mama majuna

tenpo majuna a la, jan en mama meli majuna li lon. nena suli li lon poka tomo. mama mije li moli lon tenpo pini. ona li jo e ma lili. jan li kasi e ma tawa kili tawa pan. ni li pana e moku e mani tawa ona. ona li jo e mani pi mute lili. ona li pona tawa jan ante li utala ala li pilin pona.

tenpo pini la jan li lawa e ma Sinin. nasin lawa la ona li ike mute. jan ale o pali tawa pona pi jan lawa. pona jan li suli ala tawa ona. ona li wawa lon utala. taso ona li pilin monsuta wawa tan sona ni. tenpo la pona sijelo en wawa sijelo li ken weka tan jan ale. ijo li pana e sona ni tawa ona la ona li pilin monsuta wawa li weka wawa. ni la ona li pana e toki suli ike tawa jan ale. toki ni la jan majuna ale o kama moli lon tenpo lili.

ma Sinin pi tenpo ni la jan mute li sona ala e nasin pona. kulupu li weka e jan majuna tan tomo li pana e ona lon sewi nena. pini la ona li kama moli. nasin ike ni li nasa ala tawa jan mute a.

jan kasi li olin mute e mama majuna ona. ona li pana e pona ale tawa mama li awen e ona tan ike ale. ni la toki pi jan lawa li pakala wawa e pilin ona. pilin pakala li lon insa ale ona sama ni: telo li lon insa ale poki. ma Sinin la jan li ken ala toki insa e ni: jan lawa li toki la jan li ken ala ken kute ala?

pilin pakala mute la jan kasi li moku wawa e kon li weka wawa e kon lon tenpo mute li pilin e ni: ona li ken ala awen e mama tan moli. pini la insa ona li toki: o ken e ni: mama li moli. taso ike moli la mama o pilin ike pi lili nanpa wan taso. tawa ni la ona li kama pona e ijo wile.

suno li kama weka la jan kasi li pini e pali. kasi pan li pana e kili pan mute lon tenpo pini la jan kasi li weka e selo kiwen ona li awen e pan pi selo ala lon poki. taso selo lili a loje li awen lon. selo ni li weka la pan li kama walo. taso ni li pali mani la pan pi selo lili li moku suli tawa jan pi mani lili. jan kasi li seli e pan lon telo li weka e telo ona kepeken seli suno. ona li supa e len pi poka tu tu lon ma li pana e pan lon ona li wan e poka ale kepeken linja. jan kasi li pana e poki len ni tawa monsi pi anpa lawa. kin la ona li jo e telo suwi lete lon poki pi kili suli.

pini ni la ona li sewi e mama majuna pi wawa ala li jo e ona lon monsi li open e tawa pi pilin pakala tawa nena. nasin li suli li linja. ona li pana sin e noka lon nasin la, noka ante li lon anpa mute. tawa ale la nasin li ni. nasin ante li lon ma mute li ante tan poka wan anu poka ante. jan pi alasa soweli en jan pi kipisi kasi li pali e ona. tenpo la nasin li kama nasa tawa ona. ona li pilin e ni: ona o tawa lon nasin seme?. taso ni li suli ala. nasin ale li sama. nasin li pini lon ma seme? ona li sona ala. taso ona li awen tawa li pana e noka tan sewi lili tawa sewi suli tawa sewi pi nena ni: nimi ona li Opasujama anu nena pi weka pi jan majuna.

oko mama li wawa ala. taso ona li ken lukin pona e ni: jan lili ona li tawa wawa tan nasin wan tawa nasin ante. tawa ni la pakala suli li ken a. tan olin wawa la pilin monsuta li kama mute lon ona. jan lili ona li sona ala e nasin mute pi nena ni. ona li tawa anpa tan sewi nena la ken monsuta li lon. ni la insa tawa la ona li palisa e luka li weka e palisa lili tan kasi li jo e kulupu ona lon luka. tawa pi tenpo lili li pini la ona li pana e palisa kasi mute tawa anpa. taso jan kasi li ken ala pilin e pali ni. ona li ni lon pini pi tawa sama ale. ni la nasin linja pi monsi ona la nena lili pi kipisi kasi li lon pi weka sama lon ma mute.

tawa suli ona li pini lon sewi nena. sijelo pi wawa ala en pilin pakala mute la jan kasi li pana e mama tawa ma kepeken nasin awen. kasi suli li lon poka. kasi mute la laso li lipu. taso laso pi kasi ni li palisa lili tawa lukin. ona li kiwen ala la jan li ken sike pona e ona kepeken wawa luka lili . ona mute li lon anpa kasi. jan kasi li kalama ala. ona li pali e supa pona kepeken laso kasi ni tawa mama. jan kasi la ni li pana pona pi nanpa pini tawa mama. ona li sewi olin e mama tan ma li pana e ona tawa supa. lete li lon la jan kasi li pona e len mama. len ni la mama li pilin ala e lete. telo mute li lon oko la pilin li pakala suli la ona li toki e ni tawa mama:

mi tawa.

