pana nimi la mi ike

jan Pin li lon. ona li toki e ni: “jan pi pali ale o! mi jan ala! o ante e sitelen sina”

a! pakala! mi ken ala ante :( kin la mi jan ala. mi kulupu mun. sina jan ala la sina seme?

n, ijo Pin li toki e ni: “pona! mi ijo :)”. pona mute a! taso mi o awen sitelen. o toki ala tawa mi, o pakala ala e sinpin tu tu.

taso ijo Pin li sona ala e toki mi. “sinpin tu tu li seme?”. O PINI TOKI TAWA MI “a! mi pini mi pini :< ” a a a sina Pini- a! mi o awen sitelen.

ijo Pin li lon ma. jan pi ma ni li toki e toki pona. (ante la mi en ijo Pin li ken ala toki). kijetesantakalu mute li tawa ma ni. kasi li laso sama sewi. soweli lili li suli la suli soweli li lili. ona li moku. kin la, ona li moku. jan li moku e telo li telo e moku. sewi li kama pimeja la jan mute li tawa tomo ona. taso jan pi kama toki li alasa tawa e tomo ona. jan sitelen li ken pali e sitelen anu toki… ona li ken ala anu e ni. jan li wile toki ike. taso ona li ken ala. jan pi lawa wawa li alasa e nasin pi toki ike. tomo li ken tawa li lon nasin pi ilo tawa. ni li pona tan ni: ona wile tawa mute la ona li ken lape li ken tawa lon tenpo sama.

ale li tan ni: mi alasa toki e ni: ale li nasa pona. taso ijo Pin li pilin ante. ona la ni li nasa ala. nasa ala li musi ala tawa ona. ona li wile tawa ma namako. tawa ni li sama lipu tawa: ona lukin e ma mute, li utala e jan ike, li kama wawa… ijo Pin li wile ante sama ni.

tenpo suno li open. ijo Pin o tawa tomo sona sewi. ona li pini e lape ona li moku e kili li weka e tomo ona. tomo sona sewi li suli mute a! lon ma en tawa jan. jan mute li pana li kama lon e sona. jan pi sona kule li kama lon e kule sin: “mije” en “meli”. ken la ona li kama suli… jan ante li wile pali e ijo pana pi suno kalama. ona li toki e ni: “mi o pali o pana e toki kepeken suno lon tenpo suno likujo ale”. ona li awen toki. “nanpa pi musi Mawijo” “musi pi nasin kalama”… nasa.

taso ijo Pin li ijo pi kama sona taso. ona li sona lili la ona li kama lon ala e sona. tenpo ni la ijo Pin li lon tomo pi sona toki. jan (?) (msa) sona li toki e nasin pona toki. tenpo ni la nasin ni li toki kepeken nimi “kepeken”. ijo Pin li musi ala la ona li sitelen lawa e wile ona. sitelen lawa li pona mute la ona li wile sitelen e ona. ni la ona li kepeken e ilo sitel- “seme? o toki kin.” …sina toki ala toki tawa mi? “mi toki tawa sina. o. toki. kin” nnn, ‘ona li kepeken e il- “KEPEKEN TASO. o weka e nimi “e”. sina kute ala e sona mi anu seme?” mi lon tomo sina ala a! “ni li ken ante” seme????? A!!!! MUN SUNO PI MUSI MAWIJO?????? SEME??? O WEKA!!! NI LI TOMO MI!!! SINA O LON LIPU SITELEN AAAAAAAAAAAAAAAAAAAAAA-

