lili kin.
”mi o sona e pilin monsuta ona tan seme?”
jan Jelote nanpa wan li kalama wawa.
”o toki tawa ilo Makopa,
o toki e nasin pi sin suno.”
jan Jelosi li awen toki tawa jan Jewi.
”o ni,
ona li pini e kalama ona.”
jan Jelote nanpa tu li open e kalama ike kin.
nena luka pi jan Jewi li tawa sewi.
”a, a, lili o.
mi toki tawa ilo Makopa.
o pilin ike ala,
ona li sona.”
ona li toki tawa ilo Makopa.
”o lipu e sona sina.”
ona li pana e lipu tawa poki ilo li kalama pona.
”a, ilo Makopa li pali e wile ale lon tenpo pona la o pilin ike ala.”
jan Jelosi li toki.
”a, lili o,
tenpo lape li kama.
sina kama lon tomo sin sina lon tenpo poka.”
jan Jewi li lukin tu e nimi lipu:
“sona ala li tawa toki pona.”
ona li pakala e ona.
nena ona li tawa sewi.
ona li lukin e supa sitelen.
mun E nanpa mute tu wan li kama.