sona pi lipu toki ni
sina ken pona e ona kepeken ilo poki Kita
ona li toki e ni: An introduction to John's Gospel
kulupu toki la ona li religion li nasin sewi li prose
sina wile kepeken ona la, o kute e nasin CC BY-SA 4.0
sina ken lukin e ona lon lipu denesszanto.itch.io
toki sona tawa lipu "sona sin pona tan jan sewi Jojane"
toki sona tawa lipu “sona sin pona tan jan sewi Jojane”
lipu “sona sin pona” tu tu la, lipu “sona sin pona tan jan sewi Jojane” li suli nanpa wan tawa nasin sewi, li nasa nanpa wan tawa jan lukin. ken suli la, jan li sitelen e ona lon tenpo sike nanpa 90, anu tenpo sike nanpa 100. tenpo pi nasin sewi lon ma Asija lili, lon ma tomo Epesu li suli lon ona. ona la, mi ken sona e tenpo utala, e kama ante pi nasin sewi tu ni: nasin sewi sin pi jan Jesu, en nasin sewi majuna pi kulupu Juta.
tenpo ma en tenpo sewi pi lipu ni
tenpo sitelen la, kulupu sin pi nasin sewi ona li kama weka tan kulupu Juta. toki mute la, jan li ken sona wawa e ni. tenpo mute la, sitelen “kulupu Juta” li lon. ni li toki ala e jan ale pi kulupu ni, li toki e jan lawa ona, e jan pi pilin utala tawa kulupu Jojane. tenpo ma la, lawa pi ma Loma li lon. lipu li toki ike ala e ona. taso, jan Jesu li toki tawa jan lawa Pilato la, jan li ken pilin e ni: lon toki pi jan Jesu, en wawa lawa pi jan Pilato li utala.
tenpo pi nasin sewi la, mi ken sona e ni: kulupu Jojane li utala lili e kulupu ante pi nasin sewi ona. kulupu ni li olin e jan Jojane. ni li ken toki e tan pi sitelen ni: jan Jojane li suno ala (1:8), li jan lukin taso pi jan Jesu.
jan sitelen en kulupu ona
ken suli la jan lukin ala li sitelen e lipu ni. taso, jan sona pi nasin sewi tan kulupu Jojane li pali e ni. kulupu ni li toki e ni: ona li tan “jan kute olin pi jan Jesu” (21:24). lipu li toki e jan kute ni tawa ni: ona li ken toki e lon lipu. lipu li toki ala e ona tan ni: ona li sitelen e lipu. lipu ni li kama ni tan pilin pi kulupu Jojane tawa nasin pi jan Jesu. weka, en utala, en kon, en pilin kulupu pi nasin sewi li ante lili e ona.
toki ante pi jan Jesu
sama ala lipu “sona sin pona” tu wan ante la, lipu “sona sin pona tan jan sewi Jojane” li weka e toki sitelen pi nasin pona, e weka pi kon ike, e len sona sewi pi jen Jesu (lipu ni la, jan Jesu li len ala e sewi ona). taso, ona li pana e toki wawa sewi nasin pi jan Jesu. open la, jan Jesu li toki, li lon poka sewi, li sewi (1:1). toki open pi sona suli (1:1-18) li toki musi pi nasin sewi, li sitelen e pilin lipu pi suli nanpa wan: jan Jesu li tan nimi, li suno ma, li kama lon sewi.
lipu “sona sin pona tan jan sewi Jojane” la, jan Jesu li wawa, li sona, li sewi. ona li toki e toki sona suli, li toki pona tawa jan mute. tenpo mute la ona li toki pi len ala e lon ona, e wile ona kepeken toki “mi lon”. ni li sama nimi sewi (pi sitelen tu tu) tan lipu sewi Tanaku.
wile en toki suli
lipu li toki e wile ni ona: jan lukin li ken sona e ni: jan Jesu pi ko sewi li mije lili sewi (20:31). lipu li wile ala toki e lon tenpo, li wile toki e sona e nasin sewi: “jan li sona e ona la, jan ni li moli ala li jo e kon pi tenpo ale.” (3:16) toki sona suli mute li lon lipu:
- sona, en sona ala
- suno, en pimeja
- toki lon, en toki ike
- kon, en moli
- pali ike, en pali pona tawa jan Jesu, tawa kulupu
sona li lon lawa ala taso. ona li pilin pona, li kama wan sewi kin.
tenpo en nasin sitelen
jan sona mute pi nasin sewi li sona e ni: lipu “sona sin pona tan jan sewi Jojane” li kama ante mute. ken la, jan li pali e ona lon tenpo mute. jan li sona e ni tan ni:
- 15-17: toki weka pi jan Jesu la, ona li toki e tawa sewi ona e kama pi kon sewi. jan sona la, jan li pana e kipisi lipu ni tan wile pi nasin sewi. kipisi lipu ante pini la, ona o kama ala (14:31).
- 20:30-31: jan sona la, ni li pini majuna pi lipu ni. ona li toki e wile ona. kipisi lipu (21) kama li ken tan pana pi tenpo kama. ken la, ona li kama lon lipu tan ni: kulupu Jojane li pilin sona ala e jan lawa ona. (jan Petulo anu jan kute olin).
pini
lipu “sona sin pona tan jan sewi Jojane” li lipu ala pi sona tenpo lon. ona la, jan Jesu sewi li pana e kon lon tan nasin sewi. tenpo pi kama lipu la, kulupu Jojane li alasa e nasin sewi, li weka. ona la jan Jesu li jan pi pana sona taso, anu jan toki sewi taso ala, li kama lon pi toki sewi. toki nasa, en sitelen wawa, en nasin sona lipu li awen e ni: lipu ni pi nasin sewi li lipu pi wawa nanpa wan tan open nasin sewi pi jan Jesu.
- jan Pilipu