moku Panson (kue pancong [kuʷe pant͡ʃoŋ] lon toki Intonesija) li moku lili tan kulupu jan Petawi lon ma tomo Sakata. lukin la ona li sama ni: jan li kipisi¹ e sike. pilin uta la ona li suwi li namako. sina ken pali e moku ni kepeken nasin ni.

ijo mama moku

sina wile pali e moku ni la o jo e ijo ni.

• ko pan tan kasi pan pi ma ko telo
• sijelo walo tan kili pi poki telo (o kipisi lili lili e ona)
• telo walo tan kili pi poki telo
• suwi walo
• namako
• telo jelo pi pona seli tan kili pi kasi luka

mute ijo

o kama jo e kiwen lili sama ni: suli ona li sama palisa luka suli. o nanpa e suli pi wawa anpa pi kiwen ni. kepeken kiwen ni la sina ken sona e mute pi ijo mama moku. suli pi wawa anpa la:

• ko pan o sama kiwen lili 250;
• sijelo walo kili o sama kiwen lili 250;
• telo walo kili o sama kiwen lili 700;
• suwi walo o sama kiwen lili 75;
• namako o sama kiwen lili 5.

nasin pali

• o wan e ko pan e sijelo walo kili e suwi e namako.
• o pana e telo walo kili tawa ko moku. o wan pona e ona kepeken ilo palisa lon nasin tawa sike.
• o lon e poki kiwen e ilo seli supa. lukin la poki ni li sama sike pi kipisi tu. o pana lili e telo jelo tawa poki kiwen. o pana e poki ni lon ilo seli supa. o seli e ona.
• o pana e ko moku tawa poki kiwen seli. o pini e poki. o seli e ona kepeken seli lili kepeken tenpo lili lili 600.
• o seli e ko moku kepeken seli suli kepeken tenpo lili lili 180 tawa ni: selo ona li ko ala li kapesi² walo
• o ante e poka sewi moku tawa anpa. o seli e ona kepeken seli lili kepeken tenpo lili lili 180.
• o pini e seli. o jo e moku ni tan poki seli tawa supa moku. ni la sina ken moku e ona.