mi jo e nimi mute

tenpo mute la, jan ante li wile sona e nimi mi. taso, mi wile ala pana e nimi mi lon tawa jan, la mi pali ala. mi pana e nimi pi lon ala.

monsuta akesi li toki e “nimi sina li seme?” mi pana e “nimi mi li mije Pula.”

monsuta ko suli li lukin alasa e nimi mi kepeken “sina jan seme?” mi toki e “mi meli Kete.”

monsuta pi nena seli li wile sona: mi kalama e “jan Lin.”

tenpo wan la, soweli pona mi Asije li toki e ni: “tenpo mute la, sina pana e nimi ante tawa jan ante tan seme?”

mi kalama musi, li toki e “ni la, mi ken kepeken nimi ale. nimi mi lon li ike tawa mi, la mi wile ala pana e ni tawa jan.”

“sina toki e nimi open ante kin tawa jan ante. sina mije anu meli anu jan anu seme?”

mi toki insa lon tenpo lili. mi toki e “mi sona ala. sina ken kepeken e ale.”

uta ona li kama musi. ona li toki e ni: “ni la, nimi open sina li te jan pona to tawa mi a!”

mi kalama musi. mi len e ona kepeken luka mi.