[mi o len e utala ni] [kalama nasa mute sama “boing” “kaplush” li lon]

pakala… mun li wawa li ken utala. kin la ona li ken ante e ale. selo suwi li len e monsuta wawa…

ona li kepeken ilo sitelen. tasoona, mun pi pana sona, ona li sona ale. ni la ona li toki: “ijo Pin o! o kute e mi kin. sina ken sitelen lon tomo sitelen. ni li lon tenpo poka”. ijo Pin li wile ala. ona li sona e toki sama usawi. ona li toki e ni la mun li kama toki lon tenpo suli. ni la ona li ken awen sitelen. “mi sitelen e ni: wile pi mi”. “mi o toki kin e ni anu seme? nimi “pi” li nimi pi pana nimi ala! ala! ona li ken ala toki e nimi wan taso kepeken ni! nimi “pi” li kama lon e nimi suli sin. ni la sina ken ante e nimi suli ni…” ona li toki MUTE. mi wile ala sitelen e toki ona ale.

ijo Pin li sitelen lon tenpo pi sona toki ale. ona li awen sitelen lon tenpo sona mute. taso tenpo pi sona nanpa la ona li pini e sitelen. nanpa li pona tawa ona. kin la ona li jo e ilo nanpa. pona mute a!

ijo Pin li kama tomo ona. ona li pilin e ni: “aaaa! mi ken ala awen lon ale ni. mi tawa. lon tenpo ni.” ni la ona li jo e poki monsi. ona li poki e ijo suli tawa ona: moku (pan en soweli), en telo (nasa ala), en len suli (li sama jan usawi), en linja (lawa ala, lawa ona li jo e ni.), en lipu pi tomo lipu (ken la ona li wile lukin e lipu. ni li suli a!). ona o tawa noka tan ni: kulupu mama ona li awen lon tomo ona.

taso ona li sona ala e ni: sina tawa seme? lon la ona li weka ala e ma ona lon tenpo pini. ni la ona o alasa e nasin pi weka ma. jan mute o alasa e ni la ona li alasa e lipu ma. taso ijo Pin li tawa tomo usawi. len ona li tan ni: ona li lukin sama jan usawi la ona li ken kama lon tomo ona. len ona la jan pi lupa tomo li lukin ala e lipu ona la ona li lon insa tomo!

ona li tawa wawa- jan li ken ala sona e ni: ona li ken ala lon tomo ni-. ona li lukin lon tomo ale: “usawi ante? nn ala. usawi sewi?? ala a! usawi lete-seli-wawa? mi wile… taso ala a!”. tenpo mute li tawa la ona li pilin ike. “aaaaa tomo ni li suli tan seme a!!”. “usawi tawa li lon seme a??”. ona li lukin ala e ni: jan li lon poka. ona li toki “a. sina li ken ala lon tomo ni anu seme?”. ijo Pin li pilin e ni “pakala pakala pakala”. taso ona li toki e ni: “mi anu seme? mi ken mi ken a a. mi, n, sin lon tomo”. jan ante la toki ona li lon ala. “o pana e lon. mi li ken ala lon tomo ni kin. jan lupa tomo li open e tomo tawa mi tan ni. mi jan Usawi. ona la jan usawi en jan Usawi li sama a a a. usawi mi li sama ala e usawi ona!”. ni li pona e pilin pi ijo PIn. “a, pona. mi wile tawa. taso mi ken ala alasa e tomo pi usawi tawa. sina sona ala sona?”. “mi sona ala. taso mi ken pana e lipu tomo tawa sina. sina wile ala wile?”. “mi wile a! pona tawa sina”.

ijo Pin li tawa kepeken lipu tomo li kama lon tomo pi usawi tawa. tomo ni la ona li lukin e palisa. toki li lon poka palisa: “o luka ala! ni li sin la ni li ken pana ike!”. ijo Pin li kute ala. ona li jo e palisa usawi li tawa e ni li wile usawi… taso palisa li awen. ni li sama palisa ale. ijo Pin li lukin kin lon tomo tan ni: ona li wile kepeken e palisa usawi. ona li alasa ala e ijo pi kepeken palisa. taso ona li lukin e ijo ante. toki li lon poka ni kin: “ilo lupa pi ma ante. o weka ala e kon kepeken ona, ni li ilo lupa ante. sina wile e lupa pi ma ante la o anpa e nena loje”. ijo Pin li pilin pona! ona la ijo ale o pona tawa kepeken, sama ijo ni. ona li anpa e nena la lupa li open. ona tawa lon lupa.

