jan Awi Pote en kiwen pi jan sona

jan lili pi moli ala

jan mije Tali en jan meli Tali li lon tomo Pawe Ta Fo li pilin e ni: ona li nasa ala, ni li pona mute tawa ona. sina wile lukin e jan nasa la sina lukin ala e ona tan ni: ona li wile ala nasa.

mije Tali li lawa pi esun Kunin. esun ona li pali e ilo. ona li jan suli mute. lawa ona li lon poka sijelo ona. ona li jo e linja mute suli lon sewi uta ona. meli Tali li lili. linja lawa ona li jelo. ona li wile lukin e jan ale lon poka tomo ona li wile sona e ijo ona. jan Tali li jo e jan lili. jan lili li nimi Tasi li pona mute tawa ona.

jan Tali li jo e wile ona ale, taso ona li wile e ni: jan ala li sona tan jan Pote. ni li ike mute tawa ona.

meli Pote li e jan sama pi meli Tali, taso tenpo pini mute mute la ona li lukin ala e ante. jan Tali toki e ni: ona li jo ala e jan sama. tan ni: jan sama ona, en mije ona, li sama ala jan Tali. pilin ni li ike tawa jan Tali: jan Pote li kama tomo ona la jan ale li toki. ona li sona e ni: jan Pote li jo kin e jan lili, taso tenpo ala la ona li lukin e jan lili. jan Tali li wile ala e ni: jan lili ona li lukin e jan lili Pote.

tenpo suno pi telo lon sewi la mije en meli Tali li pini lape. ona li sona ala e ni: ijo nasa mute li kama lon ma ona. mije Tali li toki pi kalama musi li kama len tan ni: ona li tawa pali. meli Tali li toki musi li lon jan lili Tasi lon supa sewi.

jan ala li lukin e waso suli lon lupa.

mije Tali li kama jo e poki lipu ona li uta e meli Tali li wile uta e jan lili Tasi, taso ona li ken ala tan ni: jan lili Tasi li kalama li pakala e pan ona tawa sinpin tomo. “jan ike”, mije Tali li toki. ona li tawa lon tomo tawa ona li tawa tan tomo ona.

tenpo ni la ona li kama sona e ijo nasa pi nanpa wan: soweli li lukin e sitelen pi ma tomo. tenpo lili la mije Tali li sona ala e lukin ona, taso ona li lukin sin. soweli li lon poka tomo ona, taso ona li lukin e sitelen ala. ona li pilin e seme? ona li ken ala lon. mije Tali li lukin tawa soweli. soweli li lukin tawa ona. ona li tawa nasin li lukin sin tawa soweli: soweli li lukin e nimi nasin Pawe Ta (“ni li ken ala, soweli li ken ala lukin e nimi e sitelen”). mije Tali li tawa e lawa ona li pini pilin tan soweli. ona li tawa ma tomo li pilin taso tan ni: ona li esun e ilo ona mute.

taso li pini pilin tan ilo tan ni: jan mute li len nasa. jan pi len nasa li ike mute tawa jan mike Tali. a, jan lili en len ona! ken la ni li nasin len sin. ona li lukin e jan nasa ante. jan li toki mute. ni li ike tawa mije Tali: jan li lili ala li jo e len nasa pi laso jelo! ike! taso ona li kama pilin e ni: ken la jan ni li pali e ijo mani. tomo tawa li tawa; mije Tali li kama tawa esun Kunin li pilin sin tan ilo.

mije Tali li lukin ala tawa lupa lon tomo sewi. ona li lukin la ona li ken ala pilin tan ilo ona. ona li lukin ala e walo pi tenpo pimeja lon kon. jan ante li lukin e ona. tenpo pini la jan mute li lukin ala e walo pi tenpo pimeja. taso mije Tali li jo e tenpo pi nasa ala. ona li toki kalama mute tawa jan mute. ona li toki kepeken e ilo toki li toki kalama mute sin. ona li wile moku la ona li tawa esun pan lon nasin ante.

ona li pini pilin e jan pi len nasa, taso ona li tawa lon poka kulupu lon poka esun pan. ona li lukin ike tawa jan. ona li sona ala e tan, taso jan li ike tawa ona. kulupu li toki mute li jo ala e poki mani. ona li esun e moku suwi li tawa pali ona li kute e nimi lili:

—jan Pote la mi kute e…

—jan lili ona, jan Awi…

mije Tali li kama lete. pilin ike li kama tawa ona. ona li tawa jan toki li wile toki tawa ona, taso li pali e ijo ala.

