waso

tenpo li pimeja suli.
mi pilin pi wawa lili
li lukin e lipu mute
pi sona nasa weka.

mi lon poka lape la mi
kute a e kalama pi
luka jan lon lupa wan mi.
kalama li lili a.

mi toki e ni lon lili:
“jan li luka a e lupa.
ni li suli ala a.”

sona mi la tenpo ni la
kon li lete pimeja.
kiwen lili lon seli mi
li suno e supa a.

mi wile e tenpo kama
e ni: ike mi o weka
o lon lipu o lon ala.
ike li awen wawa

tan weka pi meli sewi.
meli pi nimi [loje en nasin ale].
nimi ona li weka.

tawa lili pi len lupa
laso loje sinpin tu la
pilin mi li nasa a li
sama pilin jan ala.

ni la mi sewi li tawa
kepeken pilin kalama
li toki e ni: “jan tawa
li wile e lon insa”

mi toki e ni: “jan tawa
taso li wile insa.
ona li suli ala.”

toki la kon mi li wawa
li toki pi awen ala:
“mije pona. anu meli.
ken ni la mi pakala.

taso lape mi li kama
la mi kute e kalama
sina lili a tan lupa.
ni li lili mute la

ken la kute mi li nasa.”
mi open e nena la
ni ale li pimeja.

mi awen li lukin wawa.
lukin la mi pilin nasa.
nasa wawa sama ala
pilin ale jan lon a.

taso kalama en tawa
ale li weka li ala.
kalama pi nimi wan la
toki lili “jan [loje en nasin ale]”.

ni li toki mi. lupa li
toki sin e “jan [loje en nasin ale]”.
ni taso li ale a.

mi tawa sin lon tomo mi.
ale mi li seli pilin.
tenpo sin la kalama li
kama li kama wawa.

“pilin mi la kalama ni
li kama tan nena lukin.
mi o lukin tawa ma ni
o sona e kalama.

pilin mi o awen lili.
mi o alasa sona.
ken la kon li kalama.”

mi open e lupa mi la
insa la waso li kama.
ona pimeja li sama
tenpo pini sewi a.

waso ni li anpa ala.
pimeja pi awen ala
li tawa e waso tawa
sewi pi lupa mi a.

ona li awen lon lawa
kiwen lon lupa mi a.
waso li tawa ala.

waso pimeja li kama
e musi lili lon mi tan
len pimeja ona sama
jan pi musi ala a.

“taso len lawa sina li
weka la sina pi sewi
ala li waso lon ma pi
pimeja suli lon la

o toki e nimi sina
lon ma suli pimeja.”
mu waso li “ala a”.

mi kute wawa e mu ni
sama toki jan li lukin
sona e tan ona. taso
tan ona li lon ala.

mi mute li pilin e ni:
jan ala lon ma ale li
lukin e waso lon sewi
pi lawa lupa ona.

jan ala li lukin tawa
waso anu soweli a
pi nimi pi “ala a”

waso awen taso ni li
awen lon lawa kiwen mi
li toki e nimi wan ni
kepeken ale ona.

mu wan li kalama ale.
len selo ona li awen.
tenpo ni la mi toki e
“pona ante li weka.

tenpo kama la ona
en wile mi li weka a.”
mu waso li “ala a”

ni li pakala e awen
kepeken toki o nasin.
“toki ni li taso sina”
li toki pi mi sona.

sina kama sona e ni
tan jan lawa sina pini.
ale ona li ike li
pana e nimi sina.

pilin ale ike ni li
pana e nimi sina.
nimi ni li “ala a ”

waso ni li awen kama
e musi lon pilin mi a
mi tawa e supako lon
poka pi waso nasa.

mi anpa lon ko supa li
alasa linja e pilin
e sona mi tawa sona
pi waso ni pimeja.

mi alasa sona e ni:
wile waso pimeja
lon mu ona “ala a”.

ni li awen lon lawa mi
la mi toki ala e ni
lon waso pi lukin seli.
seli lon ale mi a.

wile nasa mute a li
awen lon insa lawa mi.
lawa mi lon supa ko li
suno tan seli anpa.

taso pilin ko suwi li
lon ala meli weka.
pilin ni li ala a.

pilin ni la kon li suli
tan pana pi ilo suwi.
sewi kule pi ilo ni
li noka e supa a.

mi toki e ni: “jaki li
ale sina tan ma sewi.
mi o moku o weka e
sona mi pi meli a.

mi o moku e nasa li
weka e sona ni a”
mu waso li “ala a”.

“sona sina li ale la
ike seli a li sina.
sina kama tan jan anu
tan kon pakala wawa.

mi en sina li lon taso
ma pimeja sama waso.
ike sewi li lon taso
la o toki waso a.

pona tan ma sewi li ken
pona anu seme a.”
mu waso li “ala a”.

“sona sina li ale la
ike seli a li sina.
ma sewi en sewi jan li
olin anpa a mi la

o toki tawa mi pilin
e ni: ma pona a [ale taso e nasin]
li poki e meli olin
pini mi sewi [loje en nasin ale].

ma li lawa ala lawa
e meli sewi weka.”
mu waso li “ala a”.

“toki wan mi la o weka.
waso ike a o tawa
kon wawa pi kama sina
anu mani pimeja

o awen e ijo ala
pi awen pakala sina.
o tawa tan taso mi a.
o tawa a tan lupa.

ale sina o weka tan
pilin en tomo mi a”
mu waso li “ala a”.

waso pimeja li awen
suli a lon tenpo ale
lon sewi pi lupa mi li
tawa lon tenpo ala.

lukin seli tu ona li
sama sewi ike pilin.
suno lili tan suno mi
li pana e pimeja.

pimeja ni li tan waso
li poki e kon mi a.
kon li sewi: ala a.