soweli loje Lena la musi

tenpo musi suli la
kasi sewi en kasi ma
li mama e lipu laso mute.
ma ale la soweli li kute
e toki tan soweli lawa Nopa.
ona la ale o tawa ona
o toki pona lon ma lawa.
ni la soweli ale li kama.
taso wan li awen weka:
ni li soweli loje Lena.
tenpo pini la ona li pali
e utala mute tawa ale.
ona ike li sona e ni:
soweli ante ale kin
li wile e ike tawa ona.
wile li ike la weka li pona!
kulupu li kama lon sike
la ona ale li pilin ike
tan soweli utala Lena taso.
(wan li ante, li pimeja walo.)
ni la kulupu li lon a.
soweli Kiken en soweli poka
li kama lon sinpin kulupu.
wawa la ona Kiken li mu
e toki: ‘lawa Nopa o,
sina la nasin en nimi li jo
e wawa e pona e mute. ni la,
pakala mi o sona sina.
pona mi li weka ale.
loje Lena la mi awen
pilin e utala e anpa.
open la o sona e unpa
tan ona a tawa meli mi.
kin mi mama soweli
li weka la ona li jaki jelo
e soweli lili mi kepeken telo
la tu li lukin pakala.
taso sin li kama a:
tan ante mute la ona loje
li wile kama lon suno open
li wile toki lon kulupu lawa.
nasin ni la lon ala
o awen weka tan uta soweli.
ona Lena li wile toki
la ona o luka e ilo sewi
o toki lon e ona e meli.
taso ijo sewi li kama
la ona li wile toki ala
li weka tawa tomo ona.
soweli ale ni li sona.
wawa Nopa mi o kute,
utala ona li suli mute:
len ale tan ma Ken
li kama lipu sitelen
la mi ken ala pana e ale.
ni la uta mi o lape.
taso meli mi la anpa
o awen sona lon kulupu lawa
o anpa sama e soweli Lena.’
soweli Kiken li pini li weka
la soweli ante li kama e ijo.
ona lili li nimi Ĝentilo
li mu lon toki Epelanto:
tenpo lete la jo taso
li moku lili palisa.
soweli Lena li alasa
e suwi ni lon uta kiwen.
poka ona la soweli Sipe
li kute li kama pilin nasa.
linja ona li kama palisa.
ona li tawa insa sike
li open ni e toki wile:
‘lawa mi o! loje Lena
li ike ni a tawa sina
la soweli suli en soweli lili
li wile toki e ijo pini
tan ike ala tan nasa suli.
soweli Sensilo la suwi
li pini lon tenpo mute a.
mi pona e sona utala:
mi taso a li jo e moku!
jan li pali lon palisa tomo
la mi tawa ni lon alasa pan
lon tenpo pimeja lape jan.
taso mi toki ike ala.
soweli lili li pilin wawa
la ona o toki tawa mi a
o toki ala tawa sina.
kulupu o kute e ante.’
ni la soweli telo Panse
li utala e toki ona.
‘sina Sipe o, mi sona
e ike seme la mi ken toki?
lon la loje Lena li moli
e soweli mute li weka e mani.
ona li olin ala e ma ni
e sina ale e suli Nopa;
loje li wile pana e ona
lon anpa moli, li wile taso
esun e ni tawa suwi waso.
sina seme e ike ni?
o lukin e soweli Kuwa mi
e kute wawa lon sijelo lili.
ona li suwi sama kili
li utala lon tenpo ala!
taso pini utala lawa
li pini ala e soweli lupa:
ona li uta e soweli Kuwa
lon suno pini nanpa wan.
soweli Kuwa li alasa
e sona sewi tan sewi Jesu.
soweli Lena li wile esun
e toki sona tawa ona
la ona Kuwa o kute pona
o awen lon noka loje tu.
loje li toki wawa li mu
e sona pona sewi taso.
poka la mi kute e nasa.
mi alasa wawa e ma mu
li kama lukin e soweli tu.
soweli Lena li wile luka
e lawa tan sijelo lili Kuwa.
mi pali e ala la soweli suli
li pakala ale e lawa lili
tan soweli Kuwa lon insa noka.
o lukin e linja tan kiwen uta
lon selo lawa lon selo sijelo.
sina Nopa o pali e ijo
o pini e ike tan soweli Lena.
sina ni ala la ale o weka
e soweli lawa ale ante
lon tenpo kama lon tenpo awen.
o pakala e ale ona!’