Ona li tawa mute tawa tomo esun ona. ona li toki kalama mute tawa jan pali ona, li kama jo e ilo toki, li pali e nanpa pi tomo ona taso ona li ante e lawa ona. ona li weka e ilo toki li awen pilin. ala, ona li pali nasa. nimi Pote li nimi wan ala. ken la jan mute li nimi Pote li jo e jan lili pi nimi Awi. ken la jan lili pi jan Pote li nimi Awi ala. tenpo ala la ona li lukin e jan lili. jan lili li ken nimi Api, anu Awo. ona li wile ala pakala e meli Tali: ona li kute tan jan sama ona la ona li ike mute. mije Tali li pilin e ni: ona jo e jan sama sama ni la…! taso jan pi len nasa…

ona li ken awen pilin tan ilo ona. tenpo pi pini pali la ona tawa nasin li kama lon poki jan.

—mi pilin ike —ona li toki: jan li anpa lili tawa supa nasin. mije Tali li lukin e len nasa pi jan. ona li lukin pilin pona. ona li toki e ni: —o pilin ike ala, jan pona o! tenpo suno ni la mi mute li wile pilin pona, tan ni: sina-sona-e-jan-seme li tawa a! jan Make sama sina li wile pilin pona kin!

jan li sike e sijelo ona li tawa.

mije Tali li awen. jan li sike e sijelo ona li nimi Make, taso ona li sona ala e nimi ni. ona li tawa mute tawa tomo tawa ona, li tawa tomo ona, li wile e ni: ale ni li pilin ona li lon ala (tenpo pini ala la ona li pilin e ni).

ona li kama lon nasin tomo ona la ona li lukin (ni li pona ala e ona) e soweli. soweli li supa lon sinpin pi kasi tomo. ona sona e ni: soweli li sama, li jo e linjia sama lon oko.

—o tawa! —mije Tali li toki kalama. soweli li tawa ala li lukin ike taso tawa ona. mije Tali li toki tawa ona e ni: soweli la ni li nasa ala nasa? ona li wile pona e ona li tawa lon insa tomo ona. ona li wile toki ala e ijo tawa meli ona.

meli Tali li jo e tenpo suno pona. tenpo moku la ona li toki e ni: jan pi tomo poka li jo e ike kepeken jan lili ona, jan Tasi li kama sona e nimi sin (mi o pali ala!). mije Tali li wile lukin pona. jan lili Tasi li kama lape la ona li tawa lukin e sona sin lon sitelen tawa.

—pini la, jan pi lukin waso li toki e ni: tenpo suno ni la waso pi tenpo pimeja li nasa lon ma ale. waso ni li alasa lon tenpo pimeja taso, jan li ken ala lukin e ona lon tenpo suno, tenpo suno ni la jan mute mute li lukin e ona. jan sona li ken ala sona e ni: waso li ante e lape ona tan seme. —jan toki li pali e sinpin musi. —nasa mute. tenpo ni la, jan MaKupin li toki e sona pi seli en lete. waso mute li kama kin tan sewi anu seme, jan MaKupin o?

—toki, jan Te o —jan sona li toki —mi sona ala e ona, taso tenpo suno ni la waso li ala e ijo nasa taso. jan lukin pi ma tomo Ken en Josa en Tanti li toki tawa mi tan ni: telo li kama ala tan sewi, taso mun tawa mute li kama tan sewi! ken la jan li musi lon tenpo pimeja seli, taso ni li tenpo kama mute, jan o! taso mi sona e ni: tenpo pimeja ni la telo li kama tan sewi.

mije Tali li kama awen lon supa ona. mun tawa li lon ma Juke? waso pi tenpo pimeja li tawa lon anpa suno? tenpo suno li la ona li kute tan jan Pote, kin…

meli Tali li kama tawa tomo li jo e poki pi telo wawa tu. ijo li ike. ona li wile toki tawa meli ona.

