seme! telo li supa ala

mi lon ma lape. kasi li laso. suno li suwi e pimeja lon anpa kasi. kon li tawa pi namako taso. mi len e oko. mi pilin e ale poka. mi pilin e ko kepeken noka e telo kepeken kute e loje kasi kepeken nena e awen kepeken selo. mi pilin eeee… kama jan kin. a.

jan mi li tawa mi li mu. mi kama wile sona – “sina kama pi nasin seme? ma la mi kute ala e noka sina. poka kasi la mi lukin e jan ala. ko la noka sina li sitelen e poka taso. sina waso ala waso?” – “waso ala. lon la sina kute anu lukin e ma taso la sina ken ala sona. mi tan telo” – “ken ala. mi ken lukin e poka ma ale. sina kama tan insa telo la telo li awen lon sina. taso telo li lon ala sina. ni la sina tan ala telo” – “mi tan telo, taso mi tan ala insa telo. mi awen lon sewi telo” – “taso sina waso ala” – “mi waso ala” – “sina ken ala awen lon telo” – “mi ken. telo li supa”

“telo li supa ala” – “telo li supa” – “seme a. sina pakala e nasin toki anu seme” – “pakala ala. seme la ona li ken ala supa”

mi tawa kasi poka. mi luka e kili la kasi li pana e kili tawa luka mi. kili li jelo pona li sike suwi li suli pi pona luka – “o lukin e telo. nena mute li lon ona” – mi luka pi kili ala e ko ma. ko li kama nena. mi pana e kili sike tawa nena – “nena li lon la ijo li awen ala lon ona” – kili sike li tawa sike tan sewi nena tawa poka nena tawa noka nena – “nena li lon la ona li ken ala supa”

jan mi li kama lon poka li kama lon nena – “nena li suli ike la ijo li ken ala awen. taso nena li suli pi ike ala la ijo nena li awen ken supa” – ona li awen lon ma kepeken nena – “a ken” – mi tawa telo.

mi noka wan e telo. mi noka tu e telo. noka mi li tawa insa telo li tawa ma pi anpa telo – “mi lon telo la mi awen ala lon sewi. mi kama lon anpa. telo li supa ala a” – jan mi li kepeken luka lon ma li lupa e ma – “kili li ken awen lon sewi ma” – ona li pana e kili tawa insa lupa – “kili li ken kama lon insa ma kin. taso mi awen lon ma. ma li supa” – “taso sina pana a e kili tawa insa ma kepeken wawa sina. kin la sina kama lon telo la sina anpa ala anpa sama mi” – “anpa”

“telo li supa ala” – “a taso mi pana e kiwen tawa telo la kiwen li awen lon sewi” – mi tawa ma. telo li awen lon noka mi – “kiwen li tan ala tan ma sina” – “tan” – mi lukin e kiwen la mi jo e kiwen. mi tawa telo – “o lukin” – mi pana e kiwen tawa telo. kiwen li tan sewi telo tawa anpa telo – “kiwen li awen ala lon telo. supa ala. telo taso” – “a a a. kiwen ale ala li ken awen lon telo. o lukin lon poka”

poka ma en poka telo la kasi suli moli li lon insa – “lon ma mi la kasi ni li kama ken ala awen lon tenpo pi pini ona. ona kiwen li anpa wawa la mi kama kepeken ona lon telo. o lon poka mi” – ona li tawa kiwen suli. mi tu li lon kiwen la jan li noka wan e ma li awen lon kiwen kepeken noka ante. mi tawa. mi tawa lon telo. kiwen li tawa ala anpa. mi awen lon sewi telo – “sina toki pona. kiwen li ken awen lon telo” – “ken” – “ona li supa. ona li awen lon telo la telo kin li supa” – “supa” – mi awen tawa lon telo. “mi tawa ala tawa ma sina” – “tawa ala” – “mi tawa seme” – “tenpo li pana e sona” – “supa ni li supa ala supa lape kin” – “supa. o lape. ijo li kama la mi kama e sina tan lape”