ma kasi pi ma tomo Kisawika

ma tomo Kisawika. ma Maja.
(Tiszaigar, Hungary)
o lukin e sitelen tawa mi kin!

toki! o kama pona tawa ma kasi pi ma tomo Kisawika! (nimi ona li lon toki Maja: Tiszaigari Arborétum)
ma kasi ni li suli li pona lukin. jan suli li open e ma kasi ni. ona li wile e ni: kasi mute pi ma ante li kama suli lon ni. tenpo ni la, kasi suli pi tenpo pini li awen lon ma ni.

kasi suli pi poka telo li lon:

kasi suli nasa li lon poka pi nasin telo. ona li pilin pona lon telo kin. tenpo seli la, lipu kasi ona li laso. tenpo lete la, ni li kama loje li weka e lipu ona. lipu ona li lukin sama palisa lili mute. ma ni li kalama ala li pona tawa lape. jan li ken tawa lon nasin lili li kute e mu waso. waso mute li pali e tomo waso lon sewi kasi. mi la, waso li suwi. ma kasi ni li ma pi sona mute li ma pi lape pona. sina ken lukin e ma kasi ni la, o awen e selo sina tan ni: pipi mute li wile moku e telo jole pi sijelo sina. ona li pipi utala. o kama tawa ma kasi ante lon tenpo kama kin!

pona tawa sina!