"mi o pali lon tenpo sike kama"
tenpo sike #LLT mi la, mi wile kama pona. ni la mi alasa pali pi tomo sona li alasa pona e tenpo mi. mi kama pona tawa tenpo sike pini li kama sona e nasin pali.
tenpo sike #LLTW mi la, mi wile kama sona e kon mi. ni la mi toki insa mute li toki mute tawa jan poka. lukin la mi pali ala, taso ni li pana e nasin tawa mi.
tenpo sike ni la, mi kama wile pi tenpo kama li open alasa e ni: mi o seme lon tenpo kama.1 mi open pali tawa tenpo kama. tomo sona la mi lon kulupu pi pali lipu li alasa pona tawa jan ante. mi sitelen e lipu sona tawa utala sitelen lon tenpo mun #LW. mi sitelen tawa utala musi pi toki pona lon tenpo mun #LT. mi wile lon utala HAFS MIMUN taso mama la mi ken ala.2 mi wile sitelen e toki musi pi lon ala tawa utala 숨은 작가 찾기 대회 tan lawa pi tomo sona lon ma mi.
taso ni ale la mi pini ala. mi open pali li ken awen pali taso mi ken ala pini tan ijo. mi toki e ni: ‘mi o pini pali o pana e ijo lon tenpo sike kama’
ken la, jan li pilin e ni: mi pali ala. taso mi la, pali mi pi tenpo sike ni li ante li suli. tan la, tenpo pini la mi pali tan musi taso tan tenpo kama weka pi… sona ala. mi wile ala pali la, mi pini e pali li open e pali sin li sike e open e pini tan pilin. taso tenpo lon la, mi pali tawa musi taso ala li alasa e ijo. tenpo la, wile pali mi li weka. taso mi awen pali e ken mi.
tenpo pali li pini la, tenpo mute la mi pini ala e ona. tan li ni: nanpa wan la, mi jo ala e tenpo o pali e ijo ante tan ni. nanpa tu la, mi wile wawa e sona mi la mi wile pali lon tenpo ante. mi awen wile pali lon tenpo poka. mi awen toki insa e ni: mi o seme e pali.
pali li pini ala la, mi kama sona e ijo. tenpo mun #LW la mi alasa e ijo kepeken linluwi kepeken ilo Sasipisi kepeken lipu sona. ken mi pi kepeken ilo li kama wawa. kin la, tenpo nanpa wan la mi awen pali lon tenpo ni: mi wile lape. tenpo mun #LT la tenpo nanpa wan la mi sona e nasin pi toki musi mi lon tenpo ale. mi kama sona e nasin pali pi toki musi. tenpo mun ni #LTW la mi pali e ala tan utala HAFS MIMUN taso mi wile kama sona e ni: nasin seme la jan li ken awen e toki pi ken moli. utala sitelen la mi sitelen e ijo suli tawa mi li toki insa e ni: mi seme. lon la mi ken kepeken ni tawa sitelen.
ni la, mi wile toki e ni: tenpo sike #LLTT mi la, mi kepeken nasin pali pi tenpo sike #LLT li kepeken kon pi tenpo sike #LLTW li open pali tawa tenpo kama mi.
Footnotes
-
tenpo kama la mi o weka tan tomo mama o pali o kama mani, anu seme? ni la mi ken kalama suli anu seme. AAAAA IKE ↩
-
ona li toki e ni: nasin seme la kulupu li ken awen e toki pi ken moli? ni li pona a tawa mi. tenpo mute la ni li lon ala utala ni. kin la utala ni li tan tomo sona pi wile mi. ni la mi wile wawa lon ni taso mi ken ala. IKE A ↩