lili mi o, ijo ala o len e lukin sina. nasin pi tawa anpa li ike mute la pakala suli li ken. o lukin pona tawa nasin. o tawa lon nasin ni taso: kulupu pi kipisi kasi lili lon ona. ona mute li lon ma ante mute la tawa sina li lon nasin sama li pakala ala.

mama majuna li pana e toki pona ni pi nanpa pini la wile wawa pi pana pona taso li lon kalama ona. kalama ni li ken ala tawa pona tan uta a.

toki ni pi olin wawa nasa li ante e sinpin pi jan kasi tawa nasin anpa. ona li ken lukin e pali mama pi olin suli lon nasin. jan kasi li lukin sin tawa luka mama. selo li pakala li ante kule tan lon pi tenpo suli tan pali pi tenpo suli li. pilin pi jan kasi li pakala suli. ona li anpa mute e lawa tawa ma li mu pakala pi kalama suli.

mama o .. olin sina li pakala e pilin mi a. mi o weka ala e sina. mi tawa anpa la sina o lon poka mi. mi en sina o moli lon tenpo sama a.

tenpo sin la ona li sewi e mama kepeken luka li pana e ona tawa monsi ona. ona li pilin e ni: suli mama li kama lili a lon tenpo ni. mun li pana e suno. sitelen pimeja pi kasi suli li lon. jan kasi en mama li tawa wawa tawa tomo lili. tomo li lon anpa nena.

insa tomo la poki pan pi anpa ma li lon tomo pi pali moku. jan ante li ken ala sona e lon pi poki ni tan lukin. jan kasi li pana pona e mama lon poki. ona li pana e wile ale tawa mama. tenpo ale la jan kasi li alasa e ni: jan li lon ala lon poka tomo? jan li kama ala kama tawa tomo? ijo li mu la ona li jan ala jan?. tenpo mute li tawa. jan kasi li pilin e ni: jan ante li ken ala alasa e mi. mi en mama li ken awen pona. monsuta li weka.

taso a, jan lawa li pana sin e toki pi wile nasa tawa jan ale. toki ni la jan lawa li wile e ni: jan ale o pali e ijo ale tawa jan lawa. jan lawa li wile e ni: seli li moku e kasi la ko pi pimeja walo li kama lon. jan o pali e linja kepeken ko ni li pana e ona tawa jan lawa.

jan ale li pilin monsuta tan toki pi jan lawa. taso wile pi jan lawa o kama lon. taso jan seme pi ma Sinin li ken pali e linja ko?

tenpo pimeja wan la jan kasi li toki e wile pi jan lawa tawa mama poki. mama li toki e ni:

ni li ken a. mi o alasa e nasin kepeken insa lawa. mi o kepeken insa lawa.

suno kama la mama li toki e nasin pi pali linja tawa jan kasi.

o pali e linja suli wawa kepeken kasi pan pi telo ala. o alasa e kiwen mute. supa ona ale o pona. o pana e kiwen wan lon ma. o pana e kiwen ante lon poka ona. sama la o pana e kiwen ale. ni la kiwen ale li lon linja sama. ni li pini la o pana e linja kasi lon supa kiwen. tenpo pimeja la kon li tawa ala la o pana e seli tawa linja kasi. seli li moku e linja la linja ko li kama lon a.

jan kasi li kulupu e jan mute li toki e nasin pi pali linja tawa ona ale. ona li pali pona e pali ale pi toki mama. pini la linja pi ko pi pimeja walo li kama lon a.

jan lawa li toki e pona mute lon jan kasi. taso ona li wile e ni: jan kasi li kama sona e nasin pi pali linja tan jan seme?

pakala a, pakala a, ale la mi o toki e lon a.

jan kasi li lon sinpin pi jan lawa li anpa pona e lawa tawa jan lawa li toki pi kalama lili e lon. jan lawa li kute pona tawa toki pi jan kasi. insa pi toki ni la kalam ala li kama tan jan lawa. pini la jan lawa li sewi e lawa li toki e ni:

pona pi ma Sinin la wawa jan taso li pona ala a. ike la sona ni li weka tan mi : linja lawa li kama walo la sona jan li kama suli a.

jan lawa li weka e lawa ike. ni la nasin ike pi weka pi mama majuna li weka ale tan ma Sinin li kama ala sin lon tenpo ale.