SINPIN LOJE NANPA WAN

nasin tenpo mun la, suno nanpa LLLW pi mun nanpa LT li lon sike nanpa LLAMMMMT la, tenpo pi moli kasi nanpa luka pi lawa Juwanpen la, mi tawa lon telo, lon poka pi jan kama mi, lon anpa pi sinpin loje. kon lete li tawa lili lon selo telo. mi sewi e poki telo mi, li pana e wile mi tawa ni: mi ale li moku e telo tawa ijo. tenpo sama la, mi toki e sitelen kalama pi mun walo e kalama musi pi meli pona. tenpo lili la, mun li anpa e nena pi open suno li tawa insa lon kulupu mun To lon kulupu mun Niju. kon telo li pali e walo suli lon sewi telo la, suno telo en kon sewi li kama wan. mi pini ala e tomo telo mi lon selo telo pi suli ale. suli ni li pana e pilin ni tawa mi: mi kama sewi lon kon sewi, li tawa lon kon tawa, li sona ala e lon pini mi. mi tawa sewi li tawa sike la, mi pilin sama jan pi moli ala lon ma wawa, li weka tan ma.

tenpo ni la, mi mute li moku e telo mute, li kama pilin mute e musi, li kalama musi lon poka tomo. kalama li sama ni:

«ilo pi ante tawa li pali tan kasi namako;

ilo pi wawa tawa li pali tan kasi kon pona;

o pakala e selo telo sewi lon anpa mun.

tomo telo li tawa open telo suno.

pilin mi li pini ala a!

mi lukin e pona,

taso, mi kama sona: ona li lon poka ante ma.»

jan kama wan ken li kalama kepeken palisa kon lon poka pi kalama musi. kute la, mu palisa li sama wile pi tenpo pini, li sama kalama pi pana telo tan pilin ike, li sama kalama pi toki ike. kalama pini li awen sama linja pi len pipi. kalama ona li ken pana e wile tawa musi tawa akesi sewi len lon lupa suli, anu ike e pilin meli pi mije moli lon tomo ona.

pilin mi li ike. mi pona e len mi, li kama palisa lon supa, li toki tawa jan kama ni: «kalama pi palisa kon li sama ni tan seme?» jan kama la, «mun suli li suno; mun lili li lili sin. waso pimeja li tawa ma seli.» ona li tan ala tan sitelen pi jan Sa Mente? mi lukin e pini suno la, ma Sako li lon; mi lukin e open suno la, ma Usan li lon; nena en telo li sike e ante la, ale li laso. jan So Ju li utala e jan Sa lon ala lon ni? jan Sa li kama lawa e ma tomo Sinso e ma tomo Sanlin, li tawa lon telo San la, kulupu ona pi tomo telo li suli sama ni: jan li tawa lon suno tu tu la, ona li kama ala lon pini kulupu. poka open pi tomo telo li lon poka pini pi tomo ante. lipu suli en lipu lili ona li len e sewi. ona li moku e telo lon poka telo, li pali e sitelen wawa, li jo e ilo utala ona la, jan Sa li jan wawa pi tenpo ona, taso, ona li lon seme lon tenpo ni? kin, mi en sina li seme? mi alasa e kala, li kipisi e kiwen kasi lon poka telo, li lon poka kala, li kama pona tawa soweli. mi tawa lon tomo telo sama lipu kasi, li alasa sewi e telo mi tawa ijo tan poki kili. ma la, lon mi li sama pipi, li sama kili pan kin lon telo suli. mi pilin e ike tan lon lili mi li wile e pini ala pi telo San. mi wile a e ni: mi ken kama luka e jan pi moli ala, li ken tawa lon poka ona, li ken sike e mun walo kepeken luka mi, li ken moli ala! mi sona: ni li kama ala lon tenpo lili, li wile e pali mute. ni la, mi ken pana taso e kalama palisa tawa kon pi tenpo moli.

mi toki sin: «sina sona lon e telo e mun anu seme? tenpo ala la, telo li weka, taso, ona li tawa lon tenpo ale; tenpo ala la, mun li weka, taso, ona li kama suli anu lili lon tenpo ale. ante ijo la, ma li ken ala awen sama—sina pini lili e lukin la, ona li ante; ante ala la, ijo ale en mi li awen lon tenpo ale. seme li tawa wile? ijo ale la, ijo ante li lawa e ona. ijo li mi ala la, mi lanpan ala e kipisi lili tan ona. kon pi sewi telo, en mun suno pi sewi nena, en kute ken, en kule ken—ni taso la, mi ken lanpan pi pini ala e ona tawa pona mi lon tenpo ale. ni li pona ma pi pini ala; ona li pana tawa sina, tawa mi, tawa pona.»

