musi Soneto tan jan Wilijan Sepi

Sonnet 1

tan pona ma la pona sin o kama
o awen ken e tawa sewi kasi.
moli li kama tawa kasi mama
la kili sin o awen sin e pali.
taso la sina jo e sina suwi,
li esun e kon olin tawa insa,
li pana ala a li moku suli.
o ike ala tawa suwi sina!
sijelo wawa sina li ken awen
e suwi weka tan ma kasi moli
anu ken alasa e tenpo lape.
jan lape suwi o, sina o olin!
o kute tawa ma o moku ala e wile ma lon uta lon ma anpa.

Sonnet 3

lon sinpin lukin sina la o lukin
o toki tawa sinpin: sina sewi
o lon e sinpin sin o sin e suwi
tan wile ma tan wile mama meli.
a, meli seme li ken ala wile
lon lupa sin a e pan mama sina?
kin: olin nasa seme li lon mije
la ona li ken pakala e linja?
lon sinpin sina la jan meli mama
li lukin sin e tenpo open pini.
sitelen tenpo li lon selo lawa
la sina kin o lukin e jan sin ni.
a, taso sina wile awen wan,
la lukin ni o moli sama jan.

Sonnet 12

mi lukin tawa ilo tenpo nanpa,
tawa len pimeja lon sewi kon.
mi lukin la kasi li kama anpa,
la linja jan li kama kule mun.
mi lukin sewi la pakala kasi
li weka e len lete tan ma suno.
tan tenpo seli la pan laso mani
li weka tan ma mi lon supa tomo.
mi lukin la mi toki: wawa sina
o wile ala tawa tenpo pini
o sama ala ale suwi sin ma:
tan open wawa la awen li lili.
tenpo li sona utala e ale.
o unpa! ni taso la sina awen.

Sonnet 18

mi toki pona e ma suno seli
e sina kin la ma li kama ike:
kon mu li tawa kule open lili
la pini kasi kin li esun wile.
tenpo la sike sewi li ken nasa
tan seli wawa anu weka jelo.
ale la pona li ken kama anpa
tan nasa anu nasin wawa tenpo;
la tenpo suno sina a li awen
li awen jo e pona sina kin.
pimeja Moli li ken ala lape
e sina: sina awen lon ni mi.
jan wan li jo e lukin e kon insa
la musi ni li lon li lon e sina.

Sonnet 46

wawa la lukin mi en pilin mi
li utala li wile jo e sina.
lukin li len e sijelo tan ni
la pilin li ken ala lukin insa.
pilin la sina kon lon ona tomo;
lon tomo lili la ala o lukin.
lukin li toki utala e lon jo,
li tomo kin a tawa sinpin suwi.
tan ni la pilin mute mi li kama
kulupu toki, li tan tomo pilin.
lon pini toki la ona li pana
e jo wan suli e jo ante lili:
lukin o jo e ale sina sinpin;
pilin o jo e olin insa pilin.

Sonnet 65

mani en kiwen ma en telo suli
li wawa ala tawa moli taso.
utala wawa ni la ale suwi
li sama ala sama lili laso?
a! tan ma kili la kon suwi seli
li awen seme utala e tenpo?
ma tomo seme anu kiwen seme
li kama ala weka sama telo?
a, sona ike! mani seme a
li kama ala tawa tenpo wawa?
seme li pakala e alasa
la suwi o ken esun ona ala?
a, ala! taso nasa o ken lon ni:
ko pimeja o sin e suno olin.

Sonnet 99

tan kasi kule wawa la mi toki:
“kasi o, kon li suwi ni tan seme?
mi pilin e kon uta tan jan olin!
kin sina kule e len lawa lete
lon insa jan, lon telo seli loje.”
tan luka sina la kasi li weka
e walo, anu linja sin tan lawa.
lon pilin utala la kasi nena
li walo moli anu loje anpa.
nanpa tu wan li jo e kule tu
li weka e kon kin tan uta suwi.
tan ike jo la pipi kulupu
li moku moli a e ona suli.
mi tawa kasi mute. ale ni la
kule en kon li kama tan jo sina.

Sonnet 109

o toki ike ala e lon olin
e pilin wawa mi tan weka awen.
mi mi la mi ken ala pini kon mi;
lon insa sina la kon mi li lape.
ni a li tomo olin mi: mi tawa,
la mi jan alasa, li kama sin
lon tenpo pona; mi jan pona sama
la mi ken weka sin e jaki mi.
o pilin ala e kon pakala
lon mi: jan mute kin li ike insa.
taso ken ala la mi jaki a
li ala a e ale pona sina.
a, jan en ma en mun en kon li ala
tawa mi: ale mi li sina wawa.