—a… jan Petuna o, olin mi o, tenpo pini lili la sina sona ala sona e ijo ni: jan sama sina li seme?

toki ni li ike mute tawa jan Petuna. ona wile ala jo e jan sama.

—mi sona ala —ona li toki—. sina toki e ni tan seme?

—mi kute e ijo nasa mute lon sin pi sitelen tawa —mije Tali li toki—. waso pi tenpo pimeja… mun tawa… jan pi len nasa mute li lon ma tomo.

—a? — meli Tali li awen e toki ona.

—a, mi pilin… ken la… ni li ijo pi… kulupu ona.

meli Tali li moku e telo wawa ona; uta ona li lukin ike. mije Tali li pilin e ni: ona ken ala ken toki tawa ona tan nimi Pote? ala, ona ken ala. ante la ona li toki e ni:

—jan lili ona la… ona li sike e suno sama jan lili Tasi mi, anu seme?

—mi pilin e ni—meli Tali li toki.

—nimi ona li seme? jan Owa, anu seme?

—jan Awi. sina wile sona e pilin mi la, ni li nimi jaki en ike.

—jan Awi—mije Tali li toki li pilin ike mute—. nimi jaki, nimi ike.

ona li toki ala e ijo sin ala tan ni, li tawa tomo lape. meli Tali li tawa tomo telo la mije Tali tawa lupa tomo li lukin e kasi tomo lon nasin. soweli li awen lon nasin li lukin tawa nasin Pawe Ta.

ona li pilin e ijo pi lon ala anu seme? anu ni ale li ijo pi jan Pote? ni li lon la… jan li kama sona e ni: ona li sama pi jan… ona pilin e ni: ni li ike mute tawa ona.

jan Tali li tawa lape. meli Tali li kama lape lon tenpo lili, taso mije Tali li ken ala lape, li pilin tan ijo ale ni. tenpo pi kama lape la ona li pilin e pilin pona ni: ijo ni li tan jan Pote la jan ala li kama tawa ona. jan Pote li sona pona e ni: ona en jan Petuna li pilin ike tan ona en kulupu ona… nasin ala la jan li kama tawa ona (ona li open e uta li kama lape)… ni li ala tan ona…

ona li sona ala e ni: ni li lon ala!

mije Tali li awen lape ike, taso soweli lon sinpin pi kasi tomo li lape ala. ona li awen sama kiwen, li awen lukin tawa nasin Pawe Ta. kalama pi tomo tawa, waso pi tenpo pimeja tu la ona li awen. lon la, soweli li tawa ala lon tenpo pimeja ale.

jan li kama tan nasin. kama ona li kalama ala, jan li ken kama tan insa ma. soweli li tawa e linja monsi ona li lukin tawa jan.

tenpo ala la jan li lukin e jan sama ona lon nasin Pawe Ta. ona li suli, li sike e suno mute mute, li jo e linja sinpin walo en suli. ona li jo e len pi laso loje, e len noka nasa. oko laso ona li suno li lon monsi mun kiwen tu. nena sinpin ona li suli li pakala, jan li pakala e nena ona. jan ni li nimi Apu Tanpeto.

kama pi jan Apu Tanpeto en nimi ona en len noka ona kin li ike tawa jan nasin ale, taso ona li lukin sama jan pi sona ala. ona li lukin e ijo lon len ona, taso ona li kama sona e ni: jan li lukin tawa ona. ona li lukin tawa soweli. soweli li lukin tawa ona. soweli la ona li musi. ona li toki.

—mi sona e ni la ni li pona.

ona li jo e ijo lon len ona. ijo lukin sama ilo seli. ona li open li sewi li pali e ijo. suno nasin li weka. ona li pali kin e ijo: suno nasi ante li weka kin. tenpo mute la ona li pali e ijo pi weka suno, nasin li kama pimeja. jan li ken lukin taso e suno tu: oko soweli li lukin e ona. jan li lukin tawa nasin la jan ken ala lukin e ijo. jan Petuna, kepeken oko suno ona, li ken ala kin. jan Tanpeto li awen e ijo pi weka suno lon len ona li tawa lon poka soweli. ona li lukin ala tawa soweli, taso toki tawa ona.

