soweli suwi pi ma Uleta

jan li toki e ni: lon ma Uleta lon poka weka pi linja telo Ki la, jan ala o moli e soweli suwi. pilin mi la, ni li lon a. mi lukin e soweli suwi mi la, ona li lape li mu lili lon poka pi seli tomo. mi la, soweli suwi li soweli namako: ona ale li pali e ijo pi sona jan ala li lon poka pi ijo nasa. ijo pi lukin jan ala. soweli suwi li kon pi ma Kuma tan tenpo pini weka. insa ona la, soweli suli li jo e toki musi tan ma tomo majuna lon ma Melowe lon ma Opi. ona li lon kulupu mama lawa pi ma kasi seli li jo e sona len pi ma walo monsuta Apika. soweli Sinkise pi kiwen musi kin li lon kulupu ni li sona e toki sama. taso soweli Sinkise la, soweli suwi li majuna a li jo e sona pi soweli Sinkise ala.

ma tomo lili Uleta la, jan lawa li toki e ni: jan ala o moli e soweli suwi. taso tenpo pini la, ni li lon ala. tenpo pini ni la, mije pali pi ma kasi moku en meli ona li awen lon tomo lili lon ma ni. mute la, ona tu li poki li moli e soweli suwi jan pi ma tomo. mi sona ala e tan pi wile moli ona. ken la, mu pi soweli suwi li monsuta e ona lon tenpo pimeja. ken la, tawa noka mute ona pi poka tomo li ike tawa ona. tan li suli ala. soweli suwi li kama lon poka pi tomo jaki ni la, mije majuna ni en meli ni li poki li moli e ona li pilin pona tan ni. kin la, jan pi ma tomo li kute e kalama tan tomo jaki lon tenpo pimeja la, ona li toki insa e ni: nasin moli soweli pi jan tu ni li nasa a. taso jan pi ma tomo li toki ala e ijo ni tawa mije majuna tawa meli ona. mute la, lukin la, jan tu ni li pilin ike wawa. kin la, tomo ona li lili li lon anpa pi kasi suli la, pimeja li len e tomo ni. lon la, jan pi ma tomo li wile ike e jan nasa tu ni. taso pilin ni li lili tawa pilin monsuta ona. ni la, ona li toki ike ala tawa jan tu ni. ante la, ona li lon e ni: soweli suwi ala li tawa lon poka pi tomo jaki. tenpo pi mute lili la, jan li lukin ala e soweli wan la, kalama li kama tan tomo lon tenpo pimeja la, jan jo pi soweli ni li pilin ike mute li ken pali e ijo ala. ona li toki insa e ni: pona la, jan lili li tawa ala lon poka pi tomo jaki ni. taso jan pi ma Uleta li jan pi sona lili li sona ala e tan pi soweli suwi ale…

tenpo suno wan la, kulupu pi jan tawa nasa li kama tan nasin seli li tawa lon nasin linja kiwen pi ma Uleta. ona li jo e len pimeja. tenpo ante la, kulupu ante pi jan tawa li tawa ma tomo lon tenpo tu pi tenpo sike ale. taso kulupu ante pi tenpo ante li sama ala kulupu ni. ma esun pi ma Uleta la, jan pi ma tomo li pana e mani tawa ona la, ona li toki e tenpo kama. kin la ona li esun e kiwen lili musi tan jan pi ma tomo. jan ala li sona e ni: kulupu ni li kama tan ma seme? taso nasin sewi ona la, ona li mu e toki sewi nasa. ona li sitelen e ijo nasa lon poka pi tomo tawa soweli ona kepeken ko kule. ijo ni li jo e sijelo jan e lawa pi soweli suwi e lawa pi soweli alasa e lawa pi waso alasa. jan lawa kulupu li jo e len lawa ni: palisa tu li kama tan ona. sike nasa li lon insa pi palisa tu ni.

kulupu nasa ni la, mije lili li lon. mije lili ni li jo ala e mama meli anu mama mije. taso ona li jo e soweli suwi pimeja lili li olin e soweli ni. jaki sijelo li ike e mije ni lon tenpo pini la, soweli ni li pona e pilin ike ona. mute la, tawa musi pi soweli suwi pimeja lili li ken pona e pilin pi jan lili ale. ni la, mije lili ni (nimi ona li jan Mene) li lon leko pi tomo tawa soweli li musi lon poka pi soweli lili ona. pilin ike ona la, pilin pona ona li mute a tan ni.

kulupu jan pi len pimeja li lon ma Uleta lon tenpo suno tu wan la, jan Mene li weka tan lape la, ona li ken ala lukin e soweli lili ona. ona li pana e mu suli pi pilin monsuta lon ma esun la, jan pi ma tomo li toki tawa ona. jan li toki e mije majuna e meli ona e kalama nasa pi tenpo pimeja pini. jan Mene li kute e ijo ni la, mu ike ona li pini. ona li toki insa lon tenpo lili li kama toki sewi. ona li pana e luka ona tawa sewi tawa suno li toki. jan ala pi ma tomo li ken sona e toki nasa ona. taso lon la, jan li alasa ala sona tan ni: ona li lukin e sewi. kon li kama jo e sijelo nasa. mije lili ni li mu e toki ona la, sitelen pimeja mute pi ijo namako li kama lon sewi. sitelen ni la, soweli tu li jo e sijelo wan. palisa tu li kama tan lawa ona. sike nasa li lon insa pi palisa tu ni. lon la, jan li wile alasa e ona la, sitelen mute pi nasa ni li lon ma mute lon ma suli.

