Details
Edit on Github
Description: toki jan nanpa open lon lipu "ma suno".
Tags: story original short story
Sources: sijeni.li.pona.la
Archives: web.archive.org
olin mama
jan Nuwa li lili la mama ona li moli.
ona li lon tomo ala lon kulupu ala. suno mute la ona li moku ala. pimeja mute la ona li len tan jan ike. taso, pimeja wan la, kulupu ike li jo e ona, li toki e ni: “sina pali tawa mi la, mi pana e moku. pali sina li ike la, mi moli e sina!” jan Nuwa li pali. ona o weka e mani tan jan wawa o pana tawa kulupu. ona li pali pi mute ike, li kama jo e pana lili. taso, kulupu ike li suli la, jan Nuwa li ken ala weka.
pali sin la ona o weka e mani tan jan lawa Ete. monsuta a… jan tu ante li awen e jan Nuwa. taso, ona li kama jo e mani lon tomo lawa la, jan tu li kama weka. jan utala li jo e jan Nuwa li awen e ona lon poki lon anpa ma.
mun mute li pini la, jan utala li kama e jan Nuwa tan poki. jan Nuwa li lon insa tomo. jan mute li lukin e insa. insa la jan ante li lon poka ona. sinpin pi jan poka li lukin e anpa taso li pana e pilin ike a. jan wawa li awen lon supa suli, li toki e nimi pi jan poka wan. jan nimi li kama. jan ante li tu e sijelo ona. jan li moli. jan wawa li toki e nimi jan sin. jan li kama, li moli. jan wawa li toki e nimi Nuwa. jan Nuwa li pilin monsuta a! lili la ona li tawa. ona li wile ala moli. ona li wile weka tan tomo, taso jan mute li lukin.
jan Nuwa li kama la, jan wan li toki wawa.
“o pini.”
toki li tan jan lawa Ete.
jan Ete li kama tan kulupu, li lon poka pi jan Nuwa.
“jan ni li lili. ona li pali tan ike pi jan ante, taso ike li lon ala jan ni. ona li ken pona. o moli ala e ona.”
jan wawa lon supa li toki:
“lawa li lawa. ona li ike tawa lawa la, ona o moli sama jan ale. mi ken ala ante e lawa a!”
jan Ete li lukin e jan Nuwa.
“lawa li toki mi. mi awen e jan lili ni.”
jan Ete li weka. jan Nuwa li tawa ona.
ni la, jan Ete li kama mama e jan Nuwa. jan Nuwa li lon tomo suli ona, li ken moku mute, li lape lon supa suwi. mama Ete li weka lon tenpo mute, taso ona li suwi li pana e wile ale tawa jan Nuwa. lon weka pi mama Ete la, jan Molika en jan Asawen li lon poka, li toki li musi. jan Ete en jan Molika en jan Asawen li tan mama sama. jan Asawen li pana e sona utala pona; jan Molika li seli e pan suwi a. jan Nuwa li pilin pona. tenpo li tawa la, jan Nuwa li kama suli.
suno wan la, mama Ete li awen e jan Nuwa lon tomo lili, li toki e “o tawa ala”. jan Nuwa li awen lon tenpo mute a. pini la mama Ete li weka e jan Nuwa tan tomo. jan ale lon kulupu li pilin ike. jan Molika li toki: “jan lili o, mi tawa ma Nala. mi awen lon tenpo pi mute seme la, mi sona ala. o awen tan kama sin mi.” jan Nuwa li pilin ike. mama Ete kin li weka mute a, li toki lili.
mama Ete li weka lon mun mute. ona li kama sin la, sike lukin wan li weka tan sinpin. ona li monsuta tawa lukin! pilin ike la, mama Ete li tawa jan Nuwa li toki: “jan Molika li ken ala kama sin.” jan Nuwa li sona ala e tan. jan Asawen li kute, li kalama wawa tan pilin ike.
jan Nuwa li taso. jan ala li ken lon poka ona; ona ale li pali mute li lape ala. jan Nuwa li wile tawa mama Ete. ona li alasa e ona lon ale tomo, li kama lon tomo suli. tomo la jan mute li lon. jan pi mute lili li lon insa. jan Nuwa li sona e tomo ni. tomo ni la mama Ete li pini e moli ona. taso, tenpo ni la, mama Ete li awen lon supa. mama Ete li toki e nimi jan. jan li kama. jan lon poka pi mama Ete li tu e sijelo ona. jan li moli. mama Ete li toki e nimi sin. jan lili li kama. jan Nuwa li ken ala awen. ona li tawa insa tomo li toki.
“o pini!”
mama Ete li lukin e ona.
“jan Nuwa o tawa tomo sina.”
“sina moli e jan lili tan seme a!? mi lon tomo ni la, sina pini e moli mi. sina ante.”
“nasin li ante. o tawa.”
“ala a! o pini e moli!”
lukin pi jan Nuwa li pana e telo. mama Ete li monsuta e ona. jan lon poka li tu e sijelo pi jan lili. mama Ete li mu e jan utala. jan utala li tawa e jan Nuwa. jan Nuwa li weka ala tan tomo ona lon tenpo mute, li pilin ike a. jan Ete li kama ike. ona li mama ala.
pimeja la, jan Nuwa li weka. ona li wile tawa ma ante, li tawa kepeken lupa. taso, jan Ete li lon sinpin tomo li lukin e ona. jan Ete li toki wawa “o tawa ala!”. jan Eli li pilin monsuta a, li tawa wawa. ona li kama lon ma kasi. ale li pimeja.
ona li tawa lon ale pimeja, li kama lon nasin kiwen. ona li jo e moku ala e mani ala. ona li awen tawa. open suno la, ona li kama lon ma tomo suli, li kama tawa anpa tan lape. jan utala li jo e ona, li pana e ona tawa supa lape. lape li pini la, jan utala li kama e ona lon tomo suli. ona li lon anpa; kulupu jan li lon supa sewi. jan lawa Nala li lon supa. ona li toki:
“sina kepeken len pi ma Ete. sina kama tan seme?”
“jan Ete li mama e mi, taso ona li ike. ona li moli e jan lili. mi weka tan ona.”
jan li toki lon kulupu. jan Kepali li toki: “toki ona li ken lon ala. jan Nala o! jan ni li wile pana e sona tawa jan ike Ete. o moli e ona.”
taso jan Nala li lukin pona e jan Nuwa, li lukin e jaki e pakala lon sijelo ona, e pilin monsuta lon sinpin ona, li wile pana e pona. ona li toki e wile. jan Nuwa li ken awen lon tomo suli pi jan Nala. ona li ken ala toki tawa jan pi ma ante, taso jan ale o pona tawa ona. jan Salu o mama e ona. ale ni li kama lon.