sona pi tenpo poka ni li weka tawa lawa ona. ona li sona e ni: tenpo wan la ona li tawa lon lupa, taso tenpo tu la ona li pini e lape lon ma ante.

ona li sewi li lukin e ale. kasi lili li lon ma ni. ma weka la ona li lukin e tomo. ni la ijo Pin li tawa ni. tawa la ona li lukin e jan. ijo Pin li wile toki la ona li toki e ni “toki a! mi lon seme?”. taso jan li sona ala e toki ona. jan li toki e ni: “uhm what are you saying? are you from like another country? how did you even end up here. yknow what I have time to kill I’ll just take you to the local linguistics club”. mi en ijo Pin li sona ala e toki ni. taso jan li “toki” kepeken luka. ni la ijo Pin li sona e ni: jan li wile e ni: ona tu li tawa.

jan en ijo li tawa kepeken ilo tawa linja. jan mute ante li lon ilo ni, taso ona li toki ala kepeken ona. tenpo lili la jan en ijo li lon tomo pi sona toki. jan li toki e ni “uhm hello so I found this fella when I was walking around and they speak a language I don’t understand. can you help?”. jan pi sona toki li toki e ni: “okay let’s see if anyone here can talk with them”. tenpo mute la jan ale pi sona toki li toki tawa ijo kepeken toki ale pi sona ona. taso ona li ken ala toki. ona li wile pini la jan sin li kama. ona li pali e toki sin li toki e ni: “hi yall whatcha doin?”. “oh there’s just this person that apparently just appeared that doesn’t speak any language we know”. “oh I see. I’ll try to talk to them”. jan li lukin e ijo Pin. ijo Pin li sona e ni: ona li wile e ni: ijo Pin o toki. “toki a! jan sin o! sina ken ala ken sona e toki mi?”. jan sin li sona a! ona li toki e ni “omfg no way your speaking toki pona. ejem. toki a! sina wile toki e toki ante anu seme?” “ala. toki pona li toki mi taso. mi sona ala e toki Epelanto anu ante.” “sina sona e toki sin taso anu seme?” “toki sin? ni li seme a?” “…toki sama toki pona? toki li tu: toki mama en toki sin. sina sona ala sona?” “ala. toki pona li toki mama mi. mi kama kepeken lupa usawi.” “a”. jan li toki tawa jan ante “I’d say they’re messing with you but they seem to at least believe they’re saying the truth. apparently toki pona, a conlang, is their native language, and they came here through a portal. I’ll try to teach them english though”. jan pi toki pona la ijo Pin li pilin pona. ona li ken toki tawa jan! ma ni li nasa pona a! jan li toki e toki ante. “toki Inli” li nimi pi toki ni. nimi MUTE li lon toki ni. nanpa mute kin! ni li pona mute tawa ona.

tenpo mute li kama la ona li ken toki (lili) e toki Inli. taso ona li pilin ike tan ni: ona li pilin weka e ma ona. ni la, ona li wile kama kin kepeken palisa usawi- “ALA. MI WILE AWEN LON MA NI >:( ”. a? n. pakala. mi sona ala e ni: sina wile e ni. lipu mi la sina kama kin lon ma pi toki pona. “lipu li suli ala tawa mi. mi o awen. ma ni li pona tawa sina la o weka lon ma ni.” 🙄 sina ken awen. “yipee” ona toki.

tenpo sike mute li kama. ona li pali “accounting” lon ma ni. ma ni li nasa pona tawa ona. lipu “taxes” li pona tawa ona: sina o sitelen e nanpa! pona mute a! mani li lipu li kiwen. mani pi ma sina li sama len sijelo-lawa. ale li pona tawa ona lon ma ni. ike wan li lon. jan mute la ona li jan kin. ala! ona li ijo. taso ona li ken tonsi. jan li ken sona e ni. ken.

ijo Pin li kama pilin pona la toki ni li pini