—lukin tawa sina li pona mute tawa mi, jan sona MaKonaka o.

ona li lukin tawa soweli, taso soweli li lon ala. jan meli li lon. ona li jo e sinpin pi musi ala, e sike tu sama linja oko soweli, e len pi laso jelo. linja lawa ona li pimeja li sike lon monsi pi lawa ona. ona li lukin pona ala.

—sina sona tan seme e ni: soweli li mi? - ona li toki.

—jan sona pi olin mi o, tenpo ala la mi lukin e soweli kiwen sama sina.

—sina awen lon poka sinpin kiwen tan suno kama la sina kiwen kin —jan sona MaKonaka li toki.

—tan suno kama? sina tawa musi ala anu seme? nasin tawa ni la mi lukin kulupu musi mute.

jan sona MaKonaka li pana e kon li pilin ike.

—jan ale li musi, a —ona li toki—. mi pilin e ni: ona li awen sona taso ala. jan Make li kama sona! mi lukin e sin. —ona li lukin tawa insa tomo Tali—. mi kute. kulupu pi waso, mun tawa… ona li nasa mute ala. ona li ken kama sona e ijo. mun tawa li kama tan sewi lon ma tomo Ken… mi pilin e ni: ni li pali pi jan Tetalu Tike. ona li jo e lawa ala.

—ni li ike ala tawa mi —jan Tanpeto li toki kepeken kalama suwi—. tenpo pi sike suno mute la mi ken ala musi…

—mi sona e ni —jan sona MaKonaka li toki—. taso jan wile ala kama nasa tan ni. jan ale li kama nasa, li tawa nasin lon anpa suno, li len ala e len Make, li toki…

ona li lukin mute tawa jan Tanpeto, li awen e toki tan ona. taso jan Tanpeto li toki ala. jan sona MaKonaka li awen toki.

sina-sona-jan-seme li weka a. jan Make li sona tan mi mute la ni li nasa. a… ona li weka lon, anu seme, jan Tanpeto o?

—mi pilin e ni: ona li weka —jan Tanpeto li toki—. ni li pona mute tawa mi mute. sina wile ala wile e suwi pi kili jelo?

—suwi seme?

—suwi pi kili jelo. ni li suwi Make li pona mute tawa mi.

—ala, ala —jan sona MaKonaka li toki, li pilin e ni: tenpo ni li ike tawa suwi—. mi wile toki tawa sina, sina-sona-jan-seme li weka la…

—jan sona pi olin mi o, mi pilin e ni: sina jan sona, li ken toki e nimi ona, anu seme? sina-sona-jan-seme la ni li nasa. tenpo mute la mi wile e ni: jan ale li toki e nimi ona: jan Wotemo. —jan sona MaKonaka li monsi, taso jan Tanpeto li selo e suwi pi kili jelo li lukin sona ala—. mi mute li awen toki “sina-sona-jan-seme” la ale li kama nasa. tenpo ale mi pilin e ni: mi mute li ken toki e nimi Wotemo.

—mi sona e ni: sina ken toki e nimi —jan sona MaKonaka li toki li pilin pona tan jan Tanpeto—. taso sina li sama jan ala. jan ale li sona e ni: sina-sona-j… a, jan Wotemo li pilin pakala tan sina.

—toki sina li pona tawa mi —jan Tanpeto li toki—. wawa pi jan Wotemo la, mi jo ala.

—ni la sina… pona mute. sina wile ala… kepeken… e wawa ni.

—ale li pimeja la, ni li pona. tenpo pini la jan Ponpi li toki tawa mi e ni: len kute mi li pona tawa ona. tan tenpo ni la sinpin mi li loje ala, taso sinpin mi li loje.

jan sona MaKonaka li lukin tawa ona, li toki.

—waso pi tenpo pimeja li ijo lili, toki pi jan mute li ijo suli. sina sona ala sona e toki pi jan ali: ona li weka tan nasin seme? seme li awen e ona?

ni li lon: jan sona MaKonaka li wile toki tan ijo. ona li awen lon sinpin lete tan ni. ona li lukin mute tawa jan Tanpeto. toki pi jan ali la ona li wile ala pilin, li wile pilin e toki pi jan Tanpeto. taso jan Tanpeto li wile e suwi ante li toki ala.

