pali kpkn toki ala

ike lawa li awen lon tenpo suli li weka la, mi open sitelen lon ilo Notion e kama sona mi. tenpo lili la mama li kama li lukin e sinpin ilo. ken suli la mama li lukin e pali mi la ni li ike tawa mi, tan ni la mi pilin e ni: mama li lukin ike e kepeken ilo mi. mi toki, ‘seme.’ wile sona tan mama la, mi pali e seme kepeken seme. mi toki e pali mi e ilo mi la, mama li wile sona e ni: seme la mi kama sona e ilo Notion. mi ken ala toki e ni: mi kama sona e lon ona tan toki lili pi ma ilo, li wile ala e kama sona pi nasin kepeken tan ni: mi kepeken ona tawa sitelen lili taso tawa ijo nasa kule ala. taso mama li awen toki e ni: ilo Notion li wawa mute li nasa mute e lawa lon kepeken.

tenpo mute mi la, mi wile alasa e nasin kepeken ilo lon mi taso. mi lili la olin la mi kama sona e ijo sin lon ilo mi lon ilo toki mama. ilo mi nanpa wan li tawa ni: jan lili li kama sona e toki e sitelen e nanpa. ilo mi nanpa tu li tan tenpo pini (mama mi li jo e ona lon poka tenpo sike #MA la jan pi tenpo mi li kepeken ala e ilo ni sama mi. mi lon tomo sona la jan ante pi mama ala li toki e ilo ni lon tenpo nanpa wan, la jan toki li toki e ni: jan li sona e ilo ni la ona li tan tenpo pini sama tenpo sike #LLLTTAMMMLL. ni la mi pilin e ni: wa tan tenpo ni la mi jan majuna :D) li tawa alasa nimi. tenpo li tawa la mi lon tomo sona, jan ale li sona e nasin ilo la mi taso li sona ala. jan ala li pana e sona tawa mi la mi kama sona lon taso. tawa mama mi la ilo li ijo suli li ken ante e jan taso ona o kama sona e nasin pona ilo pi sona ona ala kepeken jan ante. tan ni la, mi sona ala e nasin ilo la mi alasa e ale lon ilo, taso mama li sona ala e nasin ilo la ona li alasa e ona tan jan ante pi ma ilo tan mi (ken tu li lon: #W) mi pali e ona tan musi lon tenpo pini la mi sona e nasin #T) mi sona ala la mi alasa e ale lon ilo, tenpo la mi kama e wile mama lon alasa nanpa wan).

taso ante la, jan li wile pali e moku li wile len li wile telo e ona la, mama la ona li alasa ale tan ona taso tan ni: jan ala li pana e nasin pali. taso mi la mama li pali e ale ni tawa mi, la tenpo li tawa la mama li pana e nasin pali. taso ona li awen pali la mi pali ala li kama sona e ala lon tenpo mute. (taso mama meli li ken wile ala pakala e mi la, tenpo la ona li wile ala pana e nasin pali. mama mije la mi kama sona e nasin li weka e selo tan kili la, mama meli li toki e ni: mi ken pakala e luka. musi a)

ni la, ken la mi ken kama sona e nasin pali ni sama nasin mi pi kama sona ilo: tan alasa mi taso tan pali kepeken toki ala. ken la mi wile kama sona e nasin pali pi moku linja li wile seli pakala e tomo mi