nena pi ma tomo Etopene

(Erdőbénye, Hungary)

toki a! o kama pona tawa ma tomo Etopene!
(o lukin e sitelen tawa mi!)

tenpo ni la, “sina en mi li lon ma tomo ni”. (sitelen ni li lon toki insa mi taso: mi mute li tawa kepeken noka…) ma tomo ni li jo e ma pi telo kili pona. tenpo ni la, mi ken moku ala e kili tan ni: tenpo seli li lon ala. kasi li pana ala e kili loje. tomo esun li jo ala e kili ni. taso, ken la, telo kili loje li lon insa pi tomo nena.

ma kasi suli li lon ma ni. mi la, pona lukin mute tawa jan tawa. tenpo suno ni la, mi mute o tawa nena wan. nena ni li suli ala. nimi ona li ma pi tenpo musi pi jan mute. (nimi ona lon toki Maja: Mulató-hegy.)

sina lon sewi nena la, sina ken lukin e ijo mute. nena ni li pana e lukin pi ma ale. sina tawa sike la, sina ken lukin e pona pi ma ale. ni li pona tawa mi kin.

o lukin e anpa ma! telo mute li lon. ike la, jan li pali mute, li weka e kiwen mute tan ma ni lon tenpo pini. tenpo ni la, pali ni li pini.

sina lon sewi nena la, sina ken lukin tawa ma anpa e ma tomo Etopene kin. tomo lili mute li lon ma anpa, li pona lukin tawa mi. nena suli mute li lon. ona li “awen” e ma tomo ni. poka ante la, nena li pini. ma supa suli li lape. lukin la, ma supa ni li suli mute.

mi toki e ni tawa sina: nena ni li pana e pilin pona tawa jan tawa. jan mute li kama tawa ma ni tan ni: ona li wile lukin e nena mute pi ma tomo Etopene. mi la, sina o kama tawa ma tomo, o lukin e pona mute lon ma ni. mi wile e ni: tenpo kama la, sina en mi li lukin e ma ante kin. tenpo ni la, mi tawa!

pona tawa sina!