—jan ale li toki e ni: —ona li toki— tenpo pimeja pini la jan Wotemo li tawa ma Koti. ona li wile lukin e jan Pote. jan ale li toki… li toki e ni: jan Lili en jan Sen Pote… li moli.

jan Tanpeto li tawa e lawa ona. jan sona MaKonaka li open e uta ona.

—jan Lili en jan Sen… ni li ken ala lon. a, jan Apu o…

jan Tanpeto li kama li sike e sijelo ona kepeken e luka.

—mi sona e ni… mi sona e ni… —ona li toki, pilin ike.

toki pi jan sona MaKonaka li weka.

—ni li ale ala. jan li toki e ni: ona li wile moli e jan lili pi jan Pote, jan Awi. taso ona li ken ala. ona li ken ala moli e jan lili. jan ala li sona tan seme, li sona kepeken nasin seme, taso jan ale li toki e ni: ona li ken ala moli e ona, wawa pi jan Wotemo li pakala… ona li weka tan ni.

jan Tanpeto li tawa e lawa ona.

—ni… li lon? —jan sona MaKonaka li toki—. ona li moli e jan mute mute… li ken ala moli e jan lili? ni li nasa. ijo ala li ken awen e ona, taso jan lili… jan Awi li moli ala tan seme?

—mi mute li sona ala e ni —jan Tanpeto li toki—. ken la mi mute li ken ala sona e ni.

jan sona MaKonaka li tawa e len lon oko ona, lon monsi e sike tu ona. jan Tanpeto li pana e kon li lukin e ilo tenpo. ni li ilo tenpo nasa. ni li jo e palisa mute e nanpa ala; mun lili mute li tawa e sike. taso jan Tanpeto li sona sitelen e ni; ona li toki:

—jan Aki li lon ala, mi wile e ni: ona li kama. ona li toki tawa sina e ni: mi lon ni, anu seme?

—ona li toki. —jan sona MaKonaka li toki—. mi wile sona e ni: sina wile kama lon ni tan seme?

—mi wile pana e jan Awi tawa jan Tali. ona li jan sama ona taso.

—sina wile ala wile…? sina wile ala pana e ona tawa jan pi tomo ni! —jan sona li toki mute, luka ona tawa tomo—. jan Tanpeto… sina ken ala. tenpo suno ale la mi lukin tawa ona. ona li sama ala mi mute. jan lili ona la… mi lukin e ona pakala e mama ona. jan Awi Pote li ken ala lon tomo ni!

—ni li tomo pona tawa ona —jan Tanpeto li toki—. ona li suli la jan Tali li ken toki tawa ona e ni. mi sitelen tawa ona.

—sina sitelen anu seme? —jan MaKonaka li toki—. jan Tanpeto o, sina pilin e ni: jan ni li ken sona e ni? jan Awi la, jan ni li ken ala sona! tenpo kama la jan ale li sona e jan Awi! jan ale li nimi e tenpo suno ni “tenpo suno pi jan Awi Pote”! jan wile sitelen e lipu mute tan jan Awi… jan lili ale li sona e nimi ona.

—lon —jan Tanpeto li toki—. ni li ike tawa jan lili. jan ale li sona e ona tan ni: ijo li sona ala! sina sona ala sona e ni: ona li suli ala la tomo ni li pona tawa ona?

jan sona MaKonaka li open e uta, li ante e lawa sina, li toki e ni

—mi sona. taso… jan lili li kama lon ni kepeken nasin seme, jan Tanpeto o? —ona li lukin tawa len pi jan sona ante, li pilin e ni: jan Awi li lon insa ona.

—ona li kama kepeken jan Aki.

—sina pana e jan lili tawa jan Aki la… sina pilin e ni: ni li pona anu seme?

—ale mi la, mi pana tawa jan Aki—jan Tanpeto li toki.