‘sina Panse li toki pona.’
ni li tan soweli Kiken suli.
‘soweli lawa li wile e moli
la ni li pona tawa mi ale.
sina ni ala la soweli ante
li awen kama ike tan loje.’
ni la soweli Kinpe li open.
len la ona li walo li pimeja.
ona la mama en soweli Lena
li kama tan soweli mama sama.
ona la uta kiwen li kama
e sona ni lon kalama jaki:
‘soweli Kiken en soweli ale
en jan en waso li sona e wan:
sina ike tawa jan
la sina ike lon toki ona.
taso wile mi li pona.
jan li moli ni la lawa
o kama e moli lon nasin sama.
wile sina en wile mi la
mi o pona taso e sina.
soweli ike o anpa ike!
mama Lena la ni li wile.
ike la ona li ken ala
kama, li ken ala pana
e sona tan sina Kiken kin a.
mute seme la uta sina
li pakala e len loje ona?
sina en ona kin o pona
tawa soweli lawa wawa.’
ona Kiken li kalama nasa:
‘tan mama sina la sina sona
toki ike e soweli pona!’
‘toki mi la ale li lon.
sina Kiken ike o,
sina ike e mama mi
lon tenpo mute lon nasin ni.
ona li pana e moku kala
tawa sina tan poki tawa
la sina weka e kala suli.
sina taso li moku e suwi
li wile pana tawa mama
e kiwen kala e moku ala!
sama li lon tenpo ante.
sina tu li lon tomo lape
li lukin e lipu moku suwi;
lipu li kama tan soweli suli.
ona Lena li wile e ijo
la sina uta weka e lipu
tan linja lili li toki ni:
‘moku o tawa sina kin.
mi moku e lipu la sina Lena
o uta e linja tan moku weka!
ona li suwi wawa a.’
soweli Lena li pakala.
ike la jan li kama, li lukin
e ona Lena li luka suli
e ona lili lon poki len.
ike Kiken li kepeken
e musi jaki e pakala nasa
tawa soweli pona mama.
ona la ni li open taso.
toki ni en toki Walon
en toki Tusi en toki Sisi
li jo ala e nanpa pona nimi
tawa ike ale ona.’
(sina la nanpa ni o pona.)
‘taso ni la mi open e uta:
sina Kiken li toki e unpa
tan soweli Lena tan soweli meli.
mije Lena li olin sewi
e ona la meli sina li sama.
ni la ike li ken ala.
mi sona pona la mi toki:
ona tu li awen olin
lon sike suno luka tu a.
ni la meli suwi li unpa
tan olin tan kon pilin anpa.
lon ona la mije Lena li kama
e ike ala e pilin sewi!
ni o pini e toki meli.
ante la soweli Kuwa kin
li pilin suli tan lili sin.
mama li toki taso e pona:
jan pona mute li pana e sona.
taso jan lili li kute ala
la ona sona o ken pana
e utala suwi sama ilo.
sama la soweli Ĝentilo
li toki e moku tan tenpo lete.
toki ni li wile seme?
jo li tan ante la nasa li lon!
Bado pigeton, bado pepedon:
nasin ike la jo li kama
la weka jo o ike sama.
soweli Lena li ike e ike.
seme la soweli lawa li wile
moli e ona tan lili ni?
ona li pona suli e mi.
lawa Nopa li wile lape
e utala ale tan soweli ale
la soweli Lena li pakala ala.
ona li awen lon tomo sama
li seli lili e sijelo lete
lon lili len tan nasin sewi.
ona li moku e kasi taso
e ala tan soweli anu waso.
mi kute e ni tan soweli ante.
suno pini la ona li awen
lon lupa lili. soweli Lena
li weka tan tomo li awen weka:
lupa li tomo taso mama.
ni la ona li jo ala:
moku ale en mani ale
li kama taso tan soweli ante
tan wile pona taso ona.
sijelo loje en luka en noka
li lili li lete tan moku ala a.
