jan Muwama Pasiku

o lukin e ni kepeken insa lawa. jan lili li lon. mama ona li moli. ken ante la mama li wile ala e ona li weka e ona. jan lili ni la jan ante o mama e ona. jan mute li jo ala e jan kili li wile e ona. ni la jan wan ni li mama pona e ona lon tomo. ni li nasa ala. nasin ni li lon ma ale.

taso , sijelo pi jan lili ni li pakala anu wawa ala la jan seme li wile e ona ? ken lili la jan wan pi pona mute li mama e ona. taso jan lili ni li kama moli lon tenpo kama lili tan pakala sijelo wawa anu jaki sijelo suli la jan seme li mama e ona. ken suli la jan ala li ni.

ni la o sona e jan Muwama Pasiku. tenpo pi jan lili ona la ona li lon ma Lipija. taso ona li kama jan suli la ona li tawa ma Mewika. ona li jan pi ma Mewika lon tenpo ni. ona li lon ma la tenpo sike mute mute mute tu (M-M-M-T) li pini.

kulupu jan la jan Muwama Pasiku li ante. jan lili pi mama ala li poka tawa moli la ona li mama e jan lili lon tomo. ona li pana e olin e moku e misikeke e ijo wile ante tawa jan lili ni. pali ni ale li tan olin taso taso.

jan li toki tawa ona e ni: tan seme la sina mama e jan lili pi ijo ni taso? wile sona ni la ona li toki e ni:

olin mama li lon ala la jan ala li lon poka la jan lili ni pi pilin pakala o moli ala. ni li wile mi tan pali ni.

ona li mama pi nasin ni e jan lili mute mute mute mute a. jan lili luka luka li moli lon luka ona. kin la ona li jo e jan kili pi sijelo pakala. jan kili ni la kiwen walo insa li kama ko a. tenpo pini la meli olin ona li moli. ni la ona li sona pona e pilin pi jan taso. kin la ona li utala e jaki sijelo suli lon tenpo pini. ni la ona li sona pona e pilin pi jan pi sijelo pakala.