—mi sona e ni: pilin pi jan Aki li pona —wile ala la jan sona MaKonaka li toki —taso ona li nasa. ona li… kalama ni li seme?

kalama suli li lon. kalama li tawa suli, jan tu li lukin tawa nasin, li wile lukin e suno. kalama li suli mute la tomo tawa suli pi sike tu li anpa tan sewi li kama tawa nasin, lon sinpin jan tu.

tomo tawa li suli, taso jan lawa pi ona li suli mute. ona li suli sama jan tu. linja lawa ona li pimeja li suli li pakala, linja mute li lon sinpin ona kin. luka ona li suli mute, en noka ona li suli kin. ona li jo e ijo len kepeken luka ona.

—jan Aki o —jan Tanpeto li toki—. sina lon, pini. sina jo e tomo tawa ni lon seme?

—jan li pana e ona tawa mi, jan sona Tanpeto o —jan suli li toki li anpa tan tomo tawa—. jan Siwos Pa li pana e ona tawa mi. mi jo e ona, jan o.

—ale li pona?

—ale li pona. tomo li pakala, taso mi weka e jan lili, jan Make li lukin ala e ona. mi lon ma tomo Pito la ona li kama lape.

jan Tanpeto en jan sona MaKonaka li lukin e ijo len. insa la jan lili li lape. anpa linja lawa pimeja la ona li lukin e pakala sama sitelen wawa.

—ona li…? —jan sona MaKonaka li toki.

—tenpo ale la —jan Tanpeto li toki— ona li jo e pakala ni.

—sina ken ala ken pona e pakala, jan Tanpeto o?

—mi wile ala pona e ona. pakala li ken kepeken pona. mi jo e pakala lon noka mi: ni li sitelen pi ma tomo Lantan. jan Aki o pana e jan lili tawa tomo. mi wile pini.

jan Tanpeto li lukin tawa tomo Tali.

—mi… ken ala ken toki e ni tawa ona: tawa pona? —jan Aki li toki.

ona li pilin e sinpin pi jan Awi kepeken e uta ona. jan Aki li mu, li pilin ike.

— a! — jan sona MaKonaka li toki—. jan Make li lape!

—mi… ike —jan Aki li toki li pilin e len lon sinpin ona—. taso ni li ike kin… jan Lili en jan Sen, li moli… jan lili Awi li awen lon jan Make…

—ijo ale li ike, taso jan Aki o kalama ala, ona li sona e ni: mi mute li lon ni —jan sona MaKonaka li toki. ona li sike e luka pi jan Aki kepeken e luka ona. jan Tanpeto li tawa lupa pi tomo Tali. ona li pana e jan Awi lon lupa. lon poka ona la ona li pana e sitelen. ona li kama lon jan ante tu. tenpo mute la ona li lukin e jan lili. jan Aki li pilin ike mute. jan sona MaKonaka li pilin ike kin. oko pi jan Tanpeto li jo ala e suno ona.

—ni li pini —jan Tanpeto li toki—. mi mute li ken ala pali e ijo ala lon ni. mi mute li wile tawa musi lon poka jan ale.

—a — jan Aki li toki—. mi wile pana e tomo tawa tawa jan Siwos. tenpo pimeja pona, jan sona MaKonaka o, jan sona Tanpeto o.

jan Aki li weka e telo tan oko ona kepeken e len luka ona, li tawa lon tomo tawa li tawa lon kon. ona li weka lon tenpo pimeja.

—o tawa pona, jan MaKonaka o —jan Tanpeto li toki li tawa e lawa ona. jan sona MaKonaka li toki ala li weka e telo pi nena sinpin ona.

jan Tanpeto li tawa kin. ona li awen lon nasin, li sewi e ilo pi weka suno. ona li pali e ona, suno nasin ale li kama sin. nasin Pawe Ta li pimeja ala. ona li lukin e soweli tawa nasin ante e ijo len lon lupa tomo.

—awen pona, jan Awi —jan Tanpeto li toki lili. ona li sike li weka.

kon tawa e kasi pi nasin Pawe Ta. sewi li pimeja, kalama ala li lon. lon ni la jan ala pilin e ni: ijo nasa li lon. jan Awi li awen lape lon len. luka lili ona li awen e sitelen. ona li sona ala e ni: jan ale li sona e ona; tenpo lili kama la meli Tali li lukin e ona li toki kalama; tenpo mute kama li jan Tasi li pakala e ona… jan mute li kulupu, lon ma ale, li toki e ni: “jan Awi Pote o… jan lili pi moli ala!”.