jan kama li kama pilin pona wawa la, ona li kama kalama musi. mi telo e ale pi poki telo mi la, mi open moku sin. moku kiwen en kili li moku; supa moku poki telo li lon mute. mi lape lon jan ante sama supa, li lape lon tomo telo, li sona ala e ni: suno li kama sewi lon pini ma. ❀

SINPIN LOJE NANPA TU

nasin tenpo mun la, suno nanpa LLL pi mun nanpa LL li lon sike nanpa LLAMMMMT la, mi tawa ma Linka tan tomo pi ko lete. jan kama li awen lon poka mi lon ni: mi tawa lon ma pi kiwen jelo. lete en telo li anpa tan sewi la, lipu kasi ale li anpa kin. mi lukin e mun walo la, pimeja mi li pana lon ma. mi lukin e ale, li kama pilin e pona tan ma la, mi kalama musi tawa kulupu mi. tenpo lili la, mi kon li toki: «mi jo e jan kama, taso, mi jo e telo nasa ala, kin, mi jo e telo la, mi ken ala kama jo e moku tawa poka ona. mun walo li lon; kon li tawa lili—pimeja pona li ni. mi ken seme?» jan kama wan la, «suno ni la, mi alasa e kala lon open pimeja. ona li jo e uta suli e selo pona, li sama kala tan telo Sunwa tawa lukin, taso, mi ken kama jo e telo lon seme?» sin la, mi tawa tomo mi, li toki e ni tawa meli mi. ona la, «sina wile la, mi awen e telo nasa mute lon tenpo suli a.»

ni la, mi jo e kala e telo la, mi tawa sin lon anpa pi sinpin loje. telo li tawa a li kalama. sinpin suli li tawa sewi a. nena li suli. mun li lili. telo li weka la, kiwen li kama. tenpo lili li kama tan kama pini mi, taso, tenpo ni la, ma li ante mute tawa lukin mi. mi sewi e len mi, li open tawa. mi alasa e nasin lon insa lupa, li tawa lon kasi suli, li anpa lon kiwen pi sijelo soweli, li tawa sewi lon sinpin pi tomo waso, li lukin e ma len pi sewi telo Pin I lon anpa; mi weka mute tan jan kama mi. mi mu suli a lon tenpo suli la, kasi en telo li kama tawa; nena en lupa li kalama sin; kon li pini lape. mi pilin e ike suli, e pimeja, e jaki. pilin mi li ike sama ni la, mi ken ala awen lon ni. kulupu en mi li tawa tomo telo. mi kama lon ona, li tawa telo suli, li pini ala e ona.

insa pi tenpo pimeja li lon. ale li kalama ala li taso. tenpo ni la, waso sewi wan li tawa lon sewi telo tan ma pi open suno. luka ona li sama sike tawa. ona li len kepeken len walo lon poka pi len pimeja ona. ona li tawa lon sewi pi tomo telo mi, li mu suli, li awen tawa ma pi pini suno. tenpo lili kama la, jan kama mi li weka. mi lape. insa lawa la, mi lukin e jan pi nasin Ta. ona li len kepeken linja waso li tawa lon poka pi ma Linka. ona li wan e luka ona, li anpa tawa mi, li toki: «tawa sina pi sinpin loje li pona ala pona tawa sina?» mi pana e wile mi pi nimi ona tawa ona la, ona li anpa e lawa ona, li toki ala. mi la, «a! mi sona. sina waso li tawa lon poka pi tomo mi lon pimeja ni anu seme?» jan sewi li lukin sin e mi, li mu musi. mi pini lape wawa a. mi open e lupa mi la, mi ken ala lukin e nasin tawa jan. ✿

SITELEN PINI LILI

jan Su Si (toki Sonko la: 蘇軾 anu 苏轼) li open lon suno nanpa LTW pi mun nanpa W lon sike nanpa LLAMLLLT, li moli lon suno nanpa MTT pi mun nanpa LTW lon sike nanpa LLWAW. ona li sitelen mute li jan lawa lon kulupu lawa pi lawa Sun, kin, ona li sona e misikeke, li sitelen musi, li olin e moku pona. ona li pali lon tenpo suli tawa kulupu lawa, li jan suli pi tenpo ona, taso, ona li toki ike e mute la, jan ante mute li kama utala e ona. tenpo mute la, ona li weka tan ma Sonko tawa ma ante weka, taso, tenpo ni la, ona li kama pali e sitelen mute. suno ni la, jan Su Si li awen suli lon ma Sonko.