tenpo pimeja sama la, kulupu jan pi len pimeja li weka tan ma Uleta. jan ala pi ma tomo li lukin e ona lon tenpo kama sin. kin la, jan tomo li kama pilin ike tan ni: ma tomo la, soweli suwi ala li lon. tan tomo ale la, soweli suwi pi sona jan li weka. soweli suwi ale li weka. soweli suli en soweli lili en soweli pimeja en soweli pi kule ma en soweli pi kule tu en soweli jelo en soweli walo li weka a. jan lawa wan pi ma tomo (nimi ona li mije majuna Kanon) li toki e ni a: jan pi len pimeja li weka e soweli suwi ale tan ni: soweli pi jan Mene li kama moli. mije Kanon li toki ike suli e kulupu jan pi len pimeja e mije lili ona. taso, jan pi lipu lawa (nimi ona li jan Nite) li toki e ni: ken suli la, mije majuna pi tomo jaki en meli ona li weka e soweli suwi ale. sona pi jan ale la, pilin ike pi soweli suwi li lon ona tu li kama wawa lon tawa tenpo. mije lili Ata li open toki. ona li jan lili tan jan pi tomo lape. toki ona la, ona li lukin e soweli suwi ale pi ma Uleta lon poka tomo pi jan nasa tu. open pi tenpo pimeja pini la, soweli suwi ale li tawa noka li sike e tomo. ona li tawa lili lon tenpo mute la, soweli ale li lon poka pi soweli wan ante. lukin la tawa ona li sama pali pi wawa nasa monsuta tan tenpo pini weka. taso awen la, jan ala li wile toki ike tawa mije majuna en meli ona. ona li sona ala e ni: toki musi pi mije lili Ata li lon ala lon? ken la, jan nasa tu li moli e soweli suwi ale kepeken wawa nasa. ken la, jan li tawa noka lon poka pi tomo jaki pimeja li kama lukin e mije majuna la, jan li ken toki tawa ona. taso jan li lon poka ala la, jan li wile ala tawa tomo jaki li wile ala toki tawa ona.

ni la, jan ale pi ma Uleta li tawa supa lape ona lon tenpo pimeja ni la, ona li awen pilin ike wawa tan weka pi soweli suwi. taso open pi tenpo suno kama la - o lukin! - soweli suwi ale li kama sin lon tomo ona . soweli suli en soweli lili en soweli pimeja en soweli pi kule ma en soweli pi kule tu en soweli jelo en soweli walo li lon sin a. linja sijelo ona li pona lukin. sijelo ona li suli lukin li pana e mu lili pi pilin pona. jan ale li toki e ijo ni li pilin wawa tan ona. mije Kanon li awen toki e ni: jan pi len pimeja li weka e soweli suwi ale. tenpo pini ale la, soweli suwi li tawa tomo jaki pi mije majuna la, ona li moli li ken ala kama sin. taso tenpo ni la, soweli suwi ale li wile ala moku e moku ona anu telo walo ona. jan ante pi ma tomo li pilin ni: nasa mute a li lon. tenpo suno tu li tawa la, ala li ante. soweli suwi ale pi ma Uleta li tawa lili li moku ala li lape taso lon suno anu ma seli pi insa tomo.

tenpo suno luka tu li tawa la, jan li kama lukin e ni: suno ala li kama tan lupa pi tomo jaki lon anpa pi kasi suli, lon open pi tenpo pimeja. kama la, jan Nite li toki e ni: soweli suwi ale li kama sin la, jan ala li lukin sin e mije majuna e meli ona. tenpo suno luka luka tu tu li tawa la, jan lawa wan pi ma tomo li anpa e pilin monsuta ona, li tawa tomo jaki. pilin ona la, ona li jan lawa la, ni li pali ona. jan Sanke pi pali ilo en jan Tule pi pakala kiwen li lon poka ona. jan tu wan ni li kama tawa tomo la, nasa la, kalama pi mute lili li lon. jan tu wan ni li pakala e sinpin lupa la, ni taso li lon insa: kulupu tu pi kiwen sijelo jan li lon anpa li walo ale li jo ala e ko loje. pipi lili pi mute lili li tawa lon poka ona.

kama la, jan lawa mute pi ma Uleta li toki mute. jan Sa pi alasa sona sijelo moli li toki mute a tawa jan Nite. jan Sa li pana e wile sona mute a tawa jan Kanon tawa jan Sanke tawa jan Tule. kin la, jan Sa li toki mute tawa mije lili Ata pi jan tomo lape. ona li pana e moku suwi tawa jan Ata lon pini pi toki ona. jan ale ni li toki e mije majuna e meli ona, e kulupu jan pi len pimeja, e mije lili Mene, e soweli suwi pimeja ona, e toki sewi ona, e sitelen soweli nasa pi kon sewi, e weka pi soweli suwi ale, e kulupu pi kiwen sijelo pini la, jan lawa ale pi ma Uleta li lon e lawa sin pona. jan esun pi ma Jate en jan tawa pi ma Niwe li toki mute e ona:

lon ma Uleta la, jan ala o moli e soweli suwi.