jan majuna pi toki mute

poka pi tomo mi la jan majuna li lon. taso wawa sijelo ona li weka ala. tenpo ale la ona li wile toki tawa jan ante. ona li sona e ijo mute a. ona li ken toki lon ijo ale. ni la toki ona li pini ala.

ken mute la jan pi ma mi li poka ala tawa ona. ni li tan seme? jan mujuna li jo e mani mute li wile ala pali li wile e ni taso:jan li lon poka ona li toki anu kute tawa ona. taso jan ante li wile ijo ante a.

tenpo la ona li pali e moku pona mute lon tomo ona li kama e jan tawa tomo. ona la ni li nasin nanpa wan a. nasin ni li pana e tenpo toki tu tu. ona en jan ante li tawa tomo la ni li tenpo toki nanpa wan. ona li lon supa tomo la ni li tenpo nanpa tu. ona li lon supa moku la ni li nanpa tu wan. ona li pini moku li kama sin tawa supa pi jan kama la ni li nanpa tu tu.

tenpo suno ni la jan majuna li lukin e ni li toki tawa mi:

jan Asilu o, o kama lon poka mi. moku mute pi pona mute li lon tomo la mi moku a.

mi wile ala moku lon poka ona. taso tenpo pi pali ala la toki ona li pona tawa mi. mi ken sona mute tan toki ona li sona e ijo mute pi tenpo pini. kin la mi sona e ni : jan li majuna la toki li ijo suli tawa ona. jan li kute e ona la ona li pilin pona. pana pona li pona a. ni la mi tawa lon poka ona.

insa pi tenpo moku la ona li toki e ni:

tenpo pini la mi sona e jan. ona li sama ala jan ante tan ni: tenpo mute la ona li pana e luka tawa sinpin uta li pana wawa e kon tawa luka a. mi sona e jan ante pi nasa ni a. ni la mi toki tawa ona lon pali nasa ni.

ona li kama toki:

“mi jan lili la palisa luka mi li pakala tan ilo kipisi. pakala li lon tenpo mute.( o sona e ni: misikeke pona li lon ala tenpo majuna.) pakala li weka ala li pana e pilin pakala la mi weka lili e pilin ni kepeken kon uta. mi ni lon tenpo mute. tenpo li tawa la pakala li weka. pilin pakala li weka kin. taso ni li weka ala: mi pana e kon tawa luka mi a.”

toki musi ni li open wawa e uta pi mi tu a. mi lon poka ona la toki pona en moku pona e pilin pona li lon. ale la ale li pona a.