tan ona sama la ona li pakala:
sewi la pali ni o pona.’
ona Kinpe li pini e sona
la waso Kulumu li kama
tan nena sewi tawa ma lawa
li awen lon supa e waso moli.
ni la ona li wile toki.
moli li nimi Kipisi.
sijelo la waso ni
li jo ala e lawa tan utala uta.
soweli lawa o lukin e supa.
waso mije Kulumu lawa
li tawa e luka lon nasin wawa.
waso tu li lon poka moli
li tawa, li jo e nimi suli.
wan li nimi Kawawa.
nimi sama la mije jan
li wawa tawa jan meli Alente.
nimi Kapala li ante.
ona la len li sitelen kule
li pona tawa kulupu mute
tan ma Peson tawa ma Posuka.
waso ale li awen lon luka
e palisa ko la ko li seli
tan waso moli Kipisi meli.
waso poka li pana e mu
tan waso weka kulupu.
waso Kiki en waso Puwa
li anpa tawa ilo supa
li kalama sama tan pakala wawa.
ona li kama lon ma lawa
la waso lawa Kulumu
li tawa insa kulupu
li open e selo uta ona:
‘soweli Nopa en ale o pona.
sewi en sina wawa o kute
e moli jaki tan uta suli
tawa suwi Kipisi mi.
soweli Lena li pali e ni
lon tenpo pini lili taso.
seli li weka e lete walo
li laso e ma li kule e kasi
la mi kama mama e waso mani
lon nanpa suli tan meli olin.
meli li pana lon sike poki
e mije mute e meli mute.
waso ale li kama suli
li awen lon ma kasi laso.
sinpin kiwen li awen e waso
e tomo lili lon insa ma.
tomo la soweli li jo jan
li lukin lon kasi li pilin lon kiwen
li utala pona e soweli ike.
ni la mi mute li pilin wawa:
ijo ike li ken ala
tawa waso suwi mi.
soweli Lena li sona e ni
li alasa kama tan sinpin selo.
mi sona ala e nanpa tenpo
la ona li toki li pali nasa.
taso soweli pona li kama
li weka e soweli loje tan ma.
alasa wan li pakala
lon lupa lili lon ma poka.
soweli mi li kute e ona
li kama li uta e linja loje
tan sijelo ona lon selo open.
jaki la ona li sona weka.
sewi o ike e ona Lena!
tenpo suli la weka li awen.
kama sin la ona li ante:
ona li sijelo lili lete
li toki pona tawa sewi
li pana e lipu tawa mi.
sitelen selo la lipu ni
li wile kama tan luka sina.
mi alasa lukin e sitelen insa.
ni la mi la sina wile
pini ale e utala ike
tan kulupu ale lon ma ale.
lipu la utala ale o lape
lon kulupu ale soweli
lon kulupu ale waso mi.
soweli loje li toki kin
la ona li kute e nasin sin
li awen lon lupa li weka tan tomo
li utala mute e sijelo ona
li kama sona e nasin pakala .
ona li jo e len selo e palisa
tan tomo sewi Emale
e utala kiwen lon selo len
li ni: “lawa Kulumu o,
ma ni la sina o awen lon
o pilin lape tan sona ni.
jan pona sewi li kute e mi
la mi o moku e kasi taso.
loje mi li kama walo
la mi o sewi e kon insa.
sewi la mi o weka tan sina
tawa kulupu sewi kama.”
kasi la ona li tawa anpa
lon nasin tawa tomo ona.
mi kute e ona lon pilin pona
li kama tawa waso mi.
mi sona ike e soweli
la mi pana e waso ale tan tomo.
mi ale li kama lon ma suno
li pilin ala e soweli jaki.
taso ona li kama tan kasi
li pini a e lupa sinpin.
waso mi la wan lili
li weka wawa tan ma supa;
loje li pana e ni lon uta.
uta li kama pilin e waso
la soweli mi li pakala taso
li awen ala e mi tan ona.
sina Nopa o pilin o sona
e pakala sona pi soweli Lena.
suno li sewi anu weka
la ona li weka e waso lon uta.
uta li anpa e nanpa ona
tan mute